DOLO Merch ქართული კომპანიაა, რომელიც 2023 წლიდან ოპერირებს ბაზარზე და სუვენირებს, აქსესუარებსა და ტექსტილის პროდუქციას აწარმოებს. მიმდინარე საქმიანობისა და სამომავლო გეგმების შესახებ Business Insider Georgia კომპანიის დამფუძნებელს ქეთა ახობაძეს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

საქმიანობა 2023 წელს დავიწყეთ. თავდაპირველად, ვქმნიდით სუვენირებს ქალაქ თბილისის თემატიკით. ამ წამოწყებას პროექტის სახე ჰქონდა. შევქმენით თბილისის 8 სხვადასხვა ღირსშესანიშნაობის ფერადი გრაფიკული ვიზუალი, რომლითაც დავამზადეთ სუვენირები და აქსესუარები. მათ შორის: მაგნიტები, პოსკარტები, საკიდები, პასპორტის ჩასადებები, შარფები, მაისურები, ჩანთები, სამაგიდო თამაში და სხვა. აღსანიშნავია, რომ პროდუქციის დიზაინი არის ძალიან თანამედროვე, რაც ბაზარზე სიახლეა, რადგან ძირითადად ტრადიციული ნივთებია წარმოდგენილი. ამასთან ერთად, ძალიან დიდ აქცენტს ვაკეთებთ ხარისხზე. პროდუქცია გათვლილია როგორც უცხოელ, ისე ქართველ მომხმარებლებზე, რომლებსაც სურთ უცხოელ მეგობრებს და სტუმრებს და გააცნონ ახლებური თბილისი.

ორი წლის თავზე თბილისის სუვენირების პროექტთან ერთად შევქმენით სხვა თემატური კოლექციები და უკვე DOLO Merch-ის ბრენდის ქვეშ ვქმნით გამორჩეული დიზაინის პრინტ ატრიბუტიკას - ჩანთები, შარფები, მაისურები და სხვა.

საცალო სეგმენტის გარდა, დაგვემატა კორპორატიული მიმართულება. კომპანიებს ვთავაზობთ კორპორატიულ საჩუქრებს. ეს მიმართულება განსაკუთრებით აქტიური სადღესასწაულო პერიოდებში არის - ახალი წელი, 8 მარტი, აღდგომა და ა.შ, როდესაც კომპანიები თანამშრომლებს და პარტნიორებს სამახსოვრო საჩუქრებს ჩუქნიან.

როგორ აფასებთ მოთხოვნას ზოგადი თვალსაზრისით?

მოთხოვნა სეზონურია, როგორც კორპორატიულ, ისე საცალო ბაზარზე, სადღესასწაულო პერიოდში იმატებს მოთხოვნა. თუმცა ზოგადად, იქიდან გამომდინარე, რომ მუდმივად ვაახლებთ კოლექციებს, მოთხოვნა მზარდია.

რას მიიჩნევთ კომპანიის კონკურენტულ უპირატესობად?

ჩვენი მთავარი კონკურენტული უპირატესობა გამორჩეული დიზაინი და პროდუქციის ხარისხია, ასევე განსაკუთრებული სასაჩუქრე შეფუთვა, რომელიც ძალიან იზიდავს მომხმარებელს.

როგორია კომპანიის სამომავლო გეგმები?

ვფიქრობთ, გაყიდვების არხების დამატებას, როგორც ადგილობრივ ისე მსოფლიო ბაზარზე. ამჟამად, პროდუქცია იყიდება Etsy-ის პლატფორმაზე, თუმცა სხვა საერთაშორისო ვებ-გვერდებზეც ვფიქრობთ დამატებას.

ამასთან ერთად, მუდმივად ვაახლებთ კოლექციებს, ვამატებთ ახალ დიზაინებს და პროდუქციას.