ენგური ატრაქცია • Enguri attractions-ი წელს ვიზიტორებს ამჯერადაც სიახლეებს უმზადებს. როგორც Business Insider Georgia-სთან „ენგური ატრაქციის“ დირექტორმა ნიკოლოზ ანთიძემ განაცხადა, საერთაშორისო ვიზიტორების დადებითი სტატისტიკიდან გამომდინარე ტურისტულ ლოკაციაზე ვიზიტორების ზრდაა მოსალოდნელი.

„მიმდინარე ტურისტულ სეზონზე მოლოდინები დიდი გაქვს. გამომდინარე იქიდან, რომ საქართველოში საერთაშორისო ვიზიტორების სტატისტიკაში არის საკმაო ზრდა. შესაბამისად მოლოდინი გაქვს, რომ ზრდა ჩვენს ატრაქციაზეც აისახება.

ზოგადად „ენგური ატრაქცია“ სეზონს არ ხურავს და მთელი წლის განმავლობაში მზადაა ვიზიტორები მიიღოს. უბრალოდ გარკვეულწილად ნაკადების კლება არის ოქტომბრის ბოლოდან. „ენგური ატრაქციაზე“ ვიზიტორების შემოდგომა-ზამთრის პერიოდშიცაა, თუმცა არა ის რაოდენობა რაც მაღალ სეზონზე გვყავს. სეზონი კი მაისიდან ოქტომბრის ჩათვლით გრძელდება.

შარშან გვყავდა 54 ათასი ვიზიტორი. გასულ წელს „ენგური ატრაქციას“ დაემატა ახალი ლოკაციები, ესენია პეტროგლიფების გალერეა. ასევე სუვენირების მაღაზია. გარკვეული სიახლეები წელსაც გვექნება. ივნისის შუა რიცხვებიდან გაიხსნება ზიპლაინი. ყველაფერი კაშხლების შესახებ - ვიზიტორთა ცენტრში მოეწყობა მუზეუმი, რომლის მოწყობაზეც შესაბამისი ტენდერი უკვე გამოცხადებულია. მუზეუმის გახსნა მოხდება წლის ბოლომდე“, - აცხადებს ნიკოლოზ ანთიძე.

მუზეუმში განთავსებული იქნება ინფორმაცია მსოფლიო კაშხლების შესახებ.

„მუზეუმში იქნება არამხოლოდ ექსპონანტი, არამედ ის მთლიანობაში მოიცავს მსოფლიოში ყველაფერს კაშხლების შესახებ. იქნება ზოგადი მიმოხილვა რა შენდება, რა ფუნქციით შენდება, რა მასალით შენდება. მსოფლიოში უძველესი კაშხლები რომლებია და მათ შორს ენგურიც იქნება დეტალური ინფორმაცია. ასევე მუზეუმში ინფორმაცია იქნება თახვზე, რომელიც ბუნებრივად აშენებს კაშხლებს. თახვი ერთ-ერთი ცნობილი კაშხალთმშენებელია. ინფორმაცია წარმოჩინებული იქნება თანამედროვე ტექნოლოგიებით, თუმცა სხვადასხვა ნივთებიც იქნება გამოფენილი. მუზეუმში როდესაც ადამიანი შევა დეტალურ ინფორმაციას მიიღებს რატომ და რა ფუნქციით შენდება კაშხლები“ - აცხადებს „ენგური ატრაქციის“ დირექტორი.

რაც შეეხება ზიპლაინს ის 700 მეტრამდე იქნება და მისი სარგებლობის შემთხვევაში ენგურჰესის კაშხლის ზემოდან დანახვაა შესაძლებელი.

„გადასახედის მოედანთან განთავსდება ზიპლაინის ზედა სადგური, ხოლო კაშხლის შემდეგ იქნება მეორე სადგური. ანუ მოხდება კაშხალზე გადაფრენა. ზიპლაინის სიგრძე 700 მეტრამდეა. მის მოწყობაზე ხელშეკრულება უკვე გაფორმებულია და სამუშაოები დაწყებულია“, - ამბობს „ენგური ატრაქციის“ დირექტორი.

„ენგური ატრაქცია“ გახლავთ სახელმწიფო ორგანიზაციაა, რომლის მიზანიც ენგურჰესის თაღოვან კაშხალზე ტურისტული ინფრასტრუქტურის მოწყობა და შემდგომში მისი მართვაა.

მე-20 საუკუნის 60-70-იან წლებში აშენებული ენგურის ჰიდროელექტრო კაშხალი საქართველოში სამოქალაქო ინჟინერიის მიღწევების ერთ-ერთი თვალსაჩინო მაგალითია. ობიექტები, რომლებიც ენგურჰესის შემადგენლობაში შედის, თითქმის ათას კვადრატულ კილომეტრს მოიცავს ქალაქ ჯვარიდან შავ ზღვამდე.მასში შედის ჰიდროელექტროსადგურების კასკადი, მათ შორის ენგურის თაღოვანი კაშხალი და 400-მდე გვირაბი და არხი, რომელთაგან ყველაზე გრძელი დაახლოებით 15 კილომეტრია. ქალაქ ჯვარში, მდინარე ენგურის ვიწრო კანიონში, ჩრდილო-დასავლეთ საქართველოს თვალწარმტაცი პეიზაჟებით აშენებული ენგურის თაღოვანი კაშხალი 1978 წლიდან ფუნქციონირებს. ენგური 271,5 მეტრი სიმაღლით მსოფლიოში ერთ-ერთი ყველაზე მაღალი თაღოვანი კაშხალია.ადგილის კულტურული ფასეულობების გათვალისწინებით, 2015 წელს ენგურის თაღოვან კაშხალს მიენიჭა ეროვნული მნიშვნელობის სამრეწველო მემკვიდრეობის სტატუსი.

2021 წლის ნოემბრიდან ვიზიტორებს აქვთ უნიკალური შესაძლებლობა ნახონ თაღოვანი კაშხლის ყველა მიმზიდველი ობიექტი და გაეცნონ ჰიდრო რესურსების გამოყენებით ენერგიის წარმოების ძირითად ასპექტებს.

2022 წლიდან ენგურის კაშხალი ევროპის ინდუსტრიული მემკვიდრეობის მარშრუტის წევრი გახდა.