VIP Warehouse / ვიპ საწყობი, რომელიც თბილისის საერთაშორისო აეროპორტის სიახლოვეს მდებარეობს, ბაზარზე პოზიციონირებს როგორც  ყველაზე დაბალი საიჯარო ქირის მქონე ინფრასტრუქტურა. როგორც Business Insider Georgia-სთან VIP Warehouse-ის დამფუძნებელმა გიორგი ლომთათიძემ განაცხადა, საწყობები გათვლილია მშრალი ტიპის პროდუქციაზე. ინფრასტრუქტურა აერთიანებს როგორც ბეტონით აშენებული საწყობებს, ასევე თუნუქით და სენდვიჩ პანელითგამართულ საწყობებს.

საერთო ჯამში, კომპლექსი 3.5 ჰექტარ ტერიტორიას მოიცავს, ხოლო სასაწყობე ფართი 18,000 კვადრატულ მეტრს აღწევს.

ლომთათიძის თქმით, მომხმარებელთა მხრიდან უფრო მაღალი მოთხოვნა სენდვიჩ პანელისა და ბეტონის ტიპის შენობებზე ფიქსირდება, რაც ტემპერატურის უკეთესი შენარჩუნების შესაძლებლობით აიხსნება.

2024 წელს VIP Warehouse სრულად – 100% დატვირთვით ფუნქციონირებდა, თუმცა მიმდინარე წელს დატვირთვა 85-90%-მდე შემცირდა. კომპანიის მფლობელი ამას კონკურენციის ზრდას და რეგიონში ახალი საწყობების განვითარებას უკავშირებს.

თუმცა კონკურენციის ზრდის მიუხედავად კომპანიას ტარიფებისთვის არ გადაუხედია და უცვლელად ინარჩუნებს.

გიორგი ლომთათიძის თქმით, ის პარტნიორებთან ერთად თბილისის შემოვლით გზაზე, თბილისის გეზ-ის მიმდებარედ, 15 ათას კვ/მ-ზე სასაწყობე მეურნეობას აშენებს, სადაც ​ინვესტიცია 2 მლნ ევროზე მეტია და მისი მშენებლობა 2025 წლის აგვისტოს ბოლომდე დასრულდება. 

„საწყობების ინფრასტრუქტურაზე მოთხოვნა იზრდება, მით უმეტეს, როცა ანაკლიის პორტის მშენებლობა მიმდინარეობს. სახელმწიფოს პოლიტიკაც ამ მიმართულებითაა ორიენტირებული – შეიქმნას მეტი ლოგისტიკური პროექტი“, – აცხადებს ლომთათიძე.