ნამახვანი, ნენსკრა, ხუდონი უნდა აშენდეს, სამივე ძალიან მნიშვნელოვანი პროექტია. უბრალოდ, ამ მოცემულობაში და რეალობაში ყველაზე რეალისტური არის ხუდონის მშენებლობა, - ამის შესახებ Business Insider Georgia-სთან განახლებადი ენერგიების განვითარების ასოციაციის (GREDA) აღმასრულებელმა დირექტორმა, მაია მელიქიძემ განაცხადა. მისი განმარტებით, ხუდონის პროექტის განხორციელება უნდა მოხდეს სწრაფად. მაია მელიქიძის თქმით, სასურველი იქნება, რომ პროექტი სახელმწიფო და კერძო სექტორის ერთობლივი ჩართულობით განხორციელდეს.

„აქედან გამომდინარე, გადამწყვეტი როლი ეხება ახლა პირველი ნაბიჯების გადადგმას ჰიდროელექტროსადგურების მშენებლობასთან დაკავშირებით და ძალიან კრიტიკულია ჩვენთვის, რომ ეს ნაბიჯები დავიწყოთ სწორედ ხუდონიდან, ვინაიდან ნამახვანს და ნენსკრას თავისი გამოწვევები აქვს.

ამიტომ პირველი, რაც უნდა გაკეთდეს, არის ხუდონის მშენებლობის დაწყება და ეს უნდა მოხდეს ძალიან სწრაფად. რა თქმა უნდა, მნიშვნელოვანი არის, რომ ინვესტორმა უზრუნველყოს თანხის ჩადება ხუდონის მშენებლობაში, თუმცა ვინაიდან ქვეყანას აქვს ძალიან მნიშვნელოვანი გამოწვევა ელექტროენერგიის დეფიციტთან და თვითკმარობასთან დაკავშირებით, მოხმარების ზრდას გენერაცია ვერ აკმაყოფილებს, ამიტომ სასურველი იქნება, რომ სახელმწიფო და კერძო სექტორი ერთად ჩაერთოს ამ პროექტის მშენებლობაში. მნიშვნელოვანია, რომ ეს არ მოხდეს გადასახადის გადამხდელების ხარჯზე, ანუ ქვეყნის ბიუჯეტმა არ უზრუნველყოს პროექტის დაფინანსება ისე, რომ ბიუჯეტი დაზარალდეს.

ამ მოცემულობის გათვალისწინებით, ცალსახად მნიშვნელოვანია კიდევ ერთი ნაბიჯის გადადგმა - გრძელვადიანი სარგებლის მიღებასთან დაკავშირებული კანონპროექტის მიღება, რომელიც ყველა გზით უზრუნველყოფს იმას, რომ ადგილობრივი მოსახლეობა არ გამოირჩეოდეს პროტესტით და თითოეულმა ადამიანმა იგრძნოს ის სარგებელი, რომელიც ახლავს ენერგეტიკის განვითარებას, ქვეყნის პროგრესს და ეკონომიკურ დოვლათს“, - აცხადებს მელიქიძე.

დღეს ცნობილი გახდა, რომ „ხუდონჰესის“ პროექტი შესაძლოა სახელმწიფოს თანამონაწილეობით განხორციელდეს,

დღეს არ არის გამოკვეთილი არც ერთი კონკრეტული ინვესტორი, რომელზეც შეიძლება ითქვას, რომ ის იქნება დაკავებული „ხუდონჰესის" პროექტით, დღეს ეკონომიკის სამინისტრო უშუალოდ ამუშავებს ამ პროექტს, მათ შორის იმისათვის, რომ გაამზადოს წინადადებები ინვესტორებისთვის, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

როგორც მთავრობის მეთაურმა აღნიშნა, „ხუდონჰესი" არის ერთ-ერთი უმნიშვნელოვანესი სტრატეგიული პროექტი, რომელიც მაქსიმალურად სწრაფი ტემპით განხორციელდება.

„დღეს არ არის გამოკვეთილი არც ერთი კონკრეტული ინვესტორი, რომელზეც შეიძლება ითქვას, რომ ის იქნება დაკავებული „ხუდონჰესის" პროექტით. დღეს ეკონომიკის სამინისტრო უშუალოდ ამუშავებს ამ პროექტს, მათ შორის იმისათვის, რომ გაამზადოს წინადადებები ინვესტორებისთვის. ეს არის დღევანდელი მდგომარეობა. ეს არის ერთ-ერთი უმნიშვნელოვანესი სტრატეგიული პროექტი, რომელიც მაქსიმალურად სწრაფი ტემპით განხორციელდება. ეს არის ეკონომიკის სამინისტროს ერთ-ერთი დავალება, რაზეც აქტიურად მუშაობს ეკონომიკის სამინისტროს მთელი გუნდი, მათ შორის პირველ რიგში ენერგეტიკის სფეროში მომუშავე გუნდი", - განაცხადა პრემიერ-მინისტრმა.

კითხვაზე, „ხუდონჰესს" სახელმწიფო ააშენებს თუ ინვესტორი, პრემიერ-მინისტრმა აღნიშნა, რომ ეს საკითხი უნდა გადაწყდეს მოლაპარაკებების საფუძველზე პოტენციურ ინვესტორებთან.

„ჩვენ არ გამოვრიცხავთ სახელმწიფოს თანამონაწილეობასაც ამ პროექტის განხორციელებაში, ფინანსურ ნაწილს ვგულისხმობ", - განაცხადა ირაკლი კობახიძემ.