„შატო მუხრანი“ –XIX საუკუნის მეორე ნახევარში ბაგრატიონთა დინასტიის წარმომადგენლის, ივანე მუხრანბატონის მიერ დაარსდა და დღემდე ინარჩუნებს შატოს კლასიკურ კონცეფციას, რომელიც ოთხ ძირითად ფასეულობას ეფუძნება: საკუთარ ვენახებს, მეღვინეობას, ისტორიულ სასახლესა და კულტურულ მემკვიდრეობას.

შატო მდებარეობს ქართლში, სოფელ მუხრანში და პირველი ქართული შატოა, რომელიც ევროპული შატოების მოდელზეა აგებული.

მიმდინარე და სამომავლო გეგმები ტურიზმის განვითარების მიმართულებით

„შატო მუხრანი“ მუდმივად ნერგავს ახალ ტურისტულ ინიციატივებს. როგორც ტურიზმის დეპარტამენტის ხელმძღვანელმა, თამარ ბუაძემ Business Insider Georgia-სთან ინტერვიუში განაცხადა:

„2025 წლის მეორე ნახევარში ვგეგმავთ ახალი მასშტაბური პროექტის განხორციელებას, რომელიც ტურისტული ინფრასტრუქტურის განვითარებასა და ვიზიტორთა ნაკადის ზრდას მოემსახურება. პროექტის დასრულება 2027 წლისთვის იგეგმება.“

მრავალფეროვანი ტურისტული სერვისები და გამოცდილებები

„შატო მუხრანის“ ყოველდღიური შეთავაზებები მოიცავს ისტორიულ ტურებს, ღვინის დეგუსტაციებს, ღვინის დეგუსტაციის მასტერკლასებს, კულინარიულ აქტივობებს, რომელთაც დიდწილად უცხოელი სტუმრები ირჩევენ. სტუმრები თავად ამზადებენ ტრადიციულ ქართულ კერძებს შატოს პროფესიონალ შეფებთან ერთად.

ამ ეტაპზე შატოს ტერიტორიაზე განთავსებულია ორი რესტორანი:

• „ორანჟერია“ – ულამაზესი სივრცე, რომელიც მრავალფეროვან ღონისძიებებს მასპინძლობს
• „სამეფო მარანი“ – რესტორანი, რომელიც ქართულ, ადგილობრივ კერძებს სთავაზობს სტუმრებს.

ღონისძიებები „შატო მუხრანის“ ერთ-ერთი მთავარი მიმართულებაა – როგორც კერძო, ასევე კორპორატიული, ბიზნეს და MICE ტურიზმის ღონისძიებები რეგულარულად იმართება.

ვიზიტორთა პროფილი და მოთხოვნების დინამიკა

„შატო მუხრანის“ ტურისტული სერვისები თანაბრად პოპულარულია როგორც ადგილობრივ, ისე უცხოელ სტუმრებს შორის.

„ისტორიული ტურების, ღვინის დეგუსტაციისა და კულინარიული მასტერკლასების შემთხვევაში სტუმართა უმრავლესობა საერთაშორისო ვიზიტორია. ხოლო ღონისძიებების მიმართულებით განაწილება დაახლოებით ასე გამოიყურება – 60% ადგილობრივი სტუმრები, 40% უცხოელი“, - აცხადებს თამარ ბუაძე.

უცხოელი სტუმრების გეოგრაფია თანხვედრაშია საქართველოს ტურიზმის საერთო ტენდენციებთან – ტრადიციული ბაზრების გარდა, მზარდია ინტერესი აღმოსავლეთის და გალფის ქვეყნების მხრიდან. წელს ინდოეთიდან მოთხოვნა განსაკუთრებით მზარდია.

„შატო მუხრანში“ ამ ეტაპზე 23 სახეობის ღვინო და მაღალალკოჰოლური სასმელი ჭაჭა იწარმოება.

„ღვინის შერჩევა სეზონისა და სტუმრის მიერ არჩეული პაკეტის მიხედვით მიმდინარეობს – ცივ სეზონზე მეტად მოთხოვნადია წითელი ღვინო, ხოლო თბილ ამინდში მეტი ყურადღება თეთრ და ვარდისფერ ღვინოებზეა გადატანილი“, - განმარტავს თამარ ბუაძე.

მაღალი სეზონი და 2025 წლის მოლოდინები

„შატო მუხრანისთვის“ მაღალი ტურისტული სეზონი მაისიდან ოქტომბრის ბოლომდე გრძელდება.

თამარ ბუაძის შეფასებით, „2025 წელი, როგორც დაგეგმილი ღონისძიებების, ასევე ვიზიტორების თვალსაზრისით, საკმაოდ დატვირთული და აქტიური იქნება. გვაქვს მოლოდინი, რომ ეს წელი მეტად პოზიტიური და წარმატებული იქნება ჩვენი მიმართულებისთვის“.