ტურისტული კომპანია Traveltime.ge • თრეველთაიმ.ge-ს მაგალითზე, შობა-ახალი წლის პერიოდში დასვენებაზე მაღალი მოთხოვნაა ევროპულ მიმართულებებზე. როგორც Business Insider Georgia-ს Traveltime.ge-ს თანადამფუძნებელმა თაკო მამაიაშვილმა განუცხადა, ევროპული მიმართულებების გარდა წელს შობა-ახალი წლისთვის აქტიურია დუბაი და დოჰა. როგორც ტურისტულ კომპანიაში განმარტავენ, წელს საახალწლოდ ევროპაში დასვენება საშუალოდ 10%-ით არის გაძვირებული.

„ზოგადად, შობა-ახალი წლის პერიოდი ყველაზე დატვირთული პერიოდია ტურისტულ ინდუსტრიაში, და 2025 წელსაც განსაკუთრებულად მაღალი აქტივობა დაფიქსირდა. მოთხოვნა პრაქტიკულად ყველა მიმართულებაზეა, ისევე როგორც 2024 წელს. თუმცა გამოიკვეთა რამდენიმე ქალაქი, რომლებიც შობა-ახალი წლის პერიოდში დასვენებისთვის ლიდერობენ. ისევე როგორც წინა წელს, წელსაც განსაკუთრებული პოპულარობით სარგებლობს პარიზი, როგორც ყველაზე რომანტიკული მიმართულება - სიყვარულის ქალაქი. პრაღა და ბუდაპეშტი მიმართულებებია, სადაც ევროპული საშობაო ბაზრობების და კულტურული ატმოსფეროს გამო მიდიან. წელს ასევე მოთხოვნაა დუბაიზე და დოჰაზე - თბილი კლიმატი და მაღალი ხარისხის სერვისი. დოჰას მიმართულების გააქტიურება წელს გამოიწვია იმ ჩარტერულმა ფრენებმა, რომლებიც თბილისსა და დოჰას შორის დაინიშნა. დოჰაზე წინა წელს ასეთი მაღალი მოთხოვნა არ ყოფილა.

ერთ-ერთი მიმართულება, რაც წელს დაემატა და გახდა საკმაოდ აქტიური, არის ვენეციის მიმართულება. ავიაკომპანია Wizz Air-მა დეკემბრიდან დაამატა ვენეციაში ფრენა და ეს მიმართულებაც საკმაოდ აქტიური გახდა. ვენეციაზე საახალწლოდაც მოთხოვნაა, თუმცა განსაკუთრებული აქტიურობა ვენეციის კარნავალის პერიოდზე შეინიშნება. ასევე აქტიურია ეგვიპტე,  თუმცა უნდა აღინიშნოს, რომ ეგვიპტის მიმართულება ყოველ წელს აქტიურია და წელსაც საახალწლოდ აქვს მოთხოვნა“, - აღნიშნა თაკო მამაიაშვილმა.

Traveltime.ge-ს მეორე თანადამფუძნებელი, ნინი მამაიაშვილის თქმით, საახალწლო პერიოდში პოპულარულია ეგზოტიკური ქვეყნებიც.

„პოპულარულია ეგზოტიკური ქვეყნებიც. მაგალითად, ტაილანდის მიმართულება საკმაოდ პოპულარულია და ასევე შრი-ლანკაც. თუმცა წინასაახალწლო პერიოდში უფრო არჩევენ, რომ ევროპაში წავიდნენ, რადგანაც იქ ძალიან ლამაზი საშობაო ბაზრობებია. თუმცა ვიტყოდი, რომ ტაილანდის მიმართულებაც საკმაოდ აქტიურია. ასევე მოთხოვნაა მალდივებზეც, თუმცა ტაილანდი უსწრებს მოთხოვნის კუთხით. მალდივებზე დასვენებას ძირითადად წყვილები ითხოვენ“, - განმარტავს ნინი მამაიაშვილი.

აღსანიშნავია, რომ ტურისტული კომპანია Traveltime.ge დებმა თაკო და ნინი მამაიაშვილმა დააფუძნეს და ის ბაზარზე 2024 წლიდან ოპერირებს. კომპანია დაკომპლექტებულია გამოცდილი გუნდისგან, რომელიც მაქსიმალურად ზრუნავს საკუთარი მომხმარებლების დამღლელი რუტინის გამრავალფეროვნებასა და გაფერადებაზე, საოცარი ადგილების აღმოჩენით და ბედნიერი მოგონებების შექმნით.