TTE ROOMS ეს არის უნიკალური სათამაშო სივრცე, რომლის ისტორიაც 2021 წლიდან იწყება. ამ პერიოდის განმავლობაში კომპანიამ ბევრი ერთგული მომხმარებელი შეიძინა. 2025 წლის გაზაფხულ-ზაფხულის სეზონი კომპანიისთვის მზარდია. ამის შესახებ, Business Insider Georgia-ს TTE ROOMS-ის დამფუძნებელმა ემილ სარქისიანმა განუცხადა. 

„ჩვენ მუდმივად ვვითარდებით და ვცდილობთ მომხმარებელს უწყვეტად შევთავაზოთ სხვადასხვა სიახლე. აღსანიშნავია, მოთხოვნის ზრდა განსაკუთრებით, 2025 წლის გაზაფხულ-ზაფხულის პერიოდში. მომხმარებლებს ვთავაზობთ უნიკალურ სათავგადასავლო თამაშებს, რომელიც სრულიად ორიგინალური კონცეფციითა და დეკორაციებით გამოირჩევა “, - კომპანიის დამფუძნებელი ემილ სარქისიანი.

TTE ROOMS-ის მომხმარებლების ნაწილი ადგილობრივია,  ნაწილი კი უცხოელი. მოთხოვნა კი სტაბილურად მზარდია. 

„TTE ROOMS-ის სტუმრების 50% ადგილობრივი მაცხოვრებელია, ხოლო 50% ტურისტი, რაც კომპანიის ფართო მიმზიდველობაზე მიუთითებს. მიუხედავად, ბაზარზე არსებული გარკვეული გამოწვევებისა, TTE ROOMS-ში მოთხოვნა სტაბილურად მზარდია. 2024 წლის ზაფხულ-შემოდგომის პერიოდში გაყიდვები 2023 წელთან შედარებით 100%-ით იყო გაზრდილი,  რაც ჯავშნების გაორმაგებას ნიშნავს “, - აცხადებს კომპანიის დამფუძნებელი.

კომპანიის ინფორმაციით, 2025 წლის გაზაფხულ-ზაფხულის პერიოდისთვის კომპანიაში განსაკუთრებულად პოზიტიური დინამიკა ფიქსირდება.

„კერძოდ, მაისისა და ივნისის თვეებში ევროპელი სტუმრების მხრიდან ჯავშნები მნიშვნელოვნად გაიზარდა, რამაც პირდაპირ განაპირობა შემოსავლების ზრდა. გაზაფხულის დადგომასთან ერთად, გააქტიურდა მოთხოვნა ადგილობრივი მოსახლეობის მხრიდანაც, ხოლო ტურისტული ნაკადების ზრდამ ხელი შეუწყო გაყიდვების  მაჩვენებლების ზრდას. მარტისა და აპრილის თვეებიდან უკვე შეინიშნებოდა პოზიტიური დინამიკა უცხოელი სტუმრების წინასწარი ჯავშნების სახით. TTE ROOMS აქტიურად იყენებს საქართველოს ბანკთან თანამშრომლობის შესაძლებლობებს, მათ შორის სტუდენტურ ფასდაკლებებს, CASHBACK-სა და PLUS ქულების აქციებს ციფრული არხების გამოყენებით, რაც მნიშვნელოვნად ზრდის გაყიდვებსა და კომპანიის ცნობადობას “, - აღნიშნავს ემილ სარქისიანი.

კომპანიის მთავარი კონკურენტული უპირატესობა მისი უნიკალურობა და ორიგინალურობაა. სამომავლოდ, TTE ROOMS აქტიურად გეგმავს გაფართოებას.

„TTE ROOMS-ის მთავარი კონკურენტული უპირატესობა მისი უნიკალურობაა, რადგან ყველა თავსატეხი და დეკორაცია ორიგინალურია. ასევე, აღსანიშნავია სათამაშო სივრცის რეალისტურობა და მომსახურების მაღალი ხარისხი (Google-ის შეფასება: 4.9/5). თამაში ხელმისაწვდომია როგორც ქართულ, ასევე ინგლისურ ენაზე, რაც უცხოელი სტუმრებისთვის კომფორტულ გამოცდილებას უზრუნველყოფს და ზრდის განმეორებითი ვიზიტების ალბათობას.

კომპანია აქტიურად მუშაობს გაფართოებასა და ახალი პროექტების განვითარებაზე, მათ შორის ახალი გასართობი ოთახების გახსნაზე. გაყიდვების ზრდისთვის, TTE ROOMS აქტიურად ახორციელებს გარე გასართობ თამაშებს (OUTDOOR) დიდი და ტურისტული ჯგუფებისთვის. თამაშები ტარდება სხვადასხვა გარე სივრცეში, როგორიცაა პარკები, სასტუმროს ტერიტორიები, ოფისების ეზოები და ა.შ, რაც კომპანიას საშუალებას აძლევს, მოემსახუროს უფრო მეტ მომხმარებელს და გააფართოოს თავისი შეთავაზებები, შეამციროს რისკები და გაზარდოს საბაზრო წილი.

ტურისტულ კომპანიებთან პარტნიორობა მიზნად ისახავს უცხოელი სტუმრების მოზიდვას და TTE ROOMS-ის, როგორც უნიკალური სათავგადასავლო პროექტის, არსებობას საქართველოში. კომპანიის ზრდასთან ერთად, ჩვენი უმთავრესი მიზანია შევქმნათ უფრო მეტი სამუშაო ადგილი და დავასაქმოთ მეტი ადამიანი, რაც ხელს შეუწყობს როგორც ჩვენი ბიზნესის, ასევე ადგილობრივი ეკონომიკის განვითარებას. ეს ინვესტიციები და სტრატეგიული ნაბიჯები უზრუნველყოფს TTE ROOMS-ის შემდგომ სტაბილურ ზრდასა და მომგებიანობას “, - განმარტავს კომპანიის დამფუძნებელი.

ცნობისთვის, ESCAPE ROOM- გაქცევის ოთახი, ბევრისთვის ცნობილი, როგორც FORT BOYARD თამაში, მდებარეობს თბილისში, ანდრია ბენაშვილის ქუჩაზე. TTE Rooms - ადგილი, სადაც რეალობა და თამაში ერთიანდება, რათა შეიქმნას დაუვიწყარი თავგადასავალი.