„ვაზიანი კომპანიამ“ მონაწილეობა მიიღო Vinexpo Paris 2026-ის საერთაშორისო გამოფენაში, სადაც წარდგენილმა ღვინოებმა იმპორტიორების, სომელიეების და დარგის ექსპერტების მხრიდან მაღალი შეფასება და დიდი ინტერესი დაიმსახურა , - ამის შესახებ, Business Insider Georgia - ს კომპანიის გაყიდვებისა და მარკეტინგის უფროსმა აურიკა კროიტორმა განუცხადა.

„Wine Paris არის შედარებით ახალი გამოფენა, რომელიც ბოლო წლებში კონკურენციას უწევს ისეთ დიდ საერთაშორისო გამოფენას, როგორიცაა ProWein Düsseldorf. წელს გადავწყვიტეთ, რომ ProWein-ის ნაცვლად პარიზში მიგვეღო მონაწილეობა და ეს გადაწყვეტილება საკმაოდ წარმატებული აღმოჩნდა. გამოფენას ბევრი ვიზიტორი დაესწრო - სხვადასხვა ქვეყნიდან ჩამოსული იმპორტიორები და ბიზნესპარტნიორები. მათ შორის, იყვნენ ჩვენი არსებული პარტნიორებიც, რომლებთანაც შეხვედრები გავმართეთ.

ქართული ღვინის მიმართ ინტერესი საკმაოდ დიდი იყო, განსაკუთრებით ადგილობრივი ბიზნესპარტნიორების, იმპორტიორების, რესტორნის მფლობელების, სომელიეების და სხვა პროფესიონალების მხრიდან. ქართული ღვინო მათ ძალიან მოსწონთ და უყვართ ფრანგებს.

წინა წლებში განხორციელებულმა სხვადასხვა აქტივობამ, რომლის მიზანი ქართული ღვინის პოპულარიზაცია იყო, მნიშვნელოვანი შედეგი გამოიღო, და შედეგად ბევრი ადამიანი დაინტერესდა ქართულ ღვინით.

გამოფენა მხოლოდ ევროპელი სტუმრებისთვის არ ყოფილა - ჩამოსულები იყვნენ აზიის ქვეყნებიდან: ტაივანი, ინდონეზია, იაპონია, კორეა, ასევე აფრიკის ქვეყნებიდანაც. ბევრმა ზუსტად იცოდა, თუ რომელი ღვინით იყო დაინტერესებული. როცა ერთ-ერთს ვკითხე, საიდან მოიძია ინფორმაცია, მითხრა, რომ ინტერნეტში ნახა და სწორედ ჩვენი ღვინო აინტერესებდა.

ჩვენთვის ეს ახალი გამოცდილება, საცდელი ჩასვლა და საცდელი მონაწილეობა იყო. ვარაუდობთ, რომ მომავალ წელს კვლავ პარიზზე გავაკეთებთ არჩევანს.

ინდუსტრიაში სიტუაცია საკმაოდ რთულია და ეს მხოლოდ საქართველოს პრობლემა არ არის - მთელს მსოფლიოში შემცირებულია მოხმარება, შესაბამისად, გაყიდვებიც. ეს გამოწვევაა, თუმცა არა გამოუვალი მდგომარეობა. საჭიროა თავდაუზოგავი შრომა, რათა მომხმარებლები, რომლებიც არჩევანს აჩერებენ ღვინის მოხმარებაზე, დარჩნენ ჩვენს მუდმივ მომხმარებლებად. ამავდროულად, ასეთ კონკურენტულ გარემოში ყველაზე დიდი ყურადღება უნდა მიექცეს ხარისხს. ჯანსაღი კონკურენცია შეიძლება ჩვენს სასიკეთოდ გამოვიყენოთ “, - აცხადებს აურიკა კროიტორი.