Green Steps • გრინ სთეფს - გარემოსდაცვითი საკონსულტაციო კომპანიაა, რომელიც ბიზნესებს სთავაზობს სრულფასოვან მომსახურებას გარემოს დაცვის მიმართულებით. კომპანიის აღმასრულებელი დირექტორი, ქრისტინა კოროშინაძე, Business Insider Georgia-სთან ინტერვიუში განიხილავს ერთ-ერთ ყველაზე მნიშვნელოვან საკითხს დღევანდელი ბიზნესისთვის როგორიც არის ბიზნესის მხრიდან გარემოსდაცვითი პირობების შესრულება.

როგორც ვიცით, გარემოზე ზემოქმედების შეფასება ბიზნესისთვის მხოლოდ პირველი ეტაპია. როცა კომპანია მიიღებს გარემოსდაცვით გადაწყვეტილებას რა ხდება შემდეგ? რა ნაბიჯები უნდა გადადგას ბიზნესმა, რომ საქმიანობა კანონთან შესაბამისობაში განაგრძოს?

გარემოსდაცვითი შეფასების კოდექსით გათვალისწინებულ საქმიანობებზე, სსიპ გარემოს ეროვნული სააგენტო გასცემს გარემოსადაცვით გადაწყვეტილებას. ეს გადაწყვეტილება ბიზნესისთვის არ ნიშნავს დასრულებულ პროცესს, არამედ პირიქით, ეს არის ახალი ეტაპის დასაწყისი, რაც ნიშნავს იმას, რომ ნებართვის აღების შემდეგ ბიზნესი უნდა მიჰყვეს იმ პირობების შესრულებას, რაც ბრძანებით განესაზღვრება მას. პირობების რაოდენობა და თემატურობა აბსოლუტურად ინდივიდუალურია პროექტის შინაარსიდან გამომდინარე. ამიტომ, წინასწარ ვერ ვიტყვით რომელიმე პროექტზე, რა სახის ან რა შინაარსის პირობები შესაძლოა დაადგინოს სააგენტომ.

რა სახის პიროებებზეა საუბარი და რატომ არის მათი შესრულება კრიტიკულად მნიშვნელოვანი ბიზნესისთვის?

პირობები მოიცავს ვალდებულებებს, რომელიც კონკრეტული დროის პერიოდში უნდა შეთანხმდეს სააგენტოსთან. პირობის წარდგენის/შეთანხმების ვადას თავად სააგენტო განსაზღვრავს. პირობებს რაც შეეხება, შესაძლოა პირობა ეხებოდეს გარემოსდაცვითი მონიტორინგის ჩატარებას, ნარჩენების მართვის გეგმის შემუშავებას, სხვადასხვა გარემოსდაცვითი კვლევების ჩატარებას, ბიომრავალფროვნების კომპენსაციის ღონისძიებების შესრულებას, მათ შორის, უსაფრთხოების ზომების დაცვა და ა.შ. შესაბამისად, შეგვიძლია ვთქვათ რომ პირობები ადგენს იმ „წითელ ხაზებს“, რომელთა ფარგლებშიც უნდა იმუშაოს კომპანიამ, ისე რომ ზემოქმედება გარემოზე დარჩეს დასაშვებ ფარგლებში ან იყოს მინიმალური.

ვინ აკონტროლებს, ასრულებს თუ არა კომპანია გაცემული გადაწყვეტილების პირობებს? და რა შედეგი მოჰყვება პირობების შეუსრულებლობას?

კომპანიის ვალდებულებების შესრულების კონტრიოლს, საქართველოს გარემოს დაცვისა და სოფლის მეურნეობის სამინისტროს ერთ-ერთი სიპი - გარემოსდაცვითი ზედამხედველობის დეპარტამენტი უზრუნველყოფს. აღნიშნული დეპარტამენტი ახორციელებს ინსპექტირებებს პერიოდულად. დარღვევების გამოვლენის შემთხვევაში ინსპექციას შეუძლია დააწესოს სანქცია ფულადი სახით ან შეაჩეროს საქმიანობა მანამ სანამ პირობები არ შესრულდება, გააჩნია რა სიმძიმის დარღვევასთან გვაქვს საქმე. განსაკუთრებულ შემთხვევებში, კომპანიას ეკისრება ასევე გარემოს მიყენებული ზიანის ანაზღაურება. ამიტომ მნიშვნელოვანია რომ ყველა პირობა შესრულდეს დროულად და დოკუმენტურად იყოს დადასტურებული.

აქვე, შეგვიძლია ხაზი გავუსვათ როგორ ჩანს ინვესტორის მხრიდან პირობების შეუსრულებლობის ნაწილი. გარემოსდაცვითი პირობები თუ არ სრულდება,
ინვესტორი აწყდება დამატებით ფინანსურ ხარჯებს მაგალითად: ჯარიმებს, იძულებით სამუშაოს შეჩერებას ან ხელახალ ექსპერტიზას, რაც საბოლოო ჯამში დამატებით ფინანსებთან ასოცირდება. შესაბამისად, პირობების სრულყოფილი შესრულება ქმნის სამართლებრივ დაცულობას, ამცირებს გაუთვალისწინებელ ხარჯებს და უზრუნველყოფს პროექტის უწყვეტ მიმდინარეობას, რაც ინვესტორისთვის პირდაპირ ნიშნავს დროის და ფინანსების დაზოგვას.

შეუძლია თუ არა კომპანიას პირობების შეცვლა ან გადახედვა?

რა თქმა უნდა შეუძლია. სამინისტროს მიერ განსაზღვრული პირობა კი არის სავალდებულო ბიზნესისთვის შესასრულებად, მაგრამ თუ პროექტში განხორციელდა ტექნოლოგიური სახის ცვლილება, დიზაინის ცვლილება ან ა.შ რაც კავშირშია რომელიმე პირობასთან, კომპანია უფლებამოსილია შესაბამისი დასაბუთებით, მიმართოს გარემოს ეროვნულ სააგენტოს ცვლილებების თაობაზე.

რა არის საკონსულტაციო კომპანიების როლი გარემოსდაცვითი გადაწყვეტილების შემდგომ ეტაპზე?

ჩვენი როლი ვფიქრობ არის ძალიან მნიშვნელოვანი და საინტერესო, რადგან ჩვენ არ ვწყვეტთ ურთიერთობას დამკვეთთან ნებართვის აღების შემდგომაც. გარემოსდაცვითი გადაწყვეტილების გაცემის შემდგომ, ჩვენი მთავარი ამოცანაა, რომ ბიზნეს გავუწიოთ კვალიფიციური კონსულტაცია პირობების კონკრეტულ ტექნიკურ ნაბიჯებად გარდაქმნაში, რათა თავიდან აიცილოს სამართლებრივი და რეპუტაციული რისკები.