საერთაშორისო სარეიტინგო სააგენტო Fitch Ratings-მა Silk Road Group Holding LLC-ს (Silk Road) მიანიჭა „BB-“ სტაბილური პერპექტივით. რეიტინგი ეფუძნება Silk Road-ის მფლობელობაში არსებულ Silknet-ს, რომელიც საქართველოს სატელეკომუნიკაციო ბაზარზე მეორე უმსხვილეს ოპერატორს წარმოადგენს და მყარ პოზიციებს ინარჩუნებს, ასევე მის პრემიუმ კლასის სასტუმროებისა და კაზინოს საქმიანობას. Fitch-ის შეფასებით, აღნიშნული ბიზნესები ქმნიან მნიშვნელოვან შიდა ფულად ნაკადს, რაც თავის მხრივ, საკმარისი იქნება Silk Road-ის საკუთრებაში არსებულ მიწის ნაკვეთებზე ახალი უძრავი ქონების პროექტების დასაფინანსებლად. 

,,ჩვენ ველით, რომ Silk Road შეინარჩუნებს კორპორატიული მმართველობის მაღალ სტანდარტს, მათ შორის სამეთვალყურეო საბჭოში დამოუკიდებელი დირექტორების წარმომადგენლობის თვალსაზრისით. იმის გათვალისწინებით, რომ Silk Road-ის აქციონერები თავიანთი უმეტესად ერთობლივი აქტივების კონსოლიდაციას სწორედ Silk Road-ში ახორციელებენ, ჩვენ გვჯერა, რომ გარე აქციონერთა პროექტებთან დაკავშირებული რისკი შეზღუდულია. საბოლოოდ, Silk Road უმრავლესობაში ერთი ფიზიკური პირის კონტროლქვეშაა", - წერს საერთაშორისო სარეიტინგო სააგენტო.

საერთაშორისო სარეიტინგო სააგენტო ვარაუდობს, რომ Silknet შეინარჩუნებს ძლიერ კონკურენტული პოზიციებს  სტაბილურ ბაზარზე, სადაც წარმოდგენილია დაახლოებით 5.8 მილიონი მობილური და 1.2 მილიონი საცალო ინტერნეტ-მომხმარებელი. საქართველოში ბაზრის უმეტეს ნაწილს ორი მსხვილი ოპერატორი Magticom და Silknet ფლობს, ხოლო მცირე მოთამაშეები მხოლოდ უმნიშვნელო წილს ინარჩუნებენ. მარეგულირებელის მონაცემებით, 2025 წლის მეორე კვარტალში Silknet-ის ბაზრის წილი შემოსავლების თვალსზრისით მობილური კომუნიკაციების სეგმენტში 35%-ს, ხოლო ფიქსირებული ინტერნეტის საცალო სეგმენტში 34%-ს შეადგენდა.

2025 წლის ივნისში Silknet-მა მოიპოვა მნიშვნელოვანი 5G სიხშირის რესურსი, რითაც წარმატებით აღმოფხვრა მანამდე არსებული სტრატეგიული ნაკლი კონკურენტებთან შედარებით. Fitch-ის შეფასებით, ამ ეტაპზე Silknet პრაქტიკულად თანაბარ პირობებშია კონკურენტებთან სიხშირის რესურსების თვალსაზრისით. 

,,Silk Road აქტიურად გეგმავს უძრავი ქონებისა და დეველოპმენტის სეგმენტებში გაფართოებას, რაც გარკვეულ დივერსიფიკაციის თვალსაზრისით სარგებელს მოუტანს კომპანიას. უძრავი ქონებისა და დეველოპმენტის სფეროში მომუშავე კომპანიებს უფრო მაღალი ლევერიჯის შენარჩუნება შეუძლიათ, ვიდრე სატელეკომუნიკაციო ოპერატორებს. აღნიშნული პროექტები იგეგმება იმ მიწის ნაკვეთებზე, რომლებიც უკვე სრულად Silk Road-ის საკუთრებაშია, რაც ჩვენი შეფასებით ამცირებს შესრულების რისკებს. თუმცა, ახალი უძრავი ქონების დეველოპმენტი ასევე შეიცავს რისკებს მათ შორის, ბაზარზე სუსტი მოთხოვნის მშენებლობის ხარჯების გადაჭარბებისა და დაგვიანების ნაწილში", - წერს საერთაშორისო სარეიტინგო სააგენტო Fitch Ratings-ი. 

საერთაშორისო სარეიტინგო სააგენტო Fitch Ratings-ი ვარაუდობს, რომ Silknet და არსებული ჰოსპიტალითი ოპერაციები გააგრძელებს ძლიერი ფულადი ნაკადების შექმნას, რომლის დიდი ნაწილი დაიხარჯება ახალი  პროექტების განვითარებაში.