ხელნაკეთი სათამაშოების მწარმოებელი ბრენდი „ჯეინის თოჯინები“ დიდი პოპულარულობით სარგებლობს. პროდუქცია მზადდება სრული სტანდარტების დაცვით, ბუნებრივი, ანტიალერგიული მასალებისგან და სრულიად უსაფრთხოა პატარებისთვის. კომპანიაში არსებულ სიახლეებზე Business Insider Georgia „ჯეინის თოჯინების“ დამფუძნებელს ჯეინ გომურაშვილს ესაუბრა.

„აქტიურად მიმდინარეობს ონლაინ კურსებზე მიღება. უახლოეს პერიოდში გამოცხადდება ახალი კურსი, რომელიც იანვარში დაიწყება.

კურსი დაყოფილია შემდეგნაირად: ვასწავლი სათამაშოების შექმნას, როგორც დაწყებით, ასევე პროფესიონალურ დონეზე. გარდა ამისა, არსებობს ცალკე მიმართულება ბიზნესისთვის - როგორ გაყიდონ შექმნილი პროდუქტები. ერთის მხრივ, სწავლება ეხება იმას, როგორ შექმნან სათამაშო, ხოლო მეორეს მხრივ როგორ გაყიდონ პროდუქტი.

აკადემიაში მოსწავლეებს ამ მიმართულებითაც ვეხმარები, რადგან მაქვს დიდი გამოცდილება გაყიდვების კუთხით, როგორც თეორიული, ისე პრაქტიკული ცოდნა.
კურსის ხანგრძლივობა 1-დან 3 თვემდეა, დამოკიდებულია იმაზე, თუ რომელ ვერსიას ირჩევს სტუდენტი “, - აცხადებს ჯეინ გომურაშვილი.

მოთხოვნა და ინტერესი, როგორც კურსის, ასევე პროდუქციის მიმართ საკმაოდ მზარდია.

„კურსზე მოთხოვნა საკმაოდ მზარდია, რადგან სწავლება ონლაინ ფორმატში მიმდინარეობს. სასწავლო პროცესი ვიდეო გაკვეთილებისგან შედგება, რომლებიც ნებისმიერ დროს არის ხელმისაწვდომი. ამიტომ კურსი ძალიან მოსახერხებელია, როგორც საქართველოში მცხოვრები ადამიანებისთვის, ისე ემიგრანტებისთვის.

მზარდია მოთხოვნა პროდუქციაზეც. ქართველმა მომხმარებელმა ისწავლა ხელნაკეთი ნივთების შეფასება და დაფასება, რაშიც ვთვლი, რომ დიდი წვლილი მიმიძღვის. როდესაც დავიწყე, ბევრი სკეპტიკურად იყო განწყობილი, მაგრამ ახლა ეს დამოკიდებულება საგრძნობლად შეიცვალა. დღესდღეობით, როგორც ქართველები, ისე ემიგრანტები და უცხოელები ხშირად იძენენ ჩემს პროდუქციას. გარდა ამისა, აქტიურად ვმონაწილეობ გამოფენებში. ამ მიმართულებითაც საკმაოდ წარმატებული წელი მქონდა. ველოდები საშობაო ბაზრობას, რომელშიც აუცილებლად მივიღებ მონაწილეობას.

ასორტიმენტს მუდმივად ვაფართოებთ. ამ ეტაპზე საახალწლო კოლექციაზე ვმუშაობთ და მომხმარებლებს უამრავ ისეთ ახალ სათამაშოს შევთავაზებთ, რომლებიც აქამდე არ გვქონია “, - ამბობს ბრენდის დამფუძნებელი.

აღსანიშნავია, რომ კომპანია 8 წელია რაც ბაზარზე ოპერირებს. ბრენდის დაარსების იდეა საკუთარი შვილისთვის შექმნილ სათამაშოს უკავშირდება. ამის შემდეგ გადაწყვიტა დამფუძნებელმა ამ ყველაფრის საქმედ ქცევა. ჯეინ გომურაშვილი იმასაც აღნიშნავს, რომ იმ პერიოდში, როდესაც მან საქმიანობა დაიწყო, მსგავსი ტიპის სათამაშოები ქართულ ბაზარზე არ არსებობდა და სწორედ „ჯეინის თოჯინები“ აღმოჩნდა პირველი, ვინც ამ ყველაფერს ხელი შეუწყო.