Bekauri Family Vineyards საოჯახო მეღვინეობაა. მიმდინარე წელს კომპანიამ საექსპორტო მიმართულება გააფართოვა და ღვინო რუსეთისა და ევროპის რამდენიმე ქვეყნის ბაზრებზე გაიტანა. პარალელურად, გეგმავს ასორტიმენტის განახლებასა და ახალი პროდუქტების, მათ შორის ცქრიალა ღვინისა და ჭაჭის დამატებას. კომპანიის საქმიანობის, 2026 წლის რთველისა და სამომავლო გეგმების შესახებ Business Insider Georgia-ს Bekauri Family Vineyards-ის დამფუძნებელი ანზორ ბექაური ესაუბრა.

როგორ შეაფასებთ 2026 წლის რთველს? როგორი იყო ყურძნის მოსავლის ხარისხი და რაოდენობა წინა წელთან შედარებით და რა გავლენას მოახდენს მიღებული მოსავალი ღვინის წარმოებაზე?

2026 წლის რთველს დადებითად შევაფასებდით. მოსავლის ხარისხი ნორმალური იყო და წინა წელთან შედარებით უკეთესი შედეგი მივიღეთ. ყურძნის ნაწილი გავყიდეთ, ნაწილი კი საკუთარ მარანში გადავიტანეთ და ღვინის წარმოებისთვის გამოვიყენეთ.

როგორია თქვენს მიმდინარე ასორტიმენტზე მოთხოვნა და რა სიახლეებს უნდა ელოდონ მომხმარებლები? გეგმავთ თუ არა ახალი პროდუქციის დამატებას?

ამ ეტაპზე ახალ პროდუქტებზე ვმუშაობთ. ვგეგმავთ ცქრიალა ღვინის წარმოებას, რომლის გამოშვებასაც მომავალ წელს შევძლებთ. ასევე, ასორტიმენტს დავამატებთ ჭაჭას. პარალელურად, ახალი ბრენდის შექმნაზეც ვმუშაობთ, რომლის წარდგენასაც დაახლოებით 2-3 წელიწადში ვგეგმავთ.

როგორ ვითარდება კომპანიის გაყიდვები ადგილობრივ და საერთაშორისო ბაზრებზე? რომელ ქვეყნებშია ამჟამად წარმოდგენილი თქვენი პროდუქცია და რა მიმართულებით აფართოებთ საექსპორტო საქმიანობას?

წელს პირველად განვახორციელეთ ღვინის ექსპორტი რუსეთში და ამ ეტაპზე სწორედ ამ ბაზარზე ვართ ორიენტირებული. ამასთან, ევროპაში გავხსენით საწყობი.  ჩვენი პროდუქცია უკვე იყიდება ავსტრიაში, ესპანეთსა და პოლონეთში. ამჟამად დამატებით ღვინის ექსპორტზეც ვმუშაობთ.

რა არის კომპანიის განვითარების მთავარი პრიორიტეტი მომდევნო პერიოდში და რა გეგმები გაქვთ წარმოებისა და პროდუქციის მიმართულებით?

მომდევნო პერიოდში ჩვენი მთავარი ფოკუსი ასორტიმენტის გაფართოება იქნება. ვგეგმავთ ახალი პროდუქტების დამატებას და ამ მიმართულებით განვითარებას.

ინფორმაციისთვის, საწარმო ახმეტაში, ზემო ხოდაშენში მდებარეობს. კომპანია სტაბილურად 10 ადამიანს ასაქმებს. რთველის პერიოდში კი დასაქმებულთა რაოდენობა მნიშვნელოვნად იზრდება.