ხის სათამაშოებისა და ფუნქციური ავეჯის მწარმოებელი ქართული კომპანია Gogora • გოგორა მომხმარებელს სხვადასხვა სიახლეს სთავაზობს. ამის შესახებ, Business Insider Georgia -ს კომპანიის თანადამფუძნებელმა ნინო რაზმაძემ განუცხადა. მისივე თქმით, ერთ-ერთი სიახლე „გოგორას DIY“ ხაზის დამატებაა, რამაც პროდუქცია კიდევ უფრო მეტად ხელმისაწვდომი გახადა.

როგორია კომპანიაში არსებული სიახლეები?

ზოგადად, „გოგორას“ მისია არის მეტი ხელმისაწვდომობა ბავშვებისთვის უსაფრთხო და ეკოლოგიურად სუფთა გარემოზე. ამ მისიიდან გამომდინარე, ჩვენი პროდუქტების ხარისხი არის ძალიან მაღალი და ევროპული სტანდარტების. ყოველთვის ვცდილობთ, რომ ფასი იყოს ხარისხთან მიმართებაში ბევრად დაბალი. კიდევ უფრო მეტი ხელმისაწვდომობისთვის მოვიფიქრეთ ასეთი რაღაც, რომ ჩვენი პროდუქტები გაიყიდოს გაულაკავ მდგომარეობაში. იყოს ცალკე გასალაკი ბოქსი და სურვილის შემთხვევაში მომხმარებელმა თავად გალაკოს. ეს გვაძლევს ფაქტობრივად ფასის განახევრების შესაძლებლობას და უფრო მეტ ხელმისაწვდომობას, გარდა ამისა, საშინაო მოხმარებაში პროდუქტი შეიძლება დარჩეს გაულაკავ მდგომარეობაშიც. ზოგს პირიქით, მსგავსი მოთხოვნა აქვს. ძალიან ბევრი წარმატებული და საერთაშორისო ბრენდია, რომელიც „Without finishing / Not finished" ამ დასახელებით დასრულების ანუ ლაკის გარეშე ყიდის პროდუქტს. ზოგიერთი კომპანია ერთხელ გალაკულს ყიდის, ზოგი ორჯერ გალაკულს, ზოგი სრულად გაულაკავს და არასოდეს არ ხდება აღნიშვნა თუ რამდენი ფენა ლაკია წასმული. რეალურად, ეს არის ფასის კუთხითაც და ხარისხის კუთხითაც ძალიან მნიშვნელოვანი. შესაბამისად, მომხმარებელი, რომელიც ჩვენს დასრულებულ პროდუქტს შეიძენს ინფორმირებული იქნება, რომ ორ ფენად არის გალაკული, ხოლო თუ შეიძენს DIY ხაზის პროდუქტს, ის იქნება გაულაკავ მდგომარეობაში, რომელიც ზუსტად ისეა დამუშავებული, როგორც სხვა დანარჩენი პროდუქტი და სახლის პირობებში ექნება შესაძლებლობა რომ თავად გალაკოს.
ცნობიერების კუთხით, მნიშვნელოვანია მომხმარებელს ჰქონდეს ზუსტი ინფორმაცია თუ რას ყიდულობს და გარდა ამისა, ხდება საშინაო აქტივობების ხელშეწყობაც. ამ პროდუქტების დამზადება ბავშვებთან ერთად შეუძლიათ მშობლებს. ბოქსში არის ყველაფერი რაც საჭიროა გალაკვისთვის. მათ შორის, ძირს დასაფენი ქაღალდიც კი და პროცესი არის ძალიან მარტივი. ეს ყველაფერი ცირკულარული ეკონომიკის კუთხითაც ძალიან მნიშვნელოვანია, როდესაც ჩვენ საწარმოში პროდუქტების გალაკვას ვახდენთ ვიყენებთ სპრეის, რომელიც გაიფრქვევა გარემოში და გვრჩება ბევრი ნარჩენი. მათ შორის, ლაკის ყუთები. საშინაო პირობებში კი ხდება ფუნჯით დამუშავება. შესაბამისად, გარემოზე ზიანიც მინიმალურია. ყველა ეს ატრიბუტი რაც ახლავს ჩვენ DIY ბოქსს არის მრავალჯერ გამოყენებადი. მათ შორის, ნაჭერი რომლითაც შემდეგ ნაწილაკებისგან უნდა გაასუფთაონ, ტომსიკები და ა.შ. ყველაფერი არის ეკომეგობრული შეფუთვა. ყველა პროდუქტზე იმუშავებს DIY ხაზი და მომხმარებლებს შეეძლებათ იყიდონ პროდუქტი, როგორც დასრულებული ისე DIY მიმართულებიდან.

სიახლე ისიც, რომ ჩვენი საწარმო გაცილებით დიდ სივრცეში გადავიდა, სადაც გრძელვადიან პერსპექტივაში ვიქნებით.

როგორია კომპანიის სამომავლო გეგმები?

ჩვენი მთავარი სწორება არის იმაზე, რომ შევინარჩუნოთ, როგორც ბითუბი, ასევე ბითუსი ხაზი. ჩვენი მისიიდან გამომდინარე არ გვსურს, რომ ბითუს მომხმარებელს მოაკლდეს შესაძლებლობა სახლის პირობებში შექმნან ეს გარემო, მაგრამ მთავარ პრიორიტეტად დარჩება ბითუბი მიმართულება. ჩვენ ვზრუნავთ ბავშვებისთვის უსაფრთხო გარემოს შექმნაზე, ბავშვები კი ყველაზე დიდ დროს ატარებენ ბაღში. იქნება ეს სახელმწიფო თუ კერძო ბაღი. კერძო ბაღებისთვის ჩვენ გავაკეთეთ ბითუბი ონლაინ პლატფორმა, სადაც რეგისტრირდებიან და ჩვენ მათ ყოველკვირეულად ახალ-ახალ შეთავაზებებს ვთავაზობთ. გარკვეული რაოდენობის შემთხვევაში პროდუქციაზე ფასი იკლებს. ჩვენთვის, როგორც კომპანიისთვის ეკოლოგიური, ეფექტურობისა და სხვა თვალსაზრისით, მნიშვნელოვანია ერთი დასახელების პროდუქტის დიდი რაოდენობით წარმოება. ბაღს არ სჭირდება მაგალითად, 15 შვედური კედელი ამიტომ შვედური კედლის ირგვლივ ერთიანდება 15 ბაღი. სპეციალური შესავსები ფორმა არის, რომელსაც ავსებენ და ეს ბითუბი პლატფორმა გავხადეთ ხელმისაწვდომი ბითუსი მომხმარებლისთვისაც. ფასი ძალიან მნიშვნელოვანია. ჩვენ, მომხმარებლებს არ ვყოფთ ფინანსური შემოსავლების მიხედვით. ჩვენი მომხმარებელი ის არის ვინც ზრუნავს ბავშვის განვითარებაზე. პრიორიტეტად რჩება ბითუბი მიმართულება, ბაღებთან მუშაობა და ჩვენი მთავარი ოცნება არის რომ სახელმწიფო ბაღებში მოვახერხოთ ლამინატის საფრთხის შემცველი და სრულიად არამდგრადი ავეჯის ჩანაცვლება, ეკოლოგიურად სუფთა ავეჯით. ამას ჩვენ ვახერხებთ ცალკეული პროდუქტების შემთხვევაში მაგალითად, ფიზიკური აქტივობის ავეჯით, მაგრამ მთლიანი ბაღების მოწყობა რომ მოხდეს ასეთი პროდუქტებით ეს ჯერ-ჯერობით გზაშია. ახლა ამ საკითხზე ვმუშაობთ და ეს პრეცედენტი იქნება საოცრება. ქვეყნისთვის ძალიან წინ გადადგმული ნაბიჯი იმიტომ რომ მსგავსი რაღაც სამწუხაროდ ჯერ საქართველოში არ მომხდარა რომ სახელმწიფო ბაღში ბავშვებისთვის იყოს ხელმისაწვდომი ეკოლოგიურად სუფთა და უსაფრთხო ავეჯი.