BODBE Hotel არის პრემიუმ კლასის სასტუმრო, რომელიც ბაზარზე 2024 წლიდან ოპერირებს და წარმატებით ემსახურება, როგორც ადგილობრივ ისე საერთაშორისო ვიზიტორებს. მეტი დეტალისთვის Business Insider Georgia კომპანიის მარკეტინგის მენეჯერს ქეთი ბახტურიძეს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და
რას სთავაზობთ მომხმარებლებს?
სასტუმრო „ბოდბე“ წარმოადგენს პრემიუმ კლასის ტურისტულ ობიექტს, რომელმაც საქმიანობა 2024 წლის 20 ოქტომბერს დაიწყო და დღემდე წარმატებით ემსახურება როგორც ადგილობრივ, ისე საერთაშორისო ვიზიტორებს.
სასტუმრო მდებარეობს კახეთში, ქალაქ სიღნაღის შესასვლელთან, ბუნებრივად გამორჩეულ და ისტორიულად დატვირთულ ლოკაციაზე, საიდანაც იშლება ულამაზესი პანორამული ხედები ალაზნის ველზე, კავკასიონის მთებსა და ბოდბის ხეობაზე.
სასტუმროს ძირითადი საქმიანობაა ვიზიტორებისთვის განტვირთვისა და იდეალური დასვენებისთვის მაღალი ხარისხის მომსახურების შეთავაზება, თანამედროვე დიზაინის, მყუდრო და უნიკალური გარემოს პირობებში.

სტუმრებს ვთავაზობთ:
• დახვეწილი დიზაინის ნომრებს, რომლებიც აერთიანებს თანამედროვე კომფორტს და ესთეტიკას;
• ღია და დახურულ აუზებს, იდეალურ სივრცეს განტვირთვისთვის წლის ნებისმიერ სეზონზე;
• სპა და გამაჯანსაღებელ სერვისებს, რომელიც მოიცავს საპროცედურო ოთახებს, საუნას, ორთქლის ოთახსა და სპორტ დარბაზს;
• სხვადასხვა კონცეფციის რესტორნებსა და ბარებს, სადაც წარმოდგენილია როგორც ქართული, ისე საერთაშორისო სამზარეულო და გამორჩეული კოქტეილები, ადგილობრივი და უცხოური ღვინოები;
• კონვერტირებად ღონისძიებების სივრცეებს, როგორც საქმიანი შეხვედრებისთვის, ასევე ქორწილებისა და სხვა პირადი ღონისძიებებისთვის.

როგორ აფასებთ მოთხოვნას ზოგადი თვალსაზრისით?
ტურიზმის სექტორში კახეთის რეგიონი ერთ-ერთი ლიდერია როგორც შიდა, ისე საერთაშორისო ვიზიტორების რაოდენობით.
რაც შეეხება ახლად გახსნილ სასტუმრო „ბოდბეს“, მოთხოვნა შეიძლება შეფასდეს როგორც სტაბილურად პოზიტიური და დინამიკურად მზარდი.
უკვე შეინიშნება მაღალი დაინტერესება, როგორც ადგილობრივი, ისე უცხოელი სტუმრების მხრიდან - როგორც დასვენების, ისე ღონისძიებებისა და საქმიანი ვიზიტების მიზნით.

რას მიიჩნევთ კომპანიის კონკურენტულ უპირატესობად?
სასტუმრო „ბოდბეს“ ერთ-ერთი უმთავრესი კონკურენტული უპირატესობა მისი უნიკალური ადგილმდებარეობაა - თბილისთან სიახლოვე და ამავე დროს, გამორჩეული ბუნებრივი გარემო.
სასტუმრო მაღლიდან გადმოჰყურებს ალაზნის ველს, კავკასიონის მთებს, ქალაქ სიღნაღსა და ბოდბის ხევს, რაც სტუმრებს სთავაზობს 360 გრადუსიან პანორამულ ხედებს და დაუვიწყარ ვიზუალურ გამოცდილებას.
განსაკუთრებულად აღსანიშნავია სასტუმროს არქიტექტურა და ინტერიერის დიზაინი, რომელიც აერთიანებს თანამედროვე კომფორტს, დახვეწილ ესთეტიკას და ბუნებასთან ჰარმონიას. თითოეული დეტალი გააზრებულია იმისთვის, რომ სტუმარმა თავი იგრძნოს მშვიდ, გამორჩეულ და შთამაგონებელ გარემოში.
ეს არის ადგილი, სადაც ადამიანს ეძლევა შესაძლებლობა მოწყდეს ყოველდღიურ რუტინას, სტრესსა და ქაოსს და სრულად ისიამოვნოს განტვირთვით, როგორც ფიზიკურად, ისე გონებრივად. ეს განცდა, რომელიც „ბოდბეს“ თითოეულ სტუმარს რჩება, ქმნის იმ განსაკუთრებულ კავშირს, რაც სასტუმროს გამორჩეულ პოზიციას უმყარებს ბაზარზე.

როგორია კომპანიის სამომავლო გეგმები?
სასტუმრო „ბოდბეს“ სამომავლო სტრატეგია ორიენტირებულია მზარდ ტურისტულ მოთხოვნაზე რეაგირებასა და სასტუმროს, როგორც კახეთის რეგიონის ერთ-ერთი გამორჩეული, მაღალი სტანდარტების ტურისტული ობიექტის პოზიციონირებაზე.
ჩვენი ხედვა ეფუძნება მუდმივ განვითარებასა და იმ გამოცდილების დახვეწას, რომელსაც სტუმარს ვთავაზობთ იმისთვის, რომ თითოეულმა ვიზიტორმა არა მხოლოდ კმაყოფილმა, არამედ შთაგონებულმა დატოვოს „ბოდბე“.

უახლოეს მომავალში დაგეგმილია რამდენიმე მნიშვნელოვანი სივრცის დაამატება:
• პადელის მოედანი – აქტიური დასვენების მოყვარულთათვის;
• ახალი კახური რესტორანი – რომელიც ადგილობრივ გემოებსა და კულინარიულ ტრადიციებს წარადგენს თანამედროვე ინტერპრეტაციით;
• ასევე იგეგმება დამატებითი გასართობი და კულინარიული სივრცეების ინტეგრირება სასტუმროს ტერიტორიაზე.
ჩვენთვის პრიორიტეტულია ხარისხის სტაბილურად მაღალი დონე, სტუმრების კმაყოფილებაზე მუდმივი ზრუნვა და ისეთი ღირებულებების შექმნა, რომლებიც ხელს შეუწყობს გრძელვადიან ლოიალურობას, პოზიტიურ შეფასებებსა და განმეორებით ვიზიტებს.
„ბოდბე“ არ არის მხოლოდ ადგილი — ეს არის გამოცდილება, რომელიც მუდმივად ვითარდება.

ცნობისთვის, სასტუმროში განთავსებულია დახურული და სეზონური ღია აუზი ტერასაზე, რომელსაც ხედები აქვს ალაზნის ველზე და კავკასიონზე. „ბოდბე“ სიღნაღში გამორჩეულია, როგორც კერძების მრავალფეროვნებით, ასევე უნიკალური გარემოთი.