GCCA-ის გადაწყვეტილებით რუსთავის ავტობაზრობა 848 276 ლარით დაჯარიმდა. აღნიშნულ გადაწყვეტილებაზე რადიო „სივრცის“ ეთერში გადაცემა Business Insider Georgia-ში სტუმრობისას კონკურენციის სააგენტოს ხელმძღვანელმა (GCCA) ირაკლი ლექვინაძემ განაცხადა. მისი თქმით, პროცესი 2023 წლიდან დაიწყო და კომპანიისგან ინფორმაციის ამოღება GCCA-ს სასამართლო გზითაც კი მოუწია.

„მონიტორინგისას ჩვენ საკითხს დეტალურად ვაკვირდებით. რუსთავის ავტობაზრობის შემთხვევაში საქმე ეხებოდა ავტოიმპორტიორებისთვის საპარკინგე ადგილების გაძვირებას. კერძოდ, 2023 წლიდან ერთი საპარკინგე ადგილის ტარიფი 5 ლარიდან 10-15 ლარამდე გაიზარდა, რაც არანაირი მომსახურების ან ინფრასტრუქტურული გაუმჯობესებით არ იყო გამართლებული.

ჩვენ მივიღეთ დაახლოებით 260 ავტოიმპორტიორის საჩივარი. კვლევამ აჩვენა, რომ ფასის გაორმაგება ან უფრო მეტად ზრდა მოხდა ისე, რომ საპარკინგე სერვისის თვითღირებულება უცვლელი დარჩა — არც უსაფრთხოება გაუმჯობესებულა და არც სხვა ტიპის ინვესტიცია განხორციელებულა. შესაბამისად, ეს შეფასდა როგორც არაგონივრულად მაღალი ფასის დაწესება.

ჯამში, რუსთავის ავტობაზრობის — რომელიც ორი კომპანიისგან შედგება — ჯარიმამ დაახლოებით 850 000 ლარი შეადგინა. რეალურად მომხმარებელზე მიყენებული ზიანი კიდევ უფრო დიდი იყო.

გარდა ამისა, ინფორმაციის წარდგენისგან თავის არიდების გამო, კომპანიას სამჯერ დაეკისრა ჯარიმა, ხოლო საბოლოოდ საჭირო გახდა სასამართლოს გზით მონაცემების ამოღება.

ეს საქმე დასრულებულია, თუმცა ვფიქრობთ, ამ გადაწყვეტილებას მომავალში პრევენციული ეფექტი ექნება. ასევე გავეცით რეკომენდაცია, რომ მომავალშიც, თუ დაფიქსირდა ფასის არაგონივრულად გაზრდა — რაც გულისხმობს ფასს, რომელიც ხარჯს და გონივრულ მოგებას მნიშვნელოვნად აღემატება — სააგენტო შესაბამის რეაგირებას მოახდენს. ჩვენი ანალიზი ეფუძნება საერთაშორისო სტანდარტებს და პრაქტიკას“, — განაცხადა ირაკლი ლექვინაძემ