„გემო ფესტი“ შენი ცნობადობისთვის არაჩვეულებრივი საშუალებაა, ვფიქრობ, როცა რამეს აკეთებ და ყიდი, ხალხს უნდა დაანახო თუ რას აკეთებ, - აცხადებს გურიაში გამართული „გემო ფესტის“ ერთ-ერთი მონაწილე

სხვა კაფე, რომელიც ოზურგეთში ჭავჭავაძის 12 ნომერში მდებარეობს, 3 თვის უკან გაიხსნა და წარმატებით გაართვა თავი საქმეს  და უკვე „გემო ფესტში“ მონაწილეობისთვისაც მიიწვიეს. კაფის დამფუძნებელმა ლიკა ჩავლეშვილმა გამოწვევა მიიღო და საკმაოდ წარმატებულად წარდგა ფესტივალზე. 

„გემო ფესტის“ ფარგლებში ჩვენ სტუმრებს შევთავაზეთ შავი ზღვის მიდიები - შემწვარი.  ცოტა სარისკო ნაბიჯი იყო და გაამართლებდა თუ არა 50/50-ზე იყო. ჩვენთან ეს პროდუქტი დიდად არაა ცნობილი, არადა ჩვენია, შავი ზღვისპირეთისაა. ჩემი გათვლით, ფესტივალისთვის ორდღიანი მარაგი მოვამზადე, თუმცა ფესტივალის პირველივე დღეს სრულიად გავყიდეთ. ყველა კმაყოფილი დარჩა და რაც მთავარია ჩვენი კერძი თავისი გემოვნური თვისებებით საკმაოდ სასიამოვნოა. ერთხელ, რომ შეიძენ კიდევ რომ გინდა გასინჯო და შეიძინო. რეალურად ამხელა მოლოდინი არ მქონია და ძალიან კმაყოფილი ვარ. 

მიდიებს შეკვეთილში ადგილობრივი ფერმერისგან ვყიდულობთ და ამ დროისათვის მხოლოდ ჩვენზე მუშაობენ, რადგანაც დიდი რაოდენობით მიდიები არ ჰყავთ. ჩვენ ვახდენთ მის რეალიზებას.

ეს კონკრეტული კერძი სხვა კაფის მენიუში აქამდეც იყო, უბრალოდ ვიყენებდით სხვადასხვა ბრენდის ღვინოებს. „გემო ფესტისთვის“ კი გამოვიყენე გურული ღვინო „ნივე“ და ისეთი განსაკუთრებული გემო მისცა, რომ გადავწყვიტე, რომ ეს კონკრეტული ღვინო გახდეს მისი შემადგენელი ნაწილი და სხვა ღვინო აღარ გამოვიყენოთ. 

თავიდან ამ ფესტივალში მონაწილეობა არ მინდოდა, მაგრამ მეგობარმა დამარწმუნა და მართლაც კმაყოფილი ვარ. თუ სოციალურ ქსელში არ აქტიურობ შედეგები მთლად დამაკმაყოფილებელი არ არის. მთავარი მარკეტინგის წყაროც ესაა - თუ დაანახებ რას ყიდი გაყიდი, თუ არა შეიძლება უმაღლესი ხარისხის პროდუქტი იყოს, მაგრამ ვერავინ დაინახოს და ვერ გაყიდო. ვფიქრობ, რომ „გემო ფესტი“ ცნობადობისთვის არაჩვეულებრივი საშუალებაა. ვფიქრობ, როცა რამეს აკეთებ და ყიდი უნდა დაანახო ხალხს რას აკეთებ და არ გქონდეს იმის კომპლექსი ილაპარაკო იმაზე თუ რას აკეთებ და მაქსიმალურად სწორად მიაწოდო მომხმარებელს ინფორმაცია პროდუქტზე“, - აცხადებს „სხვა კაფის“ დამფუძნებელი. 

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფ-მზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.