„წნული“ მომხმარებელს ხელნაკეთი კალათების მრავალფეროვან ასორტიმენტს სთავაზობს. ამის შესახებ, Business Insider Georgia - ს სოციალური საწარმო „წნულის“ დამფუძნებელმა დავით პარკაძემ განუცხადა.

შევიძინეთ ლაზერული დანადგარი, რომლის მეშვეობით სამუშაო პროცესი მნიშვნელოვნად გამარტივდა და დაჩქარდა. ჩვენი მთავარი მიზანიც სწორედ ეს იყო - შეგვექმნა პროდუქტი, რომელიც სწრაფად მზადდება და ამავდროულად ინარჩუნებს ხარისხსა და ესთეტიკას.
პროდუქცია გადავიყვანეთ ხის ძირზე, რაც გულისხმობს, რომ კალათები შესრულებულია ხისა და წნულის კომბინაციით - ძირი არის ხის, ხოლო დანარჩენი ნაწილი მოქსოვილია წნულისგან. შედეგად, პროდუქტი გამოდის უფრო მყარი, ფორმაში სწორად დაცული და ვიზუალურად გამორჩეული.

დღესდღეობით განსაკუთრებით გაიზარდა მოთხოვნა მსგავსი ტიპის პროდუქციაზე, რადგან მომხმარებლისთვის სულ უფრო მნიშვნელოვანი ხდება სხვადასხვა პროდუქტის როგორც ესთეტიკურად, ისე პრაქტიკულად განთავსება.

ვთანამშრომლობთ არაერთ კომპანიასთან - არა მხოლოდ სააღდგომო პერიოდში, არამედ მთელი წლის განმავლობაში. განსაკუთრებით აქტიურია თანამშრომლობა პურ-ფუნთუშეულის მწარმოებლებთან და იმ ბიზნესებთან, რომლებიც კალათებს ბოსტნეულისა და სხვა პროდუქციისთვის იყენებენ. ამ მიმართულებით, ვთანამშრომლობთ ჰიპერმარკეტების ქსელ „გუდვილთან“, „სუპერმარკეტ საბურთალოსთან“ და სხვა მსხვილ კომპანიებთან.

ამჟამად, ჩვენს ასორტიმენტში წარმოდგენილია როგორც ინდივიდუალური კალათები, ასევე სამეული კომპოზიციები. გვაქვს სხვადასხვა ფორმა: მრგვალი, ოთხკუთხედი და მართკუთხედი, სადაც მარტივად თავსდება სააღდგომო კვერცხები, პასკები და სხვა პროდუქტები.

კალათები გამოირჩევა როგორც პრაქტიკულობით, ისე ესთეტიკით, რაც მათ იდეალურ არჩევანად აქცევს როგორც საჩუქრისთვის, ისე სადღესასწაულო სუფრისთვის.
ფასი იწყება 19 ლარიდან, სამეული კალათების ღირებულება 150–200 ლარის ფარგლებში მერყეობს. კორპორატიული შეკვეთების შემთხვევაში, ფასი რაოდენობის მიხედვით იცვლება.

მოთხოვნა მუდმივად მაღალია. ახალი პროდუქციის გამოშვებისას კი განსაკუთრებით მატულობს “, - აცხადებს დავით პარკაძე.

ინფორმაციისთვის, სოციალური საწარმო „წნული“ 2017 წელს შეიქმნა.