Tipsy Baby არის ქართული ღვინის ბრენდი შექმნილი იმისთვის, რომ ყოველდღიურ ცხოვრებას ცოტა მეტი ბრწყინვალება შემატოს. მეტი ინფორმაციისთვის, Business Insider Georgia ბრენდის თანადამფუძნებელს ნინჩო ჯეირანაშვილს ესაუბრა.

როგორია კომპანიის საქმიანობის სფეციფიკა, როდის დაიწყეთ საქმიანობა და რას სთავაზობთ მომხმარებლებს?

Tipsy Baby დაახლოებით ერთი წლის წინ შეიქმნა. იდეა ეკუთვნის ჩემს პარტნიორს, ანდრია მირიანაშვილს, რომლის მიზანი იყო ახალგაზრდებზე გათვლილი, ხარისხიანი და მარტივად სასმელი ღვინის შექმნა. ბრენდინგი სრულად ჩვენი შექმნილია. ქარხანა და ვენახები მდებარეობს კახეთში, შილდაში.

ამჟამად, ჩვენი პროდუქცია წარმოდგენილია ისეთ ობიექტებში, როგორიცაა: 8000 მოსავალი, ალკორიუმი, სპარი, უამრავი ბარი და რესტორანი ქვეყნის მასშტაბით (თბილისი, ბათუმი, ქუთაისი, სვანეთი).

გარდა ამისა, ჩვენი პროდუქცია დიდ მოწონებას იმსახურებს უცხოეთშიც.
დიდ ბრიტანეთში ბრენდი მოკლე დროში განსაკუთრებულად პოპულარული და მოთხოვნადი გახდა. ასევე, ჩვენი ღვინო ხელმისაწვდომია გერმანიაში, ამერიკასა და ჩეხეთში.

როგორია მიმდინარე ასორტიმენტი?

ჩვენი ასორტიმენტი მოიცავს ხუთ ძირითად სახეობას: თეთრი მშრალი, თეთრი ნახევრად ტკბილი, წითელი მშრალი, წითელი ნახევრად ტკბილი და როზე. თითოეულ მათგანს აქვს საკუთარი ხასიათი და იდენტობა.

რას მიიჩნევთ კომპანიის კონკურენტულ უპირატესობად?

მთავარი კონკურენტული უპირატესობა იმაშია, რომ ღვინო გამოირჩევა მაღალი ხარისხით, აქვს ბიუჯეტური ფასი, თავსახური არის ხრახნიანი და იხსნება მარტივად (საცობის გარეშე).

როგორ აფასებთ მოთხოვნას ზოგადი თვალსაზრისით?

მოთხოვნა საკმაოდ მაღალია, განსაკუთრებით ახალგაზრდებსა და საშუალო ასაკის ადამიანებში. ბრენდს უკვე ჰყავს თავისი ერთგული მომხმარებელი.

აღსანიშნავია, რომ საქმიანობაში სრულად მეგობრები არიან ჩართულნი, იქნება ეს ფოტოების გადაღება თუ ნებისმიერი სხვა აქტივობა. სწორედ ამიტომ ყველაფერი მაქსიმალურად მეგობრული შინაარსითაა - Friends, Emotions…