სილქ ჰოსფითალითი და სილქნეტი ქართველი ხელოვანების მხარდაჭერას განაგრძობს და ამჯერად რადისონ ბლუ თბილისში მხატვარ თუთუ კილაძის გამოფენას წარადგენს.

თუთუ კილაძის შემოქმედება მკვეთრად გამოხატული ინდივიდუალიზმითა და სახასიათო ხელწერით ხასიათდება. თავად მხატვარი საკუთარ ნამუშევრებს რომელიმე კონკრეტულ სტილს არ მიაკუთვნებს, ცდილობს მრავალფეროვანი იყოს და სხვადასხვა მასალა მოსინჯოს. ძირითადად, ზეთის საღებავებით ხატავს, თუმცა ფერადი ფანქრების, გუაშებისა და აკვარელების გარდა კერამიკაზე მუშაობაც სცადა. თუთუს ფერწერული ტილოები ნოველებს წააგავს, რომლებიც ზღვისპირა ქალაქების, ლურჯი ტალღებისა და მათზე მოქანავე გემების, ფერადი მინდვრების, აყვავებული ხეების, მოციმციმე აუზების, უცნაური ადამიანებისა და ზღაპრული ცხოველების შესახებ მოგვითხრობენ.

“რადისონ ბლუ ივერიას საგამოფენო სივრცეში გამოფენილია ჩემ მიერ სხვადასხვა დროს შესრულებული ფერწერა და კერამიკული ფილები. ძალიან მიყვარს ზღვა და ხშირად ვიმეორებ ამ თემატიკას ჩემს ნახატებში. ასევე ნახავთ ფილებს - ნაწილი ვეხისტყაოსნიდანაა, რომლის ილუსტრაციაც დამატებით გავაკეთე და იმედია წიგნიც მალე გამოვა. ინსპირაციას ყოველდღიურობისგან ვიღებ - ურთიერთობებისგან, სეირნობისგან... ხატვას პირდაპირ ფერით ვიწყებ და მერე საითაც წამიყვანს განწყობა, მივყვები. პროცესში ყოველთვის რაღაცას აღმოვაჩენ. რაც შეეხება კერამიკას, ბევრად საინტერესო პროცესია, რადგან არ იცი საბოლოო შედეგი რა იქნება- სიურპრიზივითაა. ამ საგამოფენო სივრცეში დახრილი კედლებია და ესეც თავისებურობას მატებს გამოფენილ ნამუშევრებს. თითქოს ნახატები ჰაერშია ჩამოკიდებული, შესაბამისად, მსუბუქი და ლამაზი ექსპოზიცია გამოვიდა.“ - თუთუ კილაძე, მხატვარი.

“თუთუს ხელწერა, სტილი გამორჩეულია და თითქმის ყოველთვის გახვედრებს, ვის ეკუთვნის ნახატი. ჩვენ მუდმივად ვეძებთ საინტერესო მხატვრებს, რათა უცხოელი სტუმრებისთვის ჩვენი სასტუმროების სივრცეებში ქართული მხატვრობა გავაცოცხლოთ. ვფიქრობ, თუთუ ერთ-ერთი გამორჩეული ქართველი მხატვარია და მისი გამოფენაც მრავალფეროვნებითა და განსაკუთრებული ფერებით გამოირჩევა.” - მარიამ კაკაბაძე, სილქ ჰოსფითალითის არტ კურატორი.

თუთუ კილაძის ნამუშევრები რადისონში 20 აპრილიდან 15 ივნისის ჩათვლით იქნება წარმოდგენილი. სილქნეტისა და სილქ ჰოსფითალითის თანამშრომლობით, თბილისისა და წინანდლის საექსპოზიციო სივრცეები სისტემატიურად ეთმობა ქართველი არტისტების შემოქმედებას. სასტუმრო რადისონში გასულ წლებში ლევან ჭოღოშვილისა და ზურა აფხაზის ნამუშევრები გამოიფინა.