Cake Show • ქეიქ შოუ ბაზარზე ოთხი წლის წინ გამოჩნდა და მომხმარებელს უნიკალური დიზაინით შექმნილ  სადღესასწაულო ტორტებს სთავაზობს. მეტი ინფორმაციისთვის Business Insider Georgia კომპანიის დამფუძნებელს, ნათია ჯოხაძეს ესაუბრა.

„Cake Show ოთხი წლის წინ გავხსენი ჩემს მეუღლესთან ერთად. ორივე თვითნასწავლი დიზაინერები ვართ და უკვე 13 წელზე მეტია, რაც ამ სფეროში ვმოღვაწეობთ. ჩვენი ნამუშევრების შექმნა საკმაოდ დიდ სირთულეებთან არის დაკავშირებული. ძირითადად, ინდივიდუალურ დიზაინზე ვმუშაობთ, რომელიც არასდროს მეორდება,“ - აღნიშნავს კომპანიის დამფუძნებელი.

როგორც ნათია ჯოხაძე განმარტავს, პროდუქციაზე მოთხოვნა და დაინტერესება მუდმივად მზარდია.

„მოთხოვნა ნამდვილად მზარდია. ყველაფერს მეუღლესთან ერთად ვაკეთებ. ის თითოეული ტორტისთვის ამზადებს საჭირო მექანიზმებს, კონსტრუქციებსა და განათებებს. თითოეული ფიგურა და დეტალი ხელით, შაქრის ცომისგან იძერწება, რაც ძალიან შრომატევადია. ამის შემდეგ მზადდება ტორტის შიგთავსი და სრულდება დეკორირება“, - ამბობს ნათია ჯოხაძე.

მომხმარებლები ძირითადად, საჭირო თემატიკას აწვდიან „ქეიქ შოუს“, რის შემდეგაც კომპანია მათ შესაბამისი დიზაინის არჩევანს სთავაზობს.

„როგორც წესი, თემატიკას გვეუბნებიან და შემდეგ ვთავაზობთ ესკიზებს. ხატვის შემდეგ ვიწყებთ ტორტზე მუშაობას. ყოფილა შემთხვევებიც, როცა მომხმარებელს წინასწარ არ ჰქონია წარმოდგენა, როგორი ტორტი ექნებოდა წვეულებაზე. დიზაინის შერჩევა სრულად ჩვენთვის მოუნდია და შედეგით აღფრთოვანებული დარჩენილა“, - აცხადებს კომპანიის დამფუძნებელი.

სამომავლოდ კომპანია გეგმავს სტუდიის გაფართოებას და ახალ პროექტებზე მუშაობის დაწყებას.

„ჯერ დეტალებზე საუბრის უფლება არ მაქვს, თუმცა გეტყვით, რომ განვიხილავთ ახალ პროექტებს და მოლაპარაკებებს ვაწარმოებთ უმსხვილეს კომპანიებთან პარტნიორობის თაობაზე. ასევე, ვგეგმავთ სტუდიის გაფართოებას. როგორც იცით, დაინტერესებულ პირებს ერთთვიან კონდიტერულ კურსებს ვთავაზობთ, რომლებიც ხელმისაწვდომია როგორც ფიზიკურად, ისე ონლაინ რეჟიმში“, - განმარტავს ნათია ჯოხაძე.

ცნობისთვის, „ქეიქ შოუ“ სადღესასწაულო ტორტებზე შეკვეთას მინიმუმ 2-3 კვირით ადრე იღებს, საქორწილო ტორტებზე კი მინიმუმ 2-3 თვით ადრე. ტორტები გამოირჩევა თემატური მრავალფეროვნებით, ზომითა და ფორმით.