უკვე ვხედავთ დადებით ცვლილებებს Air Astana-ს რეისების სტაბილურობასა და ჩვენი მგზავრებისთვის გაწეულ მომსახურებაში, - ამის შესახებ Business Insider Georgia-ს სამხრეთ კავკასიის რეგიონში ავიაკომპანია Air Astana-ს გენერალურმა მენეჯერმა კამილა ჟალიბაუიევამ განუცხადა, რითაც ის საქართველოს მთავრობის გადაწყვეტილებას გამეხმაურა, რომლის მიხედვითაც ქვეყნის საერთაშორისო აეროპორტებში იმ მგზავრების გამო, რომელსაც სახელმწიფოში შესვლის უფლება არ მიეცემათ ავიარეისების შეყოვნება აღარ მოხდება.

როგორც კამილა ჟალიბაუიევა განმარტავს, საქართველოს ხელისუფლებასთან, TAV-თან, UAG-თან, GCAA-სთან და სასაზღვრო სამსახურთან თანამშრომლობით ყაზახეთსა და საქართველოს შორის პირდაპირი ფრენების სტაბილური ფუნქციონირება იქნება უზრუნველყოფილი.

„მაღალი ტურისტული სეზონის დადგომის წინ კონსტრუქციული შეხვედრა გაიმართა საქართველოს ეკონომიკისა და მდგრადი განვითარების სამინისტროსთან, რომლის დროსაც არაერთი მნიშვნელოვანი საკითხი იქნა განხილული, მათ შორის საერთაშორისო ავიახაზების მგზავრების ხშირი დეპორტაცია და, შედეგად, რეისების დაგვიანება. შეხვედრის შემდეგ მიღწეული იქნა შეთანხმებები, რომლებიც მიზნად ისახავდა წარმოშობილი სირთულეების აღმოფხვრას. სამინისტრომ გამოავლინა გახსნილობისა და თანამშრომლობისადმი მზაობის მაღალი ხარისხი, რამაც შესაძლებელი გახადა ავიაკომპანიებისა და მგზავრების ინტერესებიდან გამომდინარე სწრაფი გადაწყვეტილებების მიღება.

ჩვენ უკვე ვხედავთ დადებით ცვლილებებს Air Astana-ს რეისების სტაბილურობასა და ჩვენი მგზავრებისთვის გაწეულ მომსახურებაში. ვიმედოვნებთ, რომ ხელისუფლებასთან, TAV-თან, UAG-თან, GCAA-სთან და სასაზღვრო სამსახურთან შემდგომი თანამშრომლობა ჩვენს ქვეყნებს შორის ფრენების სტაბილურ ფუნქციონირებას უზრუნველყოფს“, - განაცხადა სამხრეთ კავკასიის რეგიონში ავიაკომპანია Air Astana-ს გენერალურმა მენეჯერმა.

კამილა ჟალიბაუიევას თქმით, საქართველოს ყაზახეთისთვის მნიშვნელოვანი ტურისტული მიმართულებაა და ამ ფონზე ავიაკომპანია სიხშირეების ზრდას და ახალი მიმართულების დამატებას გეგმავს.

„კულტურული სიახლოვის, ენობრივი ბარიერის არარსებობის, სტუმართმოყვარეობისა და ტურისტული მარშრუტების მრავალფეროვნების გამო ტრადიციულად საქართველო ყაზახ ტურისტებს შორის მაღალი მოთხოვნილებით სარგებლობდა - შავი ზღვის სანაპიროდან მთის კურორტებამდე. ქვეყანა ასევე გამოირჩევა მდიდარი გასტრონომიით, მეღვინეობის ტრადიციებით, ხელმისაწვდომი ფასებითა და გამარტივებული სავიზო რეჟიმით.

ყაზახი ტურისტების მხრიდან სტაბილურად მაღალი მოთხოვნის გათვალისწინებით, ზაფხულის სეზონზე კომპანიების ჯგუფი Air Astana კვირაში რეისების სიხშირეების 22-მდე ზრდას გეგმავს. ეს არის 10 რეისი ალმატი-თბილისს შორის, 4 რეისი ასტანა-თბილისს შორის და 5 რეისი ბათუმი-ალმატის შორის. გარდა ამისა, ფრენების გეოგრაფიის გაფართოების ფარგლებში, წელს იგეგმება ატირაუ-თბილისის მარშრუტზე ახალი პირდაპირი რეისის გახსნა.

დარწმუნებულები ვართ, რომ ფრენების სიხშირის ზრდა და მიღწეული შეთანხმებები ხელს შეუწყობს ამ მიმართულებისადმი ინტერესის შემდგომ ზრდას და ყაზახეთსა და საქართველოს შორის ტურისტული კავშირების განმტკიცებას“, - ამბობს კამილა ჟალიბაუიევა.

შეგახსენებთ, რომ იმ მგზავრების გამო, რომელთაც ქვეყანაში შემოსვლის საშუალება სხვადასხვა მიზეზების გამო არ ჰქონდათ, ყოვნდებოდა ავიაკომპანიების რეისები, რომლითაც ეს მგზავრები ქვეყანაში ჩამოდიოდნენ. თუმცა მთავრობის მიერ მიღებული გადაწყვეტილების მიხედვით, ავიაკომპანია საქართველოდან რეისს გრაფიკის მიხედვით შეასრულებს და აღნიშნული „საეჭვო“ მგზავრების უკან გაბრუნება შემდეგი რეისით მოხდება. ეს კი, როგორც თავად საავიაციო ბიზნესის წარმომადგენლები განმარტავენ, მათ ხარჯებს დაუზოგავს.