ვისაც აინტერესებს კვების სფერო, მათთვის ძალიან კარგი შანსია და სამომავლოდ აუცილებლად უნდა მიიღონ მონაწილეობა „გემო ფესტში“, - აცხადებს გურიაში გამართული „გემო ფესტის“ ერთ-ერთი მონაწილე მარეხი გობრონიძე, რომელიც ფესტივალში „მასპინძლის“ სახელით იღებდა მონაწილეობას.

„მასპინძელი“ სპეციალურად „გემო ფესტისთვის“ შექმნილი ბრენდია და მარეხი გობრონიძე არ გამორიცხავს, რომ მან სამომავლოდაც გააგრძელოს არსებობა. მით უმეტეს, რომ მას წინ დიდი გზა და გეგმები აქვს. 

„გემო ფესტში“ მონაწილეობას პირველად ვიღებდი და ეს მართლაც ძალიან დიდი გამოცდილება იყო ჩემთვის. პირველი დღე ცოტა ემოციურიც კი იყო, თუმცა მეორე დღე ჩემთვის შედარებით მშვიდი იყო. 

კერძების წარდგენისას მაქსიმალურად შევინარჩუნეთ გურული გემოები და ვიზუალი შეუცვალეთ კერძებს. ჩვენთან მოსულ სტუმრებს ვთავაზობდით გურულ ხვეულას - ქათმის ხორცით და გურული სუნელით და ასევე ღორის ხორცით და გურული სუნელით - ოხრახუშის ლაქტოზინათი და ცოცხალი კიტრით. ასევე გვქონდა მეორე კერძი, გურული ღვეზელი. ეს იყო მოდერნიზებული ვერსია, მწყრის კვერცხით, რომელიც შესუნელებული იყო გურულ სუნელში. პროდუქტს გარედან აკრავს სულგუნის ბრაწულა და ჩადებულია ყველია სოუში.

საბოლოო გემოების მისაღებად, „გემო ფესტის“ სამზადისში აქტიურად ვითანამშრომლეთ შეფებთან..

მე სტუდენტი ვარ, ვსწავლობ კულინარიაზე და „გემო ფესტში“ მონაწილეობა ჩემთვის მართლა ძალიან დიდი გამოცდილება იყო. სამომავლოდ მინდა, რომ ჩემი კვების ობიექტი გავხსნა. სახელი „მასპინძელი“ ძალიან მომწონს, ვნახოთ.

ვისაც აინტერესებს კვების სფერო, მათთვის ძალიან კარგი შანსია და აუცილებლად უნდა მიიღონ მონაწილეობა „გემო ფესტში“, - აცხადებს მარეხი გობრონიძე.

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფმზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.