Palomino Ranch • რანჩო პალომინო, რომელიც ბაზარზე 2023 წლის ბოლოდან ოპერირებს, ფართოვდება. როგორც Business Insider Georgia-სთან რანჩო პალომინოს თანადამფუძნებელმა ანა ნადირაძემ განაცხადა, რანჩოს ტერიტორიაზე მალე კაფე დაემატება, ხოლო სამომავლო გეგმებში განთავსების ობიექტის მშენებლობაც შედის.

„პრინციპში, უკვე მესამე წელია, რაც ბაზარზე ვართ და 2025 წელს, 2024 წელთან შედარებით, შემოსავლებში 260%-იანი ზრდა გვქონდა. ჩვენი მომხმარებლები ადგილობრივი ბაზრიდან ნაკლებად არიან, თუმცა ადგილობრივი სეგმენტის წილი ნელ-ნელა, წლიდან წლამდე იმატებს. ძირითადად გვყავს მომხმარებლები ევროპიდან. ასევე საკმაოდ ბევრი სტუმარი გვყავს ისრაელიდან და გალფის ქვეყნებიდან ჩამოსული ვიზიტორების სახით. ევროპიდან კი ძირითადად გერმანია, დიდი ბრიტანეთი და პოლონეთი ლიდერობს“, - აცხადებს ანა ნადირაძე.

რანჩო პალომინოს თანადამფუძნებელი ფიქრობს, რომ მომხმარებელთა რაოდენობის კუთხით, გასულ წელთან შედარებით, 2026 წელი უკეთესი იქნება.

„მიმდინარე წელს ძალიან პოზიტიურად ვუყურებ, იმიტომ რომ, როგორც წესი, ყველა ტურისტული ბიზნესისთვის თებერვალი ძალიან დიდი ჩავარდნის თვეა, თუმცა ჩვენ მაინც საკმაოდ ბევრი სტუმარი გვყავს. წინა წლების სტატისტიკას რომ ვადარებთ, იანვარსა და თებერვალში საკმაოდ დიდი ზრდა გვაქვს და მომართვიანობაც გვემატება. ეს იმითაც არის განპირობებული, რომ ჩვენი ციფრული წარმომადგენლობა იზრდება და რეიტინგიც გვემატება. რაც უფრო მეტი ადამიანი მოდის, მით უფრო იზრდება ჩვენი წილი ციფრულ სივრცეში და მგონია, რომ ესეც ერთ-ერთი მიზეზია. ამასთან ერთად, გარკვეულ მიმართულებებს ვავითარებთ, სხვადასხვა პლატფორმაზეც ვამატებთ ჩვენს სერვისებს და ასე შემდეგ. მგონია, რომ ჩვენი მომხმარებლების რაოდენობა წლიდან წლამდე აუცილებლად გაიზრდება“, – აცხადებს რანჩო პალომინოს თანადამფუძნებელი.

აღსანიშნავია, რომ რანჩო პალომინო სტუმრებს საცხენოსნო ტურებთან ერთად საცხენოსნო გაკვეთილებსაც სთავაზობს.

„ძირითადად, ამ ეტაპზე გვაქვს ერთსაათიანი, ორსაათიანი და ოთხსაათიანი ტურები. ყველაზე მოთხოვნადი, მაინც ვიტყოდი, ორსაათიანი ტურებია, რადგან ზოგისთვის ოთხსაათიანი ტური ზედმეტად ხანგრძლივია, ხოლო ერთსაათიანი - მოკლე, ამიტომ ორსაათიანი ტური შუალედურ ვარიანტს წარმოადგენს. ასევე გვაქვს საცხენოსნო გაკვეთილები, თუმცა ეს სერვისი ისეთი მოთხოვნადი არ არის, როგორც ტურები, რადგან ჩვენი საცხენოსნო ტურები სავსებით დამწყები მომხმარებლებისთვის არის განკუთვნილი და უფრო მეტად სათავგადასავლო ხასიათს ატარებს - ეს არის, ასე ვთქვათ, ბუნებაში გასვლა და ცხენებთან ერთად სეირნობა“, - ამბობს ანა ნადირაძე.

რანჩო პალომინო ტურებს სთავაზობს როგორც ჯგუფებს, ასევე ინდივიდუალურ ვიზიტორებს.

„შეგვიძლია როგორც ინდივიდუალური, ისე ჯგუფური ტურების ორგანიზება. მაგალითად, ამ ეტაპზე ერთდროულად 20 ადამიანის ტურზე გაშვება შეგვიძლია და ვგეგმავთ, რომ ზაფხულისთვის ეს რაოდენობა 25-მდე გავზარდოთ. ამისთვის ცხენების შეძენა უკვე დავიწყეთ და ივნისში ვფიქრობთ, რომ უკვე გვექნება 25 ცხენის ერთდროულად გაყვანის შესაძლებლობა“, - ამბობს რანჩო პალომინოს თანადამფუძნებელი.

დროთა განმავლობაში ბიზნესის გაფართოებისა და სერვისების გამრავალფეროვნების საჭიროება გაჩნდა, რის გამოც რანჩომ „აწარმოე საქართველოში“ საკონსულტაციო ცენტრს მიმართა. მიკროსესხის დახმარებით საკვები ობიექტის მშენებლობა დაიწყეს, რათა სტუმრებმა რანჩოზე დროის გატარება უფრო კომფორტულად შეძლონ.

„ვგეგმავთ, რომ კაფე უკვე პირველ მაისს გავხსნათ. საკვებ ობიექტში ძირითადად ოჯახური ტიპის მენიუ გვექნება – თუშური კერძები, რაც იქნება განსხვავებული და ჩვენი ნიშა.

რაც შეეხება ინვესტიციას, ამ ეტაპზე 300 000 უკვე ჩადებული გვაქვს და კიდევ რამდენს დავხარჯავთ, ჯერ არ ვიცით“, – აღნიშნავს ანა ნადირაძე.

კაფის ამოქმედების შემდეგ, რანჩო პალომინოს სამომავლო გეგმებში განთავსების ობიექტის მშენებლობაც შედის.

„აუცილებლად ვაპირებთ, რადგან ამის რეალური მოთხოვნა არსებობს. კაფის მშენებლობა ფაქტობრივად ჩვენი სურვილი კი არ იყო - სტუმრები გვთხოვდნენ, რომ გვქონოდა კვების ობიექტი, რადგან საცხენოსნო ტურიდან დაბრუნებულებს სურთ, რომ რამე მიირთვან ან დალიონ. ასევე მათთვის, ვინც ელოდება, მნიშვნელოვანია, რომ ლოდინის პროცესი მშვიდი და სასიამოვნო იყოს. იგივე ეხება სასტუმროსაც, რადგან ბევრს სურს ღამისთევით დარჩენა და მეტი დროის გატარება ცხენებთან, არა მხოლოდ იმ კონკრეტული დროის ფარგლებში, რასაც საცხენოსნო ტური მოიცავს. ჩვენ ამას აუცილებლად ვაპირებთ. უბრალოდ, წელს სხვა გეგმებიც გვაქვს – გარე სივრცის კეთილმოწყობა, კაფის გახსნა და ასე შემდეგ. თუმცა სამომავლო ხედვაში აუცილებლად გვაქვს ღამისთევის სივრცის მოწყობა, საუნისა და აუზის დამატება და სხვა გასართობი საშუალებების განვითარება“, – აცხადებს რანჩო პალომინოს თანადამფუძნებელი.

თბილისიდან სულ რაღაც 30 წუთის სავალზე, კასპის მუნიციპალიტეტის სოფელ ფერმაში, განსაკუთრებული საცხენოსნო სივრცე პალომინო რანჩო ფუნქციონირებს. რანჩო სტუმრებს სთავაზობს უნიკალურ შესაძლებლობას, გაეცნონ ადგილობრივი თუშური ჯიშის ცხენებს, რომლებიც თავისი გრაციოზულობითა და გამძლეობით არიან ცნობილები.

ადგილზე მოქმედებს საცხენოსნო სკოლა, სადაც სწავლება ინოვაციური მეთოდებით მიმდინარეობს.

პალომინო რანჩოს ერთ-ერთი მთავარი პრიორიტეტი ინკლუზიურობაა. გარემო სრულად არის ადაპტირებული ეტლით მოსარგებლე პირებისთვის, რაც მათ საშუალებას აძლევს სრულფასოვნად ჩაერთონ რანჩოს ცხოვრებაში.