ქუთაისში მდებარე დესერტების მაღაზია Mochiko • მოჩიკო პირველი საოჯახო საწარმოა, რომელიც მომხმარებელს მოჩის იაპონურ ტკბილეულს სთავაზობს. კომპანიამ ასორტიმენტი გააფართოვა და მომხმარებელს ტორტებისა და ნამცხვრების ხაზი შესთავაზა. ამის შესახებ, Business Insider Georgia -ს კომპანიის დამფუძნებელმა თაკო კინწურაშვილმა განუცხადა.

როგორია კომპანიის მიმდინარე სიახლეები?

მთავარი სიახლე გვაქვს ის, რომ უახლოეს პერიოდში ქუთაისში საუკეთესო ფესტივალში „გემო ფესტში“ ვიღებთ მონაწილეობას. აქ ვიქნებით ორი დღე და ჩვენს ასორტიმენტს წარვადგენთ. წინა წელსაც მივიღეთ მონაწილეობა, თუმცა მაშინ სათანადოდ არ ვიყავით მომზადებული, რადგან ფესტივალში მონაწილეობის გადაწყვეტილება სწრაფად იქნა მიღებული. ახლა კი მომხმარებელს წარვუდგენთ ძალიან კარგ ასორტიმენტს და ვფიქრობთ, რომ ამ ფესტივალში მონაწილეობა ჩვენი ცნობადობისთვის ძალიან სასარგებლო იქნება, რადგან წინა წლის გამოცდილებამ კარგი შედეგი გამოიღო. გარდა ამისა, ვმუშაობთ სხვა ფესტივალებზეც, თუმცა მეტი დეტალის გაზიარება ამ ეტაპზე არ შემიძლია, რადგან მოლაპარაკების პროცესში ვართ, ასევე ვმუშაობთ შეფუთვების გაუმჯობესებაზე და როგორც კი ეს საკითხი მოგვარდება, ლოკალურ ბაზარზე თანამშრომლობას შევძლებთ.

ჯერ-ჯერობით ქუთაისის ფარგლებს არ ვცდით, რადგან ნაყინი პრობლემურია, შიგთავსი გაყინულია და ტრანსპორტირება რთულია, დაგროვილი გამოცდილებით კმაყოფილები არ ვართ. ამიტომ ამ ეტაპზე ვგეგმავთ ლოკალურ ბაზარზე არსებულ ქსელებში შესვლას, რის შემდეგაც გაფართოების შესაძლებლობებსაც განვიხილავთ.

როგორია კომპანიის მიმდინარე ასორტიმენტი?

ასორტიმენტს დავამატეთ ტორტების და ნამცხვრების ხაზი. ვთანამშრომლობთ რესტორნებთან, ასევე წარმოდგენილები ვართ სხვადასხვა წვეულებებზე.

არსებულ მოჩის სახეობას დაემატა რამდენიმე ახალი გემო. ერთ-ერთი არის დუბაის მოჩი, რომელზეც მოთხოვნა ძალიან მაღალია მომხმარებლის მხრიდან, ასევე ახლა ვტესტავთ ფელა მოჩს, რომლის ცომშიც არის ბადაგი და ჩვენი ხელნაკეთი ვანილის ნაყინი. „გემო ფესტზე“ წარმოდგენილი გვექნება მოჩის ეს სახეობა, რომელსაც შემდეგ დავამატებთ ასორტიმენტს და ჩვენს მაღაზიაშიც გაიყიდება.

როგორია კომპანიის სამომავლო გეგმები?

ჩვენი საწარმო და არსებული მაღაზია მდებარეობს შედარებით გარე უბანში. ამ ეტაპზე ვმუშაობთ ქალაქის ცენტრის სიახლოვეს პატარა Take Away კაფის გახსნაზე, სადაც ადგილზე დამზადდება ბევრი დესერტი და გაიყიდება ჩვენი პროდუქტებიც. ამჟამად, ფართის ძებნის პროცესში ვართ, რათა განვთავსდეთ ლოკალურად ისეთ ადგილზე, სადაც ბევრი ტურისტი მოძრაობს და ხალხმრავალი გარემოა. ამ ეტაპზე არ გვაქვს აქტიური კავშირი ტურისტებთან, ამიტომ მნიშვნელოვანია, რომ ობიექტი სწორედ ასეთ ხალხმრავალ ადგილას გავხსნათ. ეს მნიშვნელოვანი იქნება როგორც ჩვენი ბრენდის ცნობადობის ასამაღლებლად, ისე ბიზნესის განვითარებისთვის.

ცნობისთვის, „მოჩიკო" საოჯახო ტიპის საწარმოა, რომელიც 2023 წლის 23 მაისს დაფუძნდა და მდებარეობს ქალაქ ქუთაისში, ბუკიას 48 ნომერში.