IkoKids  არის ქართული საბავშვო ბრენდი, რომელიც 2019 წლიდან ოპერირებს ბაზარზე. კომპანია მომხმარებელს სთავაზობს ეკო მეგობრულ, ხელნაკეთ, განმავითარებელ სათამაშოებს და ოთახის უნიკალურ დეკორაციებს. Business Insider Georgia კომპანიაში არსებულ სიახლეებსა და სამომავლო გეგმებთან დაკავშირებით IkoKids -ის დამფუძნებელს ია შენგელიას ესაუბრა. 

რაიმე განსაკუთრებული სიახლე ხომ არ აქვს კომპანიას მიმდინარე ეტაპზე?

ვემზადებით საერთაშორისო გამოფენისთვის Pitti Bimbo, რომელიც 25-26 ივნისს ფლორენციაში გაიმართება. ამ გამოფენაზე „აწარმოე საქართველოში“ მხარდაჭერით მოვხვდით. შერჩეულია 8 ქართული კომპანია რომელთა შორის ერთ-ერთი ჩვენც ვართ.  

როგორია მოთხოვნა ზოგადი თვალსაზრისით?

მოთხოვნა ჩვენს პროდუქციაზე სტაბილურად მზარდია, რაც თავის მხრივ განპირობებულია ასორტიმენტის მუდმივი ზრდით. დავამატეთ ახალი პროდუქტები, რომლებიც მიზანად ისახავს ბავშვთა განვითარების ხელშეწყობას. აღნიშნული პროდუქციის მიმართ დაინტერესება მკვეთრად გაიზარდა როგორც მშობლების, ასევე საბავშვო ბაღების მხრიდან.

რომელი ტიპის პროდუქცია დაემატა ასორტიმენტს?

კომპანიის პროდუქციის ასორტიმენტს დაემატა რამდენიმე სახეობის თოჯინების თეატრი, რომელმაც განსაკუთრებული ინტერესი გამოიწვია საბავშვო ბაღების მხრიდან. ასევე, დავამატეთ კიდევ ერთი ახალი პროდუქტი სათამაშო-ტრანსფორმერი, რომელიც წარმოადგენს განმავითარებელ რბილ ავეჯს. აღნიშნული პროდუქტი კომპანია „თვითთან“ კოლაბორაციით შეიქმნა. დაინტერესება ამ კონკრეტული პროდუქტის მიმართ განსაკუთრებით დიდია განმავითარებელი ცენტრების მხრიდან. 

როგორია კომპანიის სამომავლო გეგმები?

აქტიურად ვგეგმავთ კომპანიის გაფართოებას და ვორქშოპებისთვის განკუთვნილი სივრცის დამატებას. აღნიშნული მიმართულებით დაინტერესება მნიშვნელოვნად გაზრდილია როგორც მშობლების, ისე ბავშვების მხრიდან. ვფიქრობთ, რომ ამ მიმართულებითაც შევძლებთ მრავალფეროვნების შეთავაზებას მომხმარებლებისთვის.