რაჭას და კერძოდ ქალაქ ონს რამდენიმე დღეში მაღალი კლასის Nouvelle Hotel • სასტუმრო ნოველა შეემატება, რაშიც კომპანია „რაჭა პროჯექტ მენეჯმენტმა“ 6 მლნ ლარამდე ინვესტიცია უკვე განახორციელა. როგორც სასტუმროს წარმომადგენელმა თეიმურაზ გრძელიშვილმა, ტურიზმის ეროვნული ადმინისტრაციის ორგანიზებით გამართულ პრესტურის ფარგლებში გამართულ Business Insider Georgia-სთან განაცხადა, სასტუმრო არის სააგენტოს „აწარმოე საქართველოში“ ბენეფიციარი და ის ოპერირების დაწყების შემდეგ 35 ადგილობრივს დაასაქმებს.

„ქალაქ ონში ახლად აშენებული ა​სასტუმრო „ნოველა“ სტუმრების მიღებას აგვისტოს პირველი ნახევრიდან შეძლებს. სასტუმროს მშენებლობა განაპირობა რეგიონში ტურისტების რაოდენობის ზრდამ, რაც თავის მხრივ დაკავშირებულია ისეთ უმნიშვნელოვანეს პროექტთან, როგორიც არის საჩხერე-რაჭის დამაკავშირებელი გზის მშენებლობა. საგზაო ინფრასტრუქტურის განვითარებამ ონში და ზოგადად რაჭაში ტურისტული ნაკადები მნიშვნელოვნად გაზარდა. 2020 წლიდან 2025 წლამდე ტურისტების რაოდენობა 40%-ით გაზარდა. 

მსგავსი საერთაშორისო ტიპის სასტუმრო არც ონის მუნიციპალიტეტში და უშუალოდ ქალაქ ონში ამ დროისათვის არ არსებობს. „ნოველა“ დააკმაყოფილებს 4 ვარსკვლავიანი სასტუმროს სტანდარტებს. მისი მშენებლობისთვის განხორციელდა 6 მლნ ლარის ინვესტიცია. მსგავსი ტიპის ინვესტიცია და სასტუმროს მშენებლობა ონისთვის უმნიშვნელოვანესია. აქ შესაძლებელი იქნება ისეთი საერთაშორისო სერვისების მიღება, როგორც ეს ჩვენს სტუმრებს ევროპის სხვადასხვა ქვეყანაში შეეძლოთ მიეღოთ“, - განმარტავს „ნოველას“ წარმომადგენელი. 

სასტუმრო „ნოველა“ 16 სასტუმრო ნომერს აერთიანებს. სასტუმროს ექნება ასევე საკონფერენციო დარბაზები და საცურაო აუზი. 

„ჩვენი საკონფერენციო დარბაზები გათვლილია 60 ადამიანზე. გვექნება მცირე ზომის და ასევე შედარებით დიდი საკონფერენციო დარბაზი. საკონფერენციო ინფრასტრუქტურა გათვლილია როგორც ტურისტებისთვის, ისე რეგიონში MICE  ტურიზმის განვითარებაზე და ასევე კორპორატიული შეხვედრებისთვის“, - განმარტავენ სასტუმრო „ნოველაში“.

რაც შეეხება საცურაო აუზს ის დახურული ტიპის იქნება და მისი მშენებლობა მომავალ წელს დაიწყება. სასტუმროში აქტიურად იქნება ასევე განვითარებული სპა მიმართულება. მას შემდეგ რა „ნოველა“ გაფართოვდება და აუზს დაამატებს, კომპანია „რაჭა პროჯექტ მენეჯმენტი“ სასტუმროსთვის 4 ვარსკვლავის მინიჭებაზე გააკეთებს ოფიციალურ განაცხადს. 

რაც შეეხება გასტრონომიას, „ნოველა“ გააერთიანებს ლაუნჯს, რესტორანს და ბისტროს, სადაც ევროპულ და ქართულ კერძებთან ერთად წარმოდგენილი იქნება რაჭული გასტრონომია და ამ რეგიონისთვის დამახასიათებელი კერძები. სასტუმროს რესტორნის მენიუში ასევე შეხვდებით დავიწყებულ, მაგრამ უკვე აღდგენილ სხვადასხვა რაჭულ კერძებს.