ავაშენეთ სამაცივრე მეურნეობა, რომელიც 600 ტონიან მაცივარს მოიცავს. ამის შესახებ, Business Insider Georgia -ს Harvest • მოსავალის პროექტების ხელმძღვანელმა თამარ ბერულავამ განუცხადა.

„ამ ეტაპზე დავიწყეთ ხილის კრეფა და პირველად ვკრეფთ მსხალს. გარდა ამისა, ავაშენეთ სამაცივრე მეურნეობა, რომელიც 600 ტონიან მაცივარს მოიცავს. აქ მოხდება ხილის ნაწილის დასაწყობება და შემდგომ მისი რეალიზაცია “, - ამბობს თამარ ბერულავა.

კომპანიის ასორტიმენტი მრავალფეროვანია და მოიცავს როგორც ხილს ასევე თხილეულს.

„ამჟამად გვაქვს ვაშლატამა და ატამი, ასევე ველოდებით ბრტყელ ატამს. ამ დროისთვის იკრიფება მსხალი, გვაქვს ასევე ვაშლიც, ხოლო სეზონის დასასრულს, სექტემბრის ბოლოსა და ოქტომბრის დასაწყისში დაიკრიფება ნუში “, - აღნიშნავს კომპანიის პროექტების ხელმძღვანელი.

„მოსავალის“ პროდუქციაზე მოთხოვნა სტაბილურად მზარდია.

„მზარდია მოთხოვნის ტენდენცია. ამ ეტაპზე ჩვენს პროდუქტს ვყიდით ქსელურ მაღაზია „ნიკორაში“ და ასევე შეძენა შესაძლებელია უშუალოდ ჩვენი ბაღიდან, საიდანაც პროდუქციის რეალიზაცია ხორციელდება როგორც კერძო მომხმარებლებზე, ისე კომპანიებზე, რომლებიც ტონობით ყიდულობენ და შემდეგ ან ექსპორტზე გააქვთ, ან ადგილობრივ ბაზარზე ყიდიან “, - განმარტავს თამარ ბერულავა.

კომპანია სამომავლოდ, პროდუქციის გატანას საერთაშორისო ბაზრებზე გეგმავს.

„ვფიქრობდით, რომ ბაღი სრულ მსხმოიარობაში წელს შევიდოდა, თუმცა ყინვებისა და არასასურველი ამინდების გამო მოსავლის გარკვეული ნაწილი დაზიანდა. ეს პრობლემა მთლიან რეგიონს შეეხო. შესაბამისად, მომავალი წლიდან ვგეგმავთ ჩვენი პროდუქციის საზღვარგარეთ გატანას “, - აცხადებს კომპანიის პროექტების ხელმძღვანელი.

„მოსავალი“ ამჟამად 35 ადამიანს ასაქმებს.