საქართველოში სრულიად ახალი ტიპის საგანმანათლებლო ოლიმპიადა იწყება - STEAM Challenge Georgia, რომელიც  უნიკალურია, რადგან არის სრულად ინტერდისციპლინური და პრაქტიკაზე ორიენტირებული. ინიციატივა განათლების ხარისხის განვითარების ეროვნული ცენტრის მიერ აკრედიტებული ტექნოლოგიური პლატფორმა Skillwill-ისა და სწავლების STEAM მიდგომაზე დაფუძნებული საგანმანათლებლო რესურსების მწარმოებელი კომპანია STEAMit-ის ერთობლივი ძალისხმევით ხორციელდება და მიზნად ისახავს მოსწავლეებისათვის იმ უნარების განვითარებას, რომლებიც თანამედროვე სამყაროში მათ რეალურად სჭირდებათ - კრიტიკული და ანალიტიკური აზროვნება, გუნდური მუშაობა, კრეატიულობა და ტექნოლოგიური მსოფლმხედველობა.

ოლიმპიადის კონცეფცია ეფუძნება STEAM განათლების პრინციპებს, რომელიც აერთიანებს: საბუნებისმეტყველო მეცნიერებებს (Science), ტექნოლოგიებს (Technology), ინჟინერიას (Engineering), ხელოვნებასა (Arts) და მათემატიკას (Mathematics). პროექტი საშუალებას აძლევს VII-XI კლასის მოსწავლეებს, მთელი საქართველოს მასშტაბით მიიღონ მონაწილეობა ორეტაპიან კონკურსში: პირველი ეტაპი ონლაინტესტირებას მოიცავს, ხოლო მეორე, ფინალური ფაზა - პრაქტიკულ, გუნდურ ამოცანებს.

როგორც Skillwill-ის დამფუძნებელი და აღმასრულებელი დირექტორი გიორგი მარიამიძე ამბობს, ოლიმპიადა არა მხოლოდ ცოდნის, არამედ მოსწავლეთა პრაქტიკული უნარების შეფასებას ისახავს მიზნად:

„STEAM Challenge Georgia სრულიად ახალი ფორმატის საგანმანათლებლო ოლიმპიადაა, რომელიც რეალურ იმედს გვაძლევს, რომ ქართულ განათლებაში გარდატეხა დაიწყება. აქ მთავარია შემოქმედებითი აზროვნება, პრობლემის გადაჭრის უნარი და გუნდური მუშაობის შესაძლებლობა. დღევანდელ სწრაფად განვითარებად ტექნოლოგიურ სამყაროში მნიშვნელოვანია, რომ ბავშვებმა სკოლის ასაკიდანვე განავითარონ უნარები, რომლებიც მომავალში მათ პროფესიულ წარმატებასა და კონკურენტუნარიანობას განაპირობებს. სწორედ ამიტომ, გადავწყვიტეთ, ჩაგვეტარებინა ოლიმპიადა, რომელიც სტანდარტული ტესტირების ნაცვლად, რეალურ გამოცდილებას შესთავაზებს მოსწავლეებს.

ჩვენი მიზანია, ვაჩვენოთ, რომ განათლება შეიძლება იყოს ცოცხალი, ინტერაქტიული და რეალურ ცხოვრებაზე მორგებული. სწორედ ამიტომ, ფინალური ტური სრულად დაფუძნებულია პრაქტიკულ გამოწვევებზე, რომლის ფარგლებშიც ბავშვები არა მხოლოდ ცოდნას, არამედ რეალურ სამყაროში საჭირო უნარებს გამოავლენენ.

ჩვენთვის მნიშვნელოვანია, რომ ყველა მოტივირებულ მოსწავლეს ჰქონდეს მონაწილეობის თანაბარი შანსი. მონაწილეობის მიღება შეუძლიათ როგორც საჯარო, ასევე კერძო სკოლებს ქვეყნის ნებისმიერი კუთხიდან, რეგისტრაცია უკვე მიმდინარეობს და გაგრძელდება 18 მაისის ჩათვლით. ოლიმპიადა მოიცავს კომპეტენციაზე დაფუძნებულ ტესტირებას საგნებში - მათემატიკა, ფიზიკა, ქიმია, ბიოლოგია და გეოგრაფია. ტესტის მიზანია შეაფასოს არა დეკლარატიული ცოდნა საგანში, არამედ ის თუ რამდენად შეუძლია მოსწავლეს საგნობრივი ცოდნის რეალურ ამოცანებში გამოყენება. ფინალურ ეტაპზე კი მოსწავლეები გუნდურად გადაჭრიან პრაქტიკულ, რეალურ ამოცანებს. ეს არის გამოცდილება, რომელიც რწმენას აძლევს მოსწავლეს, რომ მას შეუძლია შეცვალოს მომავალი. თითოეული მონაწილე ამ ოლიმპიადიდან წავა არა მხოლოდ ცოდნით, არამედ ხედვით - როგორია მათი ადგილი მომავალ სამყაროში და როგორ შეუძლიათ იქ საკუთარი როლის პოვნა.“

ოლიმპიადის მეორე ეტაპი განსაკუთრებით გამოირჩევა თავისი პრაქტიკული ხასიათით -  ფინალისტები ფიზიკურ სივრცეში იმუშავებენ რეალურ STEAM გამოწვევებზე: საინჟინრო ამოცანების გადაწყვეტაზე, კრეატიული მოდელების შექმნასა და პროტოტიპების წარმოდგენაზე.

ოლიმპიადის თანაორგანიზატორი, საქართველოს ინოვაციებისა და ტექნოლოგიების სააგენტოს ელექტრონიკისა და წარმოების ტექნოლოგიების ექსპერტი და კომპანია STEAMit-ის თანადამფუძნებელი მამუკა აფაქიძე ხაზს უსვამს იმ განსხვავებას, რაც ამ ოლიმპიადას სხვა კონკურსებისგან გამოარჩევს:

„ჩვენი მიზანი იყო, შეგვექმნა ისეთი ფორმატი, რომელიც ბავშვებს აჩვენებდა, რომ სწავლა ნამდვილად შეიძლება იყოს შთამბეჭდავი თავგადასავალი. პირველ ეტაპზე, კომპეტენციაზე დაფუძნებული ტესტის შედეგად, ვაფასებთ მოსწავლეთა პრაქტიკულ უნარს, თუ როგორ შეუძლიათ მათ საგნობრივი ცოდნის გამოყენება რეალურ ამოცანებში. ფინალური ტური  მთლიანად პრაქტიკულ სამუშაოზეა ორიენტირებული - გუნდური კომუნიკაცია, დროის მართვა, პრობლემის საინჟინრო გადაწყვეტა. ეს ყველაფერი ძალიან ახლოს დგას რეალურ ცხოვრებისეულ ამოცანებთან.

მოსწავლეები იმუშავებენ ინოვაციური იდეების შექმნაზე, რაც არა მხოლოდ აკადემიური განვითარებისთვისაა მნიშვნელოვანი, არამედ აუცილებლად წაადგებათ მომავალ პროფესიულ არჩევანში.

გვსურს, რომ გამარჯვებული გუნდების იდეები არ დარჩეს მხოლოდ ოლიმპიადის ფარგლებში - მათ ექნებათ შესაძლებლობა, თავიანთი პროექტები წარადგინონ როგორც ეროვნულ, ისე საერთაშორისო საგანმანათლებლო სივრცეში. იმედი გვაქვს, ეს ინიციატივა ყოველწლიურ ტრადიციად ჩამოყალიბდება და საქართველოში STEAM განათლების მიმართულებით სისტემურ განვითარებას შეუწყობს ხელს.“

ორგანიზატორების თქმით, STEAM Challenge Georgia არ არის მხოლოდ შეჯიბრი, ეს არის ფანჯარა თანამედროვე განათლებისკენ - გზა, რომელიც ახალგაზრდებს სამომავლო შესაძლებლობებს უხსნის და განათლებას ცხოვრებისეულ მნიშვნელობას ანიჭებს.

გიორგი მარიამიძე:

„ჩვენ გვჯერა, რომ განათლებამ ბავშვებს უნდა მისცეს ძალა - ძალა ფიქრის, მოქმედებისა და სამყაროზე ზემოქმედებისა. STEAM Challenge Georgia სწორედ ამ ხედვით შეიქმნა. გვინდა, რომ მოტივირებულ ახალგაზრდებს შევუქმნათ სივრცე, სადაც მათ შეუძლიათ იფიქრონ ამბიციურად და იმოქმედონ გააზრებულად. საქართველოს განათლების სისტემაში ახალი ფურცლის გადაშლა სწორედ ასეთი ინიციატივებით იწყება. ეს ოლიმპიადა კი ჩვენი საერთო ნაბიჯია უკეთესი მომავლისკენ და ვამაყობთ, რომ მისი საწყისი ნაბიჯების თანამონაწილეები ვართ.“

მამუკა აფაქიძე:

„ეს ოლიმპიადა არის არა მხოლოდ მოტივაცია და სტიმული მოსწავლეებისთვის, არამედ სტარტი - სივრცე, სადაც მათ პირველად მიეცემათ საშუალება, იმუშაონ, როგორც პროფესიონალებმა. გვჯერა, რომ ეს გამოცდილება მომავალში მნიშვნელოვან გავლენას მოახდენს მათ არჩევანზე და, რაც მთავარია, ბავშვებს მივცემთ შესაძლებლობას, წარმოჩნდნენ და რეალურად აჩვენონ თავიანთი პოტენციალი.“

რეგისტრაცია STEAM Challenge Georgia-ზე უკვე დაწყებულია და გაგრძელდება 18 მაისის ჩათვლით.

დამატებითი ინფორმაციისთვის დეტალებს გაეცანით ბმულზე: https://www.facebook.com/share/16Dx45ioJc/

სარეგისტრაციო ბმული: https://forms.gle/PummtfqTMAdSDteS9