სააგენტოს „აწარმოე საქართველოში“ თანადაფინანსებით რაჭაში კიდევ ერთი სასტუმრო გაიხსნება. „ნება ნება“ ასე ჰქვია სასტუმროს, რომელიც პირველი სტუმრების მიღებას რამდენიმე დღეში დაიწყებს. სასტუმრო ონის მუნიციპალიტეტში, სოფელ უწერაში მდებარეობს, რომელიც წლების უკან საკმაოდ პოპულარული კურორტი იყო. თუმცა უწერა აქტუალურობას არც დღეს კარგავს და აქტიურად მასპინძლობს ადგილობრივ თუ უცხოელ სტუმრებს.

როგორც  Business Insider Georgia-სთან სასტუმროს მფლობელმა გაგა მიქელაძემ განაცხადა, უწერაში დასვენებაზე მოთხოვნა მზარდია და უცხოელი დამსვენებლებიდან სოფელში ყველაზე დიდი რაოდენობით პოლონეთიდან ჩამოდიან. ტურისტების რაოდენობის პარალელურად იზრდება უწერაში განთავსების ობიექტების რაოდენობაც. 

„შენობა 5 წლის უკან ვიყიდე და ეტაპობრივად, საკუთარი ხარჯებით დავიწყე სასტუმროს აშენება. მშენებლობის შემდგომ ეტაპზე მოვიპოვე სააგენტოს „აწარმოე საქართველოში“ 100 000 ლარიანი დაფინანსება.

სასტუმროში სულ 8 სასტუმრო ნომერია, საიდანაც 3 ნომერი გათვლილია 4 სტუმარზე, ხოლო დანარჩენი სტანდარტულია ნომრებია. მთლიანობაში ერთდროულად 22 სტუმრის მიღება შემეძლება. გარდა ღამისთევისა ჩვენ პარტნიორების საშუალებით სტუმრებს სხვადასხვა საცხენოსნო ტურებს შევთავაზებთ“, - აცხადებს სასტუმროს მფლობელი.

„ნება ნება“ რაჭული გამოთქმაა და ნელა-ნელას, მშვიდად, აუჩქარებელს ნიშნავს. სწორედ იმიტომ, რომ სასტუმრო ნელა-ნელა შენდებოდა გადაწყდა, რომ მას სახელი შესაბამისადაც დარქმეოდა - „ნება ნება“.

გაგა მიქელაძის თქმით, „ნება ნება“-ს მშენებლობისთვის 1 მლნ ლარზე მეტი ინვესტიციაა განხორციელებული. სასტუმრო უკვე დევს საერთაშორისო დაჯავშნის პლატფორმებზე და უცხოელი სტუმრებისთვისაც ხელმისაწვდომია. 

სასტუმროში 4 ადგილიანი სასტუმრო ნომრის ფასი 220 ლარია, ხოლო 2 ადგილიანის - 150 ლარი. 

სოფელი უწერა რაჭაში მდინარე რიონის ნაპირებზე, ზღვის დონიდან 1050 მეტრზე მდებარეობს. კურორტი გამოირჩევა ულამაზესი ბუნებით, ტყეებით, ალპური მინდვრებითა და ყინულოვანი მწვერვალების საოცარი ხედებით. უწერა კლიმატურ-ბალნეოლოგიური კურორტია, ზომიერად ცივი ზამთრითა და ხანგრძლივი თბილი ზაფხულით. მისი მთავარი სამკურნალო ფაქტორებია მთის ჰავა და მინერალური წყალი „უწერა“. ეს კურორტი ერთ-ერთი შესანიშნავი ადგილია მთაში დასვენების მოყვარულთათვის. აქ შეძლებთ კომფორტულ გარემოში, სუფთა ჰაერზე ბუნების სიმშვიდეში განტვირთვას. უწერა ძალიან ლამაზია, როგორც ზაფხულის სიმწვანეში, ასევე შემოდგომის ფერადოვნებისას. იგი კულტურულ-ისტორიული თვალსაზრისითაც საინტერესოა, სოფელში და მის მიმდებარედ შეგიძლიათ მოინახულოთ შუა საუკუნეებისა ოთხი ეკლესიისა და ციხე სიმაგრის ნანგრევები.