Fredo Handmade ქართულ ბაზარზე 2015 წლიდან მოქმედი ბრენდია, რომელიც სპეციალიზებულია ხელნაკეთი ჩანთების, აქსესუარებისა და სამკაულების წარმოებაში. მეტი ინფორმაციისთვის, Business Insider Georgia ბრენდის დამფუძნებელს სოფი უზნაძეს ესაუბრა.

„Fredo Handmade შეიქმნა 2015 წელს. ვაწარმოებთ ხის და ტყავის კომბინაციით შექმნილ ხელნაკეთ ჩანთებს, მოხატული და მოქარგული თემატიკით “, - ამბობს ბრენდის დამფუძნებელი.

პროდუქციაზე მოთხოვნა სტაბილურად მზარდია. თვის განმავლობაში დაახლოებით 100-150 ჩანთის რეალიზება ხდება. სადღესასწაულო დღეებში კი ეს რიცხვი კიდევ უფრო იზრდება.

„დაწყების დღიდან მოთხოვნადია ჩვენი პროდუქცია. განსაკუთრებით, პერსონალური ნახატებით დამზადებული ჩანთები, რომელიც უნიკალურს ხდის ხელით მოხატულ ნამუშევრებს. თვის განმავლობაში დაახლოებით, 100-150 ჩანთის რეალიზაციას ვახდენთ “, - აღნიშნავს სოფი უზნაძე.

ბრენდს სხვადასხვა კონკურენტული უპირატესობა გააჩნია. მათგან ყველაზე მნიშვნელოვანი კი წლების განმავლობაში დაგროვილი ცოდნა და განსხვავებული დიზაინია.

„ჩვენი კომპანიის მთავარი კონკურენტული უპირატესობა პერსონალური დიზაინით დამზადებული ჩანთები და წლების განმავლობაში დაგროვილი გამოცდილებაა “, - აცხადებს ბრენდის დამფუძნებელი.

ბრენდმა სულ ახლახანს ასორტიმენტი გააფართოვა და მომხმარებელს ხელნაკეთი ხის ალბომი შესთავაზა. გარდა ამისა, Fredo Handmade აქტიურად ფიქრობს ექსპორტის საკითხზეც.

„მომხმარებელს ახალი პროდუქტი შევთავაზეთ ხელნაკეთი ხის ალბომის სახით, რომელიც მოგონებებს ინახავს. ჩანთების ახალი კოლექციის წარდგენას სექტემბრის დასაწყისში ვგეგმავთ. გვაქვს ექსპორტთან დაკავშირებული შემოთავაზება საფრანგეთსა და ამერიკაში, რომელსაც აქტიურად განვიხილავთ. ჩვენ მუდმივად ვცდილობთ განვითარებას და სიახლეების დანერგვას “, - განმარტავს ბრენდის დამფუძნებელი სოფი უზნაძე.

ცნობისთვის, ბრენდი მომხმარებლებს სთავაზობს როგორც მზა დიზაინებს, ასევე ინდივიდუალურ შეკვეთებს, რაც თითოეულ ჩანთას უნიკალურობას ანიჭებს. პროდუქციის შეძენა ონლაინ არის შესაძლებელი.