მეღვინეობა „ჩელთი“ ახლახანს მონაწილეობდა ProWein Düsseldorf-ის გამოფენაში. როგორც Business Insider Georgia-სთან კომპანიის კომერციული დირექტორი, ანა მირიანაშვილი, აღნიშნავს გამოფენა მათთვის მნიშვნელოვანი იყო როგორც არსებულ იმპორტიორებთან და პარტნიორებთან შეხვედრისთვის, ისე ახალ პარტნიორებთან მოლაპარაკებების დასაწყებად.

„ჩვენ ახლახანს მონაწილეობა მივიღეთ ProWein Düsseldorf-ის გამოფენაში, რომელიც გერმანიაში ჩატარდა. გერმანიის ბაზარი ჩვენთვის ერთ-ერთი ყველაზე მნიშვნელოვანი ბაზარია, რადგან გვაქვს საკუთარი საწყობები და ვთანამშრომლობთ რამდენიმე დიდ ქსელთან.

გამოფენა მნიშვნელოვანი იყო როგორც არსებულ იმპორტიორებთან და პარტნიორებთან შესახვედრად, ისე ახალ პარტნიორებთან მოლაპარაკებების დასაწყებად. ეს გამოფენა განსაკუთრებით საინტერესო იყო ადგილობრივი ბაზრისთვის.

ჩვენი გამოცდილება გამოფენაზე საკმაოდ წარმატებული აღმოჩნდა - ამჟამად ორი ახალი კონტრაქტის გაფორმებას განვიხილავთ, რომლებიც გამოფენის შედეგია, და ორივე ძალიან მნიშვნელოვანი ქსელია “, - აღნიშნავს ანა მირიანაშვილი.

კომპანია სამომავლოდ საექსპორტო ბაზრების გაფართოებას გეგმავს.

„წელს გეგმაში გვაქვს ამერიკის ბაზარს განსაკუთრებული ყურადღება დავუთმოთ. ერთი თვეში მივდივართ მაიამიში, სადაც დაგეგმილი გვაქვს დიდი გამოფენა. ეს შესაძლებლობაა, როგორც არსებულ იმპორტიორებთან შეხვედრისთვის, ისე იმ შტატებში დისტრიბუტორების მოძიებისთვის, სადაც ჯერ-ჯერობით წარმომადგენლობა არ გვაქვს.
ამერიკის ბაზარი საკმაოდ სპეციფიკურია, მოთხოვნები შტატების მიხედვით განსხვავდება. სწორედ ამიტომ, თითოეულ შტატში საჭიროა სხვადასხვა დისტრიბუციის პარტნიორი. ამ მიზანს ისახავს ჩვენი ვიზიტი, რათა ამერიკის ბაზარზე პოზიციები უფრო გავამყაროთ “, - აცხადებს კომპანიის კომერციული დირექტორი.

ინფორმაციისთვის, მეღვინეობა „ჩელთი“ ამ დროისთვის 20-მდე დასახელების ღვინოს აწარმოებს.