„Starring Georgia-მ“ დასაქმების ხელშეწყობის სახელმწიფო სააგენტოსთან თანამშრომლობა დაიწყო. თანამშრომლობა მიზნად ისახავს „Starring Georgia-ს“ პროექტებში იმ ადამიანების მაქსიმალურ ჩართულობას, რომლებიც შესაბამის სამსახურს ეძებენ. აქცენტი ადგილობრივებზე კეთდება. დასაქმების ხელშეწყობის სახელმწიფო სააგენტო ერთგვარი შუამავალი რგოლია, რომელიც დამსაქმებელს შესაბამისი აუდიტორიის მოძებნაში საკუთარი რესურსით ეხმარება.
ამ ეტაპზე ვაკანსიები რამდენიმე პოზიციაზეა გამოცხადებული შეკვეთილში მდებარე ატრაქციონების პარკ „ციცინათელაში“, რომელიც მასშტაბური განახლების შემდეგ სტუმრებს მალე პირველად უმასპინძლებს. მათ იქ თანამედროვე სტანდარტებით აღჭურვილი, კომფორტული და განახლებული სივრცეები დახვდებათ. რეაბილიტაციის ფარგლებში, ხორციელდება არა მხოლოდ ტექნიკური ცვლილებები, არამედ ახლდება პარკის კონცეფციაც. „ციცინათელა“ მნიშვნელოვან სიახლეებს უმზადებს ვიზიტორებს, განსაკუთრებით კი, ბავშვებს რომლებიც ყოველ სეზონზე საქართველოს ყველაზე დიდ ატრაქციონების პარკში დაუვიწყარ ემოციებს იღებენ.
აღსანიშნავია, რომ პროექტში მაქსიმალურად იყვნენ და არიან ჩართულნი
ადგილობრივები. მათ საკუთარი ხელით მოხატეს „ციცინათელას“ პარკი, სადაც უნიკალური გარემო შექმნეს. ბევრმა მათგანმა ახალი ინტერესი შეიძინა, პროფესიულად განვითარდა და დაიხვეწა.
სწორედ ადგილობრივების დასაქმებასა და ადგილობრივი მეწარმეების განვითარებას ისახავს მიზნად კამპანია „გურია მთავარ როლში“, რომლის ფარგლებშიც „Starring Georgia-მ“, საქართველოს ტურიზმის ეროვნული ადმინისტრაციის მხარდაჭერით, ადგილობრივ მეწარმეებს ტრენინგები ჩაუტარა და სხვადასხვა მიმართულებით გადაამზადა. ტრენინგებზე მიღებული ცოდნა მათ დაეხმარება, წლევანდელი მუსიკალური სეზონისთვის — რომელიც 30 მაისს Guns N' Roses-ის კონცერტით გრანდიოზულად გაიხსნა — თანამედროვე სტანდარტებით მოაწესრიგონ თავიანთი სასტუმრო თუ სხვა ტიპის სერვისები, რომლითაც 2025 წლის ზაფხულში გურიაში ჩასული ათობით ათასი ვიზიტორი ისარგებლებს.
„ჩვენთვის ძალიან მნიშვნელოვანია როგორც ჩვენს პროექტებზე ადგილობრივების დასაქმება, ასევე ადგილობრივ ბიზნესთან თანამშრომლობა. ადგილობრივი მეწარმეების მხარდასაჭერად, უკვე გადავდგით პირველი ნაბიჯები. წელს არის პირველი შემთხვევა, როცა, მაგალითად, კვების მიმართულებით, ადგილობრივ მეწარმესთან ვთანამშრომლობთ. გამოჩნდნენ ახალი სტარტაპები, რომლებმაც საკუთარი საქმიანობა „Starring Georgia-ს“ კონცერტებს დაუკავშირეს, იქნება ეს სახის მოხატვა თუ სხვა მსგავსი მომსახურებები. ადგილობრივი მეწარმეები უკვე ხვდებიან იმასაც, რომ მომხმარებლებთან აქტიური კომუნიკაცია და სოციალური არხების ქონაც აუცილებელია. ეს ყველაფერი პირველი ნაბიჯებია და მჯერა, რომ ამ სეზონის შემდეგ, როდესაც რეალურ სიკეთეებს დაინახავენ, მათი მოტივაცია კიდევ უფრო გაიზრდება,“ — აღნიშნავს „Starring Georgia-ს“ პროექტების მენეჯერი ციცი იაშვილი.