სააგენტოს „აწარმოე საქართველოში“ მხარდაჭერით, სინგაპურში, აზიის წამყვან საკვები და სასმელი პროდუქტების საერთაშორისო გამოფენაზე FHA (Food & Beverage Trade Show), 10-მა ქართულმა კომპანიამ მიიღო მონაწილეობა. მათ შორის იყო ნატურალური წვენების მწარმოებელი კომპანია „მაისი“.  გამოფენის შედეგებთან და სამომავლო გეგმებთან დაკავშირებით, Business Insider Georgia კომპანიის თანადამფუძნებელს მარიამ ქოიავას ესაუბრა. მისივე თქმით, კომპანიისთვის ძალიან საინტერესო იყო მსოფლიოს ერთ-ერთ უდიდეს გამოფენაზე წარდგენა და საკუთარი პროდუქციის გაცნობა პოტენციური პარტნიორობის მიზნით.

„ზოგადად, სინგაპურის გამოფენა ქართველი მეწარმეებისთვის იყო პირველი. საქართველო პირველად იყო წარმოდგენილი FHA (Food & Beverage Trade Show) -ზე. რეგიონი არის ძალიან საინტერესო და პერსპექტიული, როგორც ნიშური,ასევე კონკურენტული პროდუქტებისთვის. ამასთანავე, არის საკმაოდ მჭიდროდ დასახლებული და ამ რეგიონის ერთ-ერთ მნიშვნელოვან ჰაბად ითვლება სინგაპური. თვითონ სინგაპურიც საკმაოდ საინტერესოა იმის გათვალისწინებით თუ რაოდენ პატარა ადგილს იკავებს ეს ქვეყანა, მოსახლეობით 6 000 000 ადამიანი. ეს ბაზარი ძალიან მაღალი მხარჯველობით უნარიანობით გამოირჩევა. მათი GDP per capita არის 85 000 დოლარამდე, რაც საკმაოდ დიდი მაჩვენებლია და ხდის ამ ქვეყანას ერთ-ერთ მიმზიდველ ქვეყანად. ამიტომ მგონია, რომ ძალიან კარგი იყო პირველი ნაბიჯის გადადგმა ამ ბაზარზე. სულ 10 ქართველი მწარმოებელი ვიყავით წარმოდგენილი და მგონია რომ ამ ბაზრის მოსასინჯად და პირველი ნაბიჯების გადასადგემლად აუცილებელი ნაბიჯი იყო და ძალიან კარგია რომ „აწარმოე საქართველოში“ მოგვცა ეს შესაძლებლობა და ვიყავით იქ წარდგენილები. ზოგადად, ძალიან რთულია გამოფენის შეფასება ერთი ან ორი კვირის შემდეგ. მთავარი არის ის რომ ინტერესი იყო, ახალი კონტაქტებიც შევიძინეთ, რომელთანაც გავაგრძელებთ მომდევნო თვეების განმავლობაში მუშაობას და ცალსახად, დიდი იმედი გვაქვს რომ წარმატებით ანუ ამ შემთხვევაში იმ რეგიონში ექსპორტით დასრულდება, თუმცა წინასწარ მოლოდინის შექმნა რთულია რადგან ძალიან ბევრ ფაქტორზე არის დამოკიდებული საბოლოო ჯამში კონკრეტულ ქვეყანაში საქართველოდან ექსპორტი წავა თუ არა მაგრამ მოლოდინი პოზიტიური ნამდვილად გვაქვს.

ცნობისთვის, ღონისძიებას ყოველწლიურად 57,000-ზე მეტი პროფესიონალი ვიზიტორი ესწრება, ხოლო მონაწილე კომპანიების რაოდენობა 2,000-ს აღემატება.

FHA – Food & Beverage Trade Show აზიის ერთ-ერთი უმსხვილესი გამოფენაა საკვები და სასმელი პროდუქტების ინდუსტრიაში. ღონისძიება მსოფლიო ბრენდებს, მწარმოებლებს, დისტრიბუტორებსა და სავაჭრო პარტნიორებს აერთიანებს.