Mkisa • მკისა ქართული აგროკომპანიაა, რომელიც 2020 წელს დაარსდა. კომპანიაში არსებულ სიახლეებსა და სამომავლო გეგმებთან დაკავშირებით Business Insider Georgia “მკისას“ მარკეტინგის მენეჯერს გიორგი გოგელიას ესაუბრა.   

რაიმე განსაკუთრებული სიახლე ხომ არ აქვს კომპანიას მიმდინარე ეტაპზე?

ამ ეტაპზე კომპანიის მთავარი სიახლე ახალი მიმართულების დანერგვაა. მოვიპოვეთ მსოფლიოში ერთ-ერთი წამყვანი სანერგე მეურნეობის და ჯიშების გენეტიკური გაუმჯობესების კომპანიის - “ფოლკრიკის” ოფიციალური ლიცენზია და მათ ორ გამორჩეულ მოცვის ჯიშს, “სეკოია ქრაჩსა” და” სეკოია გრანდეს” ქოთნებში ვაშენებთ. 

მოცვის ქოთნებში გაშენება თავის მხრივ ინოვაციური მიდგომაა. სპეციალური ქოთნები მოცვის ფესვების განსავითარებლად იდეალური გარემოა, რადგან ყველა საკვები ელემენტი ქოთანში თანაბრად ნაწილდება. ამასთან, ფესვებს საჭირო საკვები ელემენტები ავტომატური საკვებ-საირიგაციო სისტემის მეშვეობით მიეწოდება. პირველ ეტაპზე სეკოიას საკოლექციო ჯიშები 10 ჰექტარზე გაშენდება.

როგორ აფასებთ რამდენად მზარდია პროდუქციის მიმართ ინტერესი საერთაშორისო ბაზარზე? ადგილობრივ ბაზარზე?

Future Market Insights -ის  2025 წლის კვლევით, მოცვის გლობალური ბაზარი შეფასებულია 6.6 მილიარდ დოლარად და პროგნოზირებულია, რომ 2035 წლისთვის 13.2 მილიარდ დოლარამდე გაიზრდება. მოცვის გლობალური ბაზრის წლიური საშუალო ზრდის ტემპი 7.2% -ს შეადგენს (CAGR).

მოთხოვნის ზრდის მთავარი ფაქტორებია: მომატებული ინტერესი ანტიოქსიდანტებით მდიდარი საკვები პროდუქტების მიმართ. როგორც ცოცხალი, ასევე დამუშავებული მოცვის მზარდი გამოყენება საკვებ პროდუქტებში, სასმელებში, კოსმეტიკაში და სხვა. ამასთან ერთად, IBO (International Blueberry Association)- ისა და სხვა მრავალი ავტორიტეტული ორგანიზაციების პროგნოზებზე დაყრდნობით, მსოფლიოში მოცვის მიმართ მოთხოვნისა და მიწოდების პროპორციით, მიწოდების მაჩვენებელი ჯერ კიდევ ვერ აკმაყოფილებს მოთხოვნას.

რაც შეეხება ადგილობრივ ბაზარს, საქართველოს კონკურენციისა და მომხმარებლის დაცვის სააგენტოს დასკვნით 2020 წლიდან 2024 წლის ჩათვლით ექსპორტის მოცულობა გაიზარდა 660% -ით.

შიდა და გარე კვლევებზე დაფუძვნებული პროგნოზების თანახმად, 2025 წელს საქართველოდან მოცვის ექსპორტი მიაღწევს 7,000-8,000 ტონას, ხოლო 2028 წლისთვის მოსალოდნელია 20,000-25,000 ტონის ექსპორტი. ეს ზრდა განპირობებულია პლანტაციების ზრდითა და ექსპორტის ბაზრების დივერსიფიკაციით.

რას მიიჩნევთ კომპანიის კონკურენტულ უპირატესობად?

კომპანიის მთავარი უპირატესობა მისი სრულყოფილი ღირებულებათა ჯაჭვია. მიწის შერჩევიდან დაწყებული, პროდუქტის რეალიზაციამდე, (იქნება ეს დარგვა, მოვლა, მოსავლის აღება თუ შენახვა) ყველა ეტაპი კომპანიის შიდა რესურსით ხორციელდება. 

"მკისა" პროფესიონალების დიდი გუნდითაც უნდა გამოვარჩიოთ, როგორც აგრონომიის, ისევე საოპერაციო მართვის მიმართულებით. მკისას მასშტაბური და გრძელვადიან განვითარებაზე ორიენტირებული სტრუქტურა უზრუნველყოფს როგორც შედეგების მაქსიმიზაციას, ასევე ხარჯების ეფექტურ ოპტიმიზაციას. 

ასევე უნდა ითქვას, რომ „მკისა“ საერთაშორისო სტანდარტების შესაბამისად მუშაობს: იქნება ეს ნაყოფის უვნებლობაზე შემოწმება ადგილობრივ და უცხოურ ლაბორატორიებში, თუ ხარისხის დასტური ისეთი ავტორიტეტული სერთიფიკატებით, როგორიცაა Global G.A.P. და სხვა.

როგორია 2025 წლის გეგმები?

2025 წელს მკისა მიზნად ისახავს კიდევ უფრო აქტიურ გაფართოებას, როგორც ტერიტორიული განვითარების, ისე ოპერაციული სისტემების ზრდისა და დახვეწის კუთხით. ეს პროცესი უკვე დაწყებულია: გაშენდა დამატებით 60 000 ახალი ნერგი, რაც მოცულობისა და მოსავლიანობის მხრივ 45% -იან ზრდას წარმოადგენს. 

გაფართოებასთან ერთად, ხორციელდება თანამედროვე კულტივაციის მეთოდებისა და გენეტიკურად დახვეწილი ჯიშების დანერგვა, რაც ეფექტურობის თვალსაზრისით, მნიშვნელოვანი პროგრესის საფუძველს ქმნის. 2025 წლის განმავლობაში განსაკუთრებული აქცენტი გაკეთდება აგროტექნიკური პრაქტიკების ოპტიმიზაციაზე, ინოვაციური მიდგომების გაღრმავებასა და მექანიზაციის დონეზე ფუნქციური პროცესების გაუმჯობესებაზე. რომ შევაჯამოთ, მკისას მიზანია გაზრდილი მოცულობა, გაუმჯობესებული ხარისხი და ოპერაციული მოქნილობა, რაც აგროსფეროს გლობალურ ბაზარზე საქართველოსა და "მკისას" პოზიციებს კიდევ უფრო გაამყარებს.