ფუდ ალიანსი • Food Alliance ბაზარს ახალ პროდუქტებს სთავაზობს. როგორც Business Insider Georgia-სთან საუბარში კომპანიის გენერალურმა დირექტორმა, ვახტანგ კოხრეიძემ განაცხადა, კომპანია წარმოების გაფართოებასთან ერთად ასორტიმენტსაც ზრდის. სულ ახლახან Food Alliance-მა ბაზარს სენდვიჩის პურების ახალი მიმართულება შესთავაზა, რომელიც უკვე საკმაოდ მოთხოვნადი გახდა.

„ახალი მიმართულებით დავიწყეთ განვითარება და ბაზარს სენდვიჩის პურები შევთავაზეთ. პროდუქცია სპეციალურ, თანამედროვე დანადგარებზე იწარმოება და მზადდება მაღალი ხარისხის ინგრედიენტებით. ასორტიმენტში წარმოდგენილია სხვადასხვა სახეობა: პროტეინ-მიქსი, იტალიური მიქსი, მარცვლოვანი მიქსი, კლასიკური, ჩიაბატა, ცეხვილი და სხვა,“ - აცხადებს ვახტანგ კოხრეიძე.

კომპანიის გენერალური დირექტორის თქმით, პურების ახალი მიმართულების ძირითადი მომხმარებლები არიან ადამიანები, რომლებიც უპირატესობას ჯანმრთელობისთვის სასარგებლო პროდუქტებს ანიჭებენ.

„ბაზარზე ჩვენს ახალ პროდუქტებზე მოთხოვნა იზრდება. ჩვენი მომხმარებლები ძირითადად ის ადამიანები არიან, ვინც ლანჩზე ფრეშ-სენდვიჩებს ანიჭებს უპირატესობას. ამ ეტაპზე ოთხი სახეობის სენდვიჩის პური გვაქვს, თუმცა მომავალში სხვადასხვა ვარიაციის დამატებასაც ვგეგმავთ,“ – აღნიშნავს კომპანიის გენერალური დირექტორი.

Food Alliance მომხმარებლებისთვის ახალი პროდუქტების შეთავაზებას მუდმივ რეჟიმში აგრძელებს. კომპანიამ ასორტიმენტს ქართული ტრადიციული პროდუქტების მენიუ გაამრავალფეროვნა და ახალი პროდუქტები დაამატა.

„კიდევ ერთი სიახლე ის არის, რომ ქართული წარმოშობის პროდუქციის ასორტიმენტი გავზარდეთ. მათ შორისაა იმერული ხაჭაპური, გურული ღვეზელი, ლობიანი და სხვა,“ – აცხადებს ვახტანგ კოხრეიძე.

შ.პ.ს „ფუდ ალიანსი“ 2019 წელს დაარსდა წარმოებისა და ბიზნესის განვითარების სფეროში მრავალწლიანი გამოცდილების მქონე ქართველი და ფრანგი პარტნიორების მიერ. კომპანია სპეციალიზებულია მაღალი ხარისხის გაყინული საკონდიტრო ნაწარმის წარმოებაში.

„ფუდ ალიანსის“ პროდუქცია აერთიანებს როგორც ფრანგული, ისე ქართული ტრადიციებით შთაგონებულ ინოვაციურ რეცეპტებს. კომპანიის პროდუქციის გამორჩეული გემოვნური თვისებები განპირობებულია საერთაშორისო სტანდარტების შესაბამისი ხარისხითა და პრემიუმ კლასის ინგრედიენტების გამოყენებით.

კომპანია თანამშრომლობს საქართველოსა და ევროპის წამყვან მომწოდებლებთან. განსაკუთრებით აღსანიშნავია კრუასანის წარმოებისთვის გამოყენებული ფრანგული ნედლეული, რომელიც პროდუქტის მაღალი ხარისხისა და განსაკუთრებული გემოს ერთ-ერთი მთავარი საფუძველია.

„ფუდ ალიანსის“ ძირითადი მომხმარებლები არიან საცალო სავაჭრო ობიექტები, სასტუმროები, კაფეები, ბარები, რესტორნები და ქსელური მარკეტები.