ბიოლოგიურად აქტიური დანამატი, სამკურნალო წყალი Normox, მალე მომხმარებლისთვის ონლაინ პლატფორმაზეც გახდება ხელმისაწვდომი. ბრენდს მცირე მეწარმე „რაჭა“ აწარმოებს, რომლის დამფუძნებელმა და დირექტორმა ბესიკ კაციტაძემ Business Insider Georgia-სთან საუბრისას აღნიშნა, რომ პროდუქტზე მოთხოვნა სტაბილურად იზრდება.

აღსანიშნავია, რომ Normox-ის რეალიზაცია უკვე წარმატებით მიმდინარეობს ფიტნეს დარბაზებშიც, რაც მის მიმართ სპორტული და ჯანსაღი ცხოვრების წესით დაინტერესებული პირების მაღალ ინტერესზე მიუთითებს.

„წარმოდგენილები ვართ ფიტნეს დარბაზებში და გაყიდვებიც სტაბილურად მზარდია. რეალურად თვიდან თვემდე გაყიდვები 5%-იან ზრდას აჩვენებს“, - აღნიშნავს ბესიკ კაციტაძე.

Normox-ის სამომავლო გეგმებში პროდუქციის სააფთიაქო ქსელებში რეალიზაცია შედის, რაც, სავარაუდოდ, სამკურნალო წყალზე მოთხოვნის კიდევ უფრო ზრდას გამოიწვევს. თუმცა, ამ ეტაპზე მწარმოებლისთვის გაზრდილი მოთხოვნის სრულად დაკმაყოფილება გარკვეულ სირთულეებთან არის დაკავშირებული.

ამჟამად Normox-ის ჩამოსხმა სხვის ქარხანაში მიმდინარეობს, რაც დამატებით დროსა და რესურსებს მოითხოვს. წარმოების პროცესის ოპტიმიზაციისა და სტაბილური მიწოდების უზრუნველსაყოფად, კომპანიას საკუთარი საწარმოო ხაზის აწყობა და დამოუკიდებელი წარმოების დაწყება სურს. ამ მიზნის მისაღწევად ბრენდი ახლა საჭირო ფინანსური რესურსების მოძიებაზე მუშაობს.

„როდესაც ჩამოსხმას 22 დღე ელოდები, რთულია. პროდუქტის რეკლამირება რომ დავიწყო და ახალ ობიექტებში შევიდე, მოთხოვნა მკვეთრად გაიზრდება, რის მიწოდებასაც ოპერატიულად ვერ უზრუნველყოფთ. სწორედ ამიტომ, ჩვენი მთავარი მიზანი საკუთარი საწარმოო ხაზის მოწყობაა, რისთვისაც ამჟამად გრანტის მოპოვებაზე ვმუშაობთ“, - აცხადებს ბესიკ კაციტაძე.

საკუთარი წარმოების დაწყება ბიზნესს საშუალებას მისცემს სრულად აითვისოს ბაზრის პოტენციალი და მომხმარებელს სამკურნალო წყალი შეუფერხებლად მიაწოდოს.

ამჟამად Normox-ის ჩამოსხმა ხორციელდება 0,5 და 5 ლიტრიან ბოთლებში. პროდუქციის შეძენა დღეისათვის თბილისში სამი ლოკაციიდან არის შესაძლებელი, საუბარია უბნის მაღაზიებზე.

Normox ბიოლოგიურად აქტიური დანამატი სამკურნალო წყალია, რომელიც აძლიერებს იმუნიტეტს, ნორმალიზებს ორგანიზმში ჟანგბადს, ამაღლებს სატურაციას და ხსნის დაღლილობას.

ყველა დანარჩენი ჟანგბადიანი წყლისგან განსხვავებით, Normox არ შეიცავს ჟანგბადის გამომყოფ ნივთიერებებს (ზეჟანგებს) და სტაბილიზატორებს. პროდუქტი შედგება გამოხდილი წლისა და მასში გახსნილი ჟანგბადისგან (არანაკლებ 20 მგ/ლ). იგი ნორმალიზებას უკეთებს სისხლში ჟანგბადის რაოდენობას, ხელს უწყობს სისხლში შაქრისა და არტერიული წნევის რეგულირებას, აჩქარებს გამოჯანმრთელების პროცესს, კომპენსირებს ნებისმიერი წარმოშობის ჰიპოქსიას (ჟანგბადის ნაკლებობას), რაც დაკავშირებულია ჰემოგლობინის ნაკლებობასთან, გულ-სისხლძარღვთა, ფილტვების დაავადებებთან, ფსორიაზთან, ასევე ფიზიკურ ან გონებრივ დატვირთვასთან, მაღალმთიან ადგილებში ყოფნასთან ან დახურულ სივრცეში მუშაობასთან.

რეკომენდირებულია სპორტსმენებისათვის ვარჯიშის შემდგომ, ენერგიის აღსადგენად და თავსებადია ნებისმიერი სახის მკურნალობასთან.