„კა გრუპის“ დამფუძნებლის ირაკლი ჭიღლაძის თქმით, ტურიზმის გრძელვადიანი სტაბილურობისთვის მნიშვნელოვანია ახალი ინიციატივების დაგეგმვა და მათი სწორად ორგანიზება, რათა ვიზიტორებმა პოზიტიური გამოცდილება მიიღონ. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას „კა გრუპის“ დამფუძნებელმა განაცხადა, კოვიდპანდემიის პერიოდში შიდა ტურიზმის განვითარებამ მნიშვნელოვანი სტიმული მიიღო, რადგან ქართველმა მოგზაურებმა ქვეყნის შიგნით მოგზაურობა უფრო აქტიურად დაიწყეს და კარგი მომსახურების შემთხვევაში აღნიშნული ჩვევა მომავალშიც გრძელდება.

„რაც შეეხება შიდა ტურიზმს, შეიძლება ასეთი ანალიზი გავაკეთოთ - პანდემიამ თუ რაიმე დადებითი მოგვიტანა, ერთ-ერთი სწორედ ის იყო, რომ ქართველებისთვის შიდა ტურიზმი საინტერესო გახდა. მათ ეს გამოცდილება საკუთარ თავზე გამოსცადეს. ტურისტის ქცევა ყოველთვის ლოგიკურია - სინჯავს სიახლეს და თუ კარგი მომსახურება და სერვისი მიიღო, შემდეგ აუცილებლად ბრუნდება. ეს ტალღა წარმატებით აგორდა. ამან ხელი შეუწყო პროცესის განვითარებას და იმ პრობლემის მოგვარებას, რომ ბევრი ჩვენი მოქალაქე საქართველოში არ მოგზაურობს, ბავშვები კი ისე იზრდებიან, რომ რეგიონებს საერთოდ არ იცნობენ.

ამ კამპანიამ ხელი შეუწყო აღნიშნული მიმართულების განვითარებას. თუმცა, როგორც კი ფრენები აღდგა, ტურისტის ქცევა კვლავ ძველ კალაპოტს დაუბრუნდა, ბევრმა კვლავ საზღვარგარეთ მოგზაურობა ამჯობინა. მიუხედავად ამისა, ნაწილისთვის შიდა ტურიზმი უკვე დამკვიდრებულ ჩვევად იქცა. შესაბამისად, ჰოტელიერებმაც უფრო მეტი ზრუნვა დავიწყეთ ადგილობრივ ტურისტზე. მაგალითად, პანდემიის შემდეგ აქტიურად დამკვიდრდა პრაქტიკა, როდესაც სასტუმროებში ქართველი დამსვენებლისთვის და საერთაშორისო ტურისტისთვის განსხვავებული ტარიფები მოქმედებს. რაც ქართველ დამსვენებელს კიდევ უფრო მეტად უბიძგებს იმ მიმართულებით, რომ შიდა ტურიზმი განავითაროს. რაც შეეხება ტურიზმის ეროვნული ადმინისტრაციის და სახელმწიფოს ჩართულობის მხრივ, ბევრი სხვადასხვა კარგი პროექტები აქვთ. განსაკუთრებით მე პირადად ძალიან მომწონს "გემო ფესტი", რომელიც ივნისში უნდა ჩატარდეს ახალციხეში, რითაც ძალიან კმაყოფილები ვართ“, - განმარტა ჭიღლაძემ.

მისი თქმით, ასევე აუცილებელია საერთაშორისო ბაზრებთან დროული და ეტაპობრივი მუშაობა. განსაკუთრებით იმ ქვეყნებთან, რომლებიც საქართველოს უკვე კარგად იცნობენ და სადაც შედეგების მიღება მოკლევადიან პერიოდში უფრო

„რაც უფრო მეტ მსგავს ინიციატივას მოვიფიქრებთ და შემდეგ სერვისის კუთხით ყველაფერს სწორად მოვაწყობთ, რათა ტურისტმა უარყოფითი გამოცდილება არ მიიღოს, მით უფრო უკეთესი იქნება სექტორის გრძელვადიანი სტაბილურობისთვის. როგორც აღვნიშნე, იმ საერთაშორისო ბაზრებზეც, რომლებიც ჩვენთვის პოპულარულია, დროში სწორად გათვლილი და კონვერსირებული მოქმედებები გვჭირდება.

არსებობენ ბაზრები, რომლებიც კარგად გვიცნობენ, შესაბამისად, მათთან მოკლევადიან პერსპექტივაში უკუგების მიღება უფრო სწრაფად არის შესაძლებელი. თუმცა არის ბაზრები, რომლებთანაც ეტაპობრივი მუშაობაა საჭირო. მაგალითად, ამ დღეებში ჩატარდა „ტარიფას სამიტი“, სადაც ევროპის სხვადასხვა ქვეყნიდან ძალიან საინტერესო საზოგადოება იყო ჩამოსული. შევხვდით დიდი ბრიტანეთის, პოლონეთის, სერბეთისა და სლოვენიის მსხვილ ტურისტულ კომპანიებს, ძირითადად MICE ტურიზმის მიმართულებით.

ის, რაც სახელმწიფოს უნდა გაეკეთებინა, ამ შემთხვევაში შესრულდა - კერძო ბიზნესის წარმომადგენლები ერთმანეთს შეახვედრა. ამის შემდეგ უკვე თავად კერძო სექტორის კომპეტენციასა და შრომისმოყვარეობაზეა დამოკიდებული, როგორ განახორციელებენ შემდგომ კომუნიკაციას. ეს გრძელვადიან პერსპექტივაში კარგ შედეგს გამოიღებს.

რაც შეეხება ჩინეთის, ყაზახეთისა და უზბეკეთის ბაზრებს, სადაც უკვე წარმატებით ვოპერირებთ, დამატებითი ფრენების დანიშვნა მოკლევადიან პერსპექტივაშივე მოგვიტანს დადებით ეფექტს. შესაბამისად, მსგავსი ტიპის, დროში სწორად გათვლილი აქტივობები ტურიზმის სექტორს სწორი მიმართულებით განავითარებს“, - აღნიშნა ჭიღლაძემ.