2025 წელს საგანმანათლებლო პროექტმა Robo Coder - მა დაარსებიდან 5 წელი აღნიშნა , - ამის შესახებ Business Insider Georgia - ს კომპანიის დამფუძნებელმა ნინო ბექაურმა განუცხადა.

„2025 წელს საგანმანათლებლო პროექტმა Robo Coder დაარსებიდან 5 წელი აღნიშნა. ამ დროის განმავლობაში ჩვენ მცირე ინიციატივიდან გავიარეთ გზა და ჩამოვყალიბდით მდგრად საგანმანათლებლო პროექტად LEGO - რობოტოტექნიკისა და პროგრამირების სფეროში.

2020–2025 წლებში Robo Coder-ის კურსები გაიარა 2000-მდე ბავშვმა, როგორც მოკლევადიანი პროგრამების (ინტენსივები, მასტერკლასები, საზაფხულო ბანაკები), ასევე გრძელვადიანი სწავლების ფარგლებში.

მოსწავლეების ნაწილი Robo Coder-ში რამდენიმე წლის განმავლობაში სწავლობს და ეტაპობრივად გადადის კონსტრუირების საბაზისო უნარების შესწავლიდან, უფრო რთულ საინჟინრო და პროგრამულ ამოცანებზე. ასეთი მიდგომა საშუალებას გვაძლევს არამარტო ვასწავლოთ ბავშვებს ტექნოლოგიები, არამედ ჩამოვაყალიბოთ გრძელვადიანი ურთიერთობები ოჯახებთან და შევქმნათ სტაბილური საგანმანათლებლო საზოგადოება პროექტის გარშემო.

ყველაზე მაღალი მოთხოვნა ფიქსირდება 5–8 წლამდე ასაკობრივ ჯგუფებზე, პერიოდში, როდესაც თამაშზე დაფუძნებული და პრაქტიკული სწავლება განსაკუთრებით ეფექტურია და საფუძველს უყრის ლოგიკურ და საინჟინრო აზროვნებას.

ამასთან, პროექტი მოიცავს უფრო ფართო ასაკობრივ დიაპაზონს და სთავაზობს ადაპტირებულ პროგრამებს, როგორც უმცროსი ასაკის ბავშვებს, ასევე მათ, ვინც უკვე გააზრებულად ინტერესდება პროგრამირებითა და ინჟინერიით “, - აცხადებს ნინო ბექაური.

ცნობისთვის, Robo Coder - ი არის რობოტოტექნიკისა და პროგრამირების სასწავლო სივრცე 3-15 წლამდე ბავშვებისთვის და მოზარდებისთვის. ცენტრი დაფუძნებულია Lego Education საერთაშორისო პროგრამაზე და მიზნად ისახავს კონსტრუქტორი Lego-ს დახმარებით განუვითარონ მოსწავლეებს მათი წარმატებული მომავლისთვის საჭირო უნარები. კომპანია 2020 წელს დაარსდა.