„არ მახსენდება ამ მასშტაბის ინვესტიცია განხორციელებულიყოს დამოუკიდებელი საქართველოს ისტორიაში,“ - აცხადებს Business Insider Georgia-სთან „იელთი ჯგუფის“ დამფუძნებელი ელგუჯა თურმანიძე საქართველოში Eagle Hills-ის გეგმების შეფასებისას.

არაბთა გაერთიანებული საამიროების ერთ-ერთ უმსხვილეს დეველოპერულ კომპანია Eagle Hills-სა და საქართველოს მთავრობას შორის გაფორმებული შეთანხმების ფარგლებში, ქვეყანაში უპრეცედენტო მოცულობის  6.5 მილიარდ დოლარზე მეტი ღირებულების ორი პროექტი განხორციელდება.

კომპანია Eagle Hills, რომელიც EMAAR-ის ხელმძღვანელისა და დამფუძნებლის მოჰამედ ალაბარის  მიერ შეიქმნა, მსოფლიოს მასშტაბით მსხვილ დეველოპერულ პროექტებს ახორციელებს. კომპანიის პორტფელში შედის მრავალმილიარდიანი პროექტები 10-ზე მეტ ქვეყანაში, მათ შორის ბელგრადში, ბუდაპეშტში, რიგასა და სხვა ქალაქებში.

„Eagle Hills-თან დაკავშირებით ძალიან ბევრი ითქვა და დარწმუნებული ვარ, კიდევ ბევრი ითქმება. თუმცა მე, რაც თავი მახსოვს - უკვე 20-25 წელია, რაც ჩვენ წარმოდგენილი ვართ სამშენებლო-დეველოპერულ ბიზნესში არ მახსენდება ამ მასშტაბის ინვესტიცია განხორციელებულიყოს დამოუკიდებელი საქართველოს ისტორიაში.

აქედან გამომდინარე, იმ საინვესტიციო მოცულობაზე, რაზეც არის საუბარი, ვფიქრობთ, დიდი ხანი ვბრძოლობდით, ვმუშაობდით, რომ თუნდაც მსგავსი მოცულობისა და რეპუტაციის მქონე კომპანია, საინვესტიციო ჯგუფი შემოგვეყვანა საქართველოში - ჯერ კიდევ 2005 წლიდან.

ამას ექნება ძალიან დიდი ეფექტი, როგორც პირდაპირი, ასევე ირიბი. ამის ახსნაც რომ გვიწევს, მე მგონი, არც კი არის მთლად მისასალმებელი. თუმცა მისი პირდაპირი ეფექტი, რომ დავაკონკრეტოთ, დაკავშირებულია რამდენიმე ათას ადამიანთან, ასობით კომერციული ობიექტისა და ახალი ბიზნესების გაჩენასთან. ირიბად კი სხვა თანმხლები ბიზნესების გააქტიურებასთან და მათში დამატებით დასაქმებულ ადამიანთა რაოდენობის ზრდასთან. ვფიქრობ, ეს ყველაფერი ნათლად გამოჩნდება სულ რაღაც აქტიური სამუშაოების დაწყებიდან ერთ წელიწადში,“ - აცხადებს ბიზნესმენი.

„იელთი ჯგუფის“ დამფუძნებელი ფიქრობს, რომ Eagle Hills-ის მრავალმილიარდიან ინვესტიციას მრავალმხრივი ეფექტი ექნება და, გარდა სხვადასხვა ბიზნესების წახალისებისა, ხელს შეუწყობს საქართველოს ცნობადობის კიდევ უფრო გაზრდას გლობალურ ბაზრებზე.

„მას შემდეგ, რაც დაანონსდა აღნიშნული ინვესტიციის განხორციელების საკითხი საქართველოში - კარგად გახსოვთ, ბოლო ერთი წელი აქტიურად მიდიოდა ამაზე საუბარი, სანამ ასე წარმატებით დაგვირგვინდებოდა ეს პროცესი ჩვენც გვიფიქრია ამაზე და ჩვენი მოლოდინები აბსოლუტურად დადებითი და პოზიტიურია.

უკვე რამდენიმე წელია, გვქონდა საუბარი როგორც ბიზნესასოციაციებთან, ისე ჩვენს კონკურენტებთან და სფეროში მოღვაწე ადამიანებთან შექმნილიყო ერთიანი პლატფორმა, რაც დაგვეხმარებოდა ერთიანი ძალებითა და ხარჯებით ქვეყნის ცნობადობის გაზრდაში ისეთ არატრადიციულ ბაზრებზე, სადაც ჯერჯერობით ვერ ვოპერირებთ და საიდანაც ვერ შემოედინება ის ნაკადები, რაც სჭირდება ამ სფეროს და ჩვენს ქვეყანას.

ასე რომ, ეს არის სწორედ შესაძლებლობა, ერთ-ერთი დადებითი მოვლენა, რომელიც დაგვეხმარება ქვეყნის ცნობადობის ზრდაში, სადაც აქამდე ცალკეული კომპანიები დიდ რესურსს ხარჯავდნენ, თუმცა ერთეულთა აქტიურობით სასურველ შედეგამდე ვერ მივდიოდით. ამიტომ, ვფიქრობ, Eagle Hills-ის შემოსვლა ძალიან დაეხმარება საქართველოს და კონკრეტულად ჩვენს სფეროში მოღვაწე კომპანიებსა და თანმდევ ბიზნესებს, ასევე არატრადიციული ბაზრებიდან ახალი ინვესტორებისა და მყიდველების მოზიდვაში. ეს ყველაფერი საქართველოს სრულიად სხვა მასშტაბზე გაიყვანს,“ - აცხადებს ელგუჯა თურმანიძე.

„იელთი ჯგუფის“ დამფუძნებელი იმ ნეგატიურ მოსაზრებებსაც ეხმაურება, რომლებიც სხვადასხვა ძალების მიერ საქართველოში Eagle Hills-ის პროექტებთან დაკავშირებით გამოითქვა.

„სამწუხაროა, რომ ასეთი რამ ხდება. თუმცა უნდა აღვნიშნო, რომ არა მხოლოდ ასეთი მასშტაბური პროექტების, არამედ საშუალო თუ მცირე დონის ინფრასტრუქტურული ან დეველოპერული პროექტების განხორციელების დროსაც ახლავს დიდი მითქმა-მოთქმა და აზრთა სხვადასხვაობა.

თუ ცოტა იუმორით გადავიტანთ - მახსენდება ორსართულიანი მატარებლების საკითხი, როდესაც რამდენიმე წლის წინ დიდი აჟიოტაჟი იყო ატეხილი და ჩვენც ვფიქრობდით, როგორ გაეტეოდა არსებული ინფრასტრუქტურაში. საბოლოოდ კი უკვე წლებია წარმატებით ვსარგებლობთ ამ სერვისით.

ასე რომ, ბუნებრივია, ასეთი მასშტაბის პროექტებს შეიძლება ახლდეს კრიტიკა, მაგრამ სამწუხაროა, როცა ეს კრიტიკა მიზანმიმართულია პროექტის რეპუტაციისა და განხორციელების დაზიანებისკენ. თუ ეს არის გულწრფელი შიში, ეს ახსნადია  და ახსნადიც გახდება ამ პროექტების წარმატებული შედეგებით.

როგორ შეიძლება ასეთი მოცულობის ლეგალური ინვესტიცია, რომელიც სწორად იქნება მართული, აღმოჩნდეს ქვეყნისთვის ცუდი?!

თანაც ეს ინვესტიცია მოიზიდავს არა იმ ადამიანების მასას, რომელთა შესახებ გარკვეული ჯგუფები შიშობენ, არამედ მაღალმხარჯველუნარიან ინვესტორებს აზიისა და ახლო აღმოსავლეთის ქვეყნებიდან - მათ შორის ბრიტანეთის, ამერიკისა და ევროპის მოქალაქეებს, რომლებიც უბრალოდ დღემდე არ იცნობდნენ ჩვენს ქვეყანას.

ეს არის შანსი, რომ მათ თავი გავაცნოთ. როდესაც ასეთი რეპუტაციული კომპანია ასეთ მოცულობის ინვესტიციით შემოდის საქართველოში  იმაზე დიდი, ვიდრე ბევრ სხვა ქვეყანაში განუხორციელებია ვფიქრობ, ნეგატიურის გავრცელება რთული იქნება. შედეგები თავად იტყვის ყველაფერს,“ - ამბობს თურმანიძე.

ბიზნესმენის თქმით, როდესაც ასეთი რეპუტაციის საინვესტიციო ჯგუფი შემოდის საქართველოში, რომელსაც აქვს მაღალი ცნობადობა ჩინეთში, ინდოეთში, საფრანგეთში, იტალიაში, აშშ-ში და წარმატებით ოპერირებს გალფის ქვეყნებში, მას ჰყავს პარტნიორები, მყიდველები და თანაინვესტორები, რომლებიც წლების განმავლობაში ენდობიან და მიყვებიან ყველგან, სადაც ეს ჯგუფი ახორციელებს ინვესტიციას.

„ეს არის ძლიერი ბიძგი. Eagle Hills-მა უკვე შეისწავლა ჩვენი რეგიონი და ქვეყანა, დაიჯერა ჩვენი პოტენციალი - და ახლა სხვა მსხვილი ინვესტორებიც მას მიჰყვებიან. ჩემთვის ცნობილია, რომ უკვე რამდენიმე სხვა კომპანია აქტიურად არის დაინტერესებული სხვადასხვა მიმართულებით - განახლებადი ენერგიებიდან დაწყებული სამშენებლო და ინფრასტრუქტურულ პროექტებამდე.

ეს არის შანსი, რომელიც სწორად უნდა გამოვიყენოთ სწორად ვმართოთ ჩვენი პერსპექტივა და მომავალი.

რაც შეეხება მიწის ფართობს, რომელიც გადაეცა აღნიშნულ საინვესტიციო ჯგუფს დეველოპმენტისთვის  თუ არ ვცდები, მისი ღირებულება დაახლოებით 1 მილიარდ დოლარს შეადგენს, ხოლო მათ მიერ განსახორციელებელი ვალდებულება 6.5 მილიარდია. შესაბამისად, ჩვენი ქვეყნის თანამონაწილეობა საინვესტიციო კაპიტალში გამოდის დაახლოებით 1/6, ხოლო 33%-იანი წილის ფლობა - 1/3.

ვფიქრობ, ეს საკმაოდ მომგებიანი კომერციული გარიგებაა. მე დიდი სიამოვნებით დავთანხმდებოდი ცოტათი ნაკლებსაც, ეს რომ ყოფილიყო ჩვენი კომპანიის დეველოპმენტური შეთანხმება. ამას დაემატება მოსალოდნელი მოგებაც, რაც ამ ინვესტიციის შედეგად შეიქმნება. ვფიქრობ, ჩვენი ქვეყანა რამოდენიმეჯერ მეტ სარგებელს მიიღებს.

მახსოვს, ჯერ კიდევ 2005 წლიდან ვცდილობდით ბათუმის შემთხვევაში  ე.წ. გონიოს სამხედრო პოლიგონის მიმდებარედ  შემოსულიყო 2 მილიარდის მოცულობის ინვესტიცია, მაგრამ დღემდე ვერ განხორციელდა. ახლა კი ეს მოხდა  და ცოტა უცნაურია, რომ ამაზე უარყოფითი რეაქციაც კი გვხვდება,“ - აცხადებს ელგუჯა თურმანიძე.