სუვენირებისა და აქსესუარების ქართული ბრენდი Lepert, რომელიც ბაზარზე 5 წლის წინ გამოჩნდა მომხმარებელს სხვადასხვა სიახლეს სთავაზობს. კომპანიის პარტნიორი, გიორგი გრიგალაშვილი Business Insider Georgia -თან საუბარში აღნიშნავს, რომ ტურისტულ ზონაში, შავთელის ქუჩაზე დაემატა Lepert-ის ახალი მაღაზია, სადაც მასტერკლასებიც მიმდინარეობს.

რაიმე განსაკუთრებული სიახლე ხომ არ აქვს კომპანიას მიმდინარე ეტაპზე?

სიახლე გვაქვს იმ კუთხით, რომ ტურისტულ ზონაში, შავთელის 26 ნომერში დავამატეთ მაღაზია, რომელიც არის შოურუმი, სადაც წარმოდგენილია ჩვენი ნივთები. სივრცე ორიგინალურია იმით, რომ ადგილზე ტარდება არქეოლოგიური მასტერკლასები. ყოველდღე 13:00 – 14:00 საათის განმავლობაში მომსახურება სრულიად უფასოა. დანარჩენ პერიოდში კი არის ფასიანი, თუმცა ეს ფასი ფაქტობრივად არის თვითღირებულება. ჩვენი სურვილია მომხმარებლის დაინტერესება და მათთვის ჩვენი პროდუქციის გაცნობა.

 როგორია კომპანიის მიმდინარე ასორტიმენტი?

ასორტიმენტს დავამატეთ რამდენიმე ჭადრაკი. ეს არის ვეფხისტყაოსანი და ქართული ცეკვის ჭადრაკი. უახლოეს პერიოდში ვაპირებთ მუსიკის ჭადრაკის დამატებასაც. ასევე სიახლე გვაქვს ნივთების ზომებთან დაკავშირებით. წარმოება დავიწყეთ შედარებით დიდ ზომებში. დაახლოებით 30, 40, 50, 60 სმ-იან ნივთებს ვაწარმოებთ. გარდა ამისა, ვგეგმავთ ინტერიერისა და ექსტერიერის ქანდაკებების დამზადებას.

როგორ აფასებთ მოთხოვნას ზოგადი თვალსაზრისით?

მოთხოვნა და ინტერესი საკმაოდ მზარდია. არაერთი მომხმარებელი, რომელმაც თავდაპირველად შეიძინა ჩვენთან პროდუქცია კვლავ გვიბრუნდება. ამასთანავე, ხშირია შემთხვევები, როდესაც კომპანიის მიმართ ინტერესს გამოხატავენ მომხმარებლები, რომლებმაც პროდუქციის შესახებ ინფორმაცია მიიღეს ოჯახის წევრებისა და ახლო წრის რეკომენდაციის საფუძველზე. მომხმარებელთა ნაწილი კომპანიას უკავშირდება ინდივიდუალური იდეებითაც, მათ შორის კონკრეტული დიზაინის ან კონცეფციის გადმოტანის სურვილით მეტალის მასალებში. ამ ყველაფრის ფონზე აქტიურად ვფიქრობთ ექსპორტზეც.

როგორია კომპანიის სამომავლო გეგმები?

გვინდა, რომ დიდი ჰოლდინგი გავაკეთოთ, რომლის მართვასაც ჩვენს ხელში ავიღებთ. ვგეგმავთ, წარმოებაში სხვადასხვა მიმართულების დამატებას. იქნება ეს ხის, მეტალის, შავი ლითონის, მურანოს შუშისა თუ სხვა მიმართულებით, სადაც ჩვენი ნივთების ინტეგრირება მოხდება, ასევე გვსურს ჩვენი წარმოების ერთად თავმოყრა და მომხმარებლისთვის სრულყოფილი მომსახურების შეთავაზება.

აღსანიშნავია, რომ Lepert წარმოადგენს ქართულ ბრენდს, რომელიც აერთიანებს ხელოვნებას, კულტურასა და ინოვაციას, რაც მას განსაკუთრებულად მიმზიდველს ხდის როგორც ადგილობრივი, ისე საერთაშორისო მომხმარებლებისთვის.