საღებავების მწარმოებელმა კომპანიამ Graffiti • გრაფიტი ასორტიმენტი გააფართოვა და ბაზარს ცეცხლ გამძლე საღებავები შესთავაზა. როგორც Business Insider Georgia-სთან მარკეტინგის სამსახურის ხელმძღვანელმა ხათუნა აბუთიძემ განაცხადა, კომპანია გაჩერებას არ აპირებს და სამომავლოდ ბაზარს სიახლეებს კიდევ შესთავაზებს. მისი თქმით, გეგმაშია ანტიბაქტერიული საღებავების წარმოება.

მიმდინარე წელს „გრაფიტის“ გაყიდვები 30%-იან ზრდას აჩვენებს.

საღებავების საწარმო „გრაფიტის“ გარდაბნის მუნიციპალიტეტის სოფელ გამარჯვებაში მდებარეობს, რომელიც უმაღლესი ხარისხის საღებავებს აწარმოებს და პროდუქციას მთელი ქვეყნის მასშტაბით ყიდის. საწარმოს მშენებლობა ინვესტორს 2 მლნ დოლარი დაუჯდა.

„გრაფიტი“ დღეისათვის 100-მდე დასახლების პროდუქციას აწვდის და ის ბაზარზე წარმოდგენილია ორი ბრენდით: „გრაფიტი“ და „პოლუსი“.

„გრაფიტის პროდუქცია იყიდება მთელი ქვეყნის მასშტაბით. რეალიზაციას ვახდენთ საკუთარი სადისტრიბუციო ქსელის მეშვეობით, რომლებიც ჩვენს პროდუქციას თბილისის გარდა რეგიონებსაც აწვდის. აქტიურად ვთანამშრომლობთ სამშენებლო კომპანიებთან და პარტნიორ მაღაზიებთან. ასევე „ელიავას ბაზრობაზე“ გაქვს საკუთარი მაღაზია“, - აცხადებს კომპანიის წარმომადგენელი.

„გრაფიტის“ გეგმებში ადგილობრივ ბაზარზე საკუთარი წილის გაზრდაა, თუმცა თუ მოთხოვნა და ინტერესი იქნება კომპანია ექსპორტსაც განიხილავს.

დღეისათვის „გრაფიტი“ აწარმოებს ინტერიერის საღებავებს, ფასადის საღებავებს, აუზის საღებავებს, რკინის ანტიკოროზიულ საღებავს, ჰიდროიზოლაციას, სხვადასხვა სახის ლაქებს და დამხმარე საშუალებებს და ასევე დასამუშავებელ საშუალებებს

საწარმო აშენებულია სამშენებლო კომპანია ,,ელემენტი’’-ს მიერ, რომლის საქმიანობაც ხარისხის უზრუნველსაყოფად ISO 9001-ით დაწესებულ სტანდარტებსა და მოთხოვნებს ემსახურება.

„გამომდინარე იქიდან, რომ გრაფიტის საღებავების წარმოება სრულად საქართველოს ტერიტორიაზე მიმდინარეობს და ქმნის უმაღლესი ხარისხის პროდუქტს, კომპანიამ ,,აწარმოე საქართველოს’’ პროგრამის ფარგლებშიც დიდ წარმატებას მიაღწია და დაფინანსებაც მოიპოვა.

2022 წლიდან დღემდე კი, პროფესიონალ და გამოცდილ გუნდთან ერთად ერთგულად ვაგრძელებთ ხარისხზე ორიენტირებული ქართული პროდუქტის წარმოებას, რომელიც ევროპულ ბაზარზე არსებულ სტანდარტებს უტოლდება და მომხმარებელს მრავალფეროვან არჩევანს, უმაღლეს ხარისხს, გამორჩეულ სერვისსა და საუკეთესო ფასებს სთავაზობს“, - აღნიშნულია გრაფიტის ვებგვერდზე განთავსებულ ინფორმაციაში.