"გრინვუდი“ – თანამედროვე და უნიკალური სასტუმრო მწვანე კონცხზე, ბოტანიკური ბაღის სიახლოვეს

ბიზნესი

სვანური ტრადიცია და თანამედროვე ხედვა - რას სთავაზობს TIO მომხმარებლებს

14.10.2026.18:00

2026 წლის ივლისში ბაზარზე ახალი ქართული ბრენდი - TIO გამოჩნდა, რომლის პირველი პროდუქტი ტრადიციული სვანური მარილია. ბრენდის საფუძვლად ოჯახში თაობიდან თაობას გადაცემული რეცეპტი და სვანური სამზარეულოს ტრადიცია დგას.

როგორც TIO-ს დამფუძნებელი ლიკა ონიანი Business Insider Georgia-სთან ამბობს, ბრენდის მიზანი მხოლოდ სვანური მარილის წარმოება არ არის - კომპანია ქართული გემოსა და ტრადიციის თანამედროვე ფორმით წარმოჩენას და მომავალში მისი საქართველოს ფარგლებს გარეთ გატანას გეგმავს.

როგორია კომპანიის საქმიანობის სპეციფიკა, როდიდან ოპერირებთ ბაზარზე და რას სთავაზობთ მომხმარებელს?

TIO-ს ისტორია ეფუძვნება რეცეპტს, რომლითაც დღეს ბრენდის პირველი პროდუქტი მზადდება და რომელიც ჩვენს ოჯახში თაობიდან თაობას გადმოეცა. ჩემთვის ის ყოველთვის უფრო მეტი იყო, ვიდრე უბრალოდ ინგრედიენტების ნაზავი - ეს იყო სვანური სუფრის და იმ სახლური კერძების გემო რომელსაც განსაკუთრებული ემოციური დატვირთვა აქვს.

ბრენდი ბაზარზე 2026 წელს ივლისში გამოჩნდა და მისი პირველი პროდუქტი ტრადიციული, ავთენტური სვანური მარილია.

მთავარი იდეა ისაა, რომ TIO მხოლოდ მარილი არ უნდა იყოს. ჩემი ხედვაა, შევქმნა ბრენდი, რომელიც ქართულ გემოს, ტრადიციას, სუფრას და სახლთან დაკავშირებულ ემოციებს გააერთიანებს და ამ ყველაფერს თანამედროვე ფორმით მოუყვება როგორც ქართველ, ისე უცხოელ მომხმარებელს. და სწორედ ამ იდეით გვინდა, TIO მომავალში საქართველოშიც და მის ფარგლებს გარეთაც ადამიანისთვის მხოლოდ ქართული პროდუქტი კი არა, საქართველოსთან დაკავშირებული განცდა გახდეს.

რა განასხვავებს „ტიოს მარილს“ ბაზარზე არსებულ სხვა სვანური მარილის პროდუქტებისგან და რა არის ბრენდის მთავარი კონკურენტული უპირატესობა?

ბაზარზე კონკურენცია მაღალია და ჩვენ ამას მხოლოდ დადებითად ვუყურებთ. თითოეულ ბრენდს აქვს თავისი ისტორია, ხასიათი და საკუთარი გემოვნური თავისებურება. საბოლოო არჩევანი კი ყოველთვის მომხმარებელზეა - ყველაზე სამართლიან და სწორ შემფასებელზე.

რაც შეეხება TIO-ს, ჩვენ ვინარჩუნებთ ტრადიციულ შემადგენლობასა და იმ გემოს, რომელიც ამ რეცეპტს წლების განმავლობაში მოჰყვება. ჩვენთვის შეფუთვა, დიზაინი და პრეზენტაციის ესთეტიური ფორმა, უბრალოდ ვიზუალური ნაწილი არ არის - ეს არის ჩვენი მცდელობა, ქართულ ტრადიციას ახალი ენა მოვუძებნოთ, ისე, რომ მისი ფესვები არ დავკარგოთ.
ამიტომ ვფიქრობ, TIO-ს მთავარი უპირატესობა მხოლოდ მარილის გემო არ არის. ეს არის ავთენტური ისტორიის, ტრადიციული გემოსა და ქართული იდენტობის ერთიანობა.

როგორ აფასებთ მომხმარებლების ინტერესს ახალი ბრენდის მიმართ და სად არის ამ ეტაპზე პროდუქციის რეალიზაციის ძირითადი არხები?

ახალი ბრენდის შექმნისას ერთ-ერთი ყველაზე საინტერესო ეტაპია იმის ნახვა, როგორ იღებს მომხმარებელი შენს იდეას. TIO-ს შემთხვევაში განსაკუთრებით საინტერესოა, რომ ადამიანები მხოლოდ პროდუქტით არ ინტერესდებიან - მათ აინტერესებთ მისი ისტორია. ხშირად სწორედ ეს ხდება პირველი საუბრის მიზეზი: საიდან არის მარილი, რატომ ჰქვია ბრენდს TIO და სხვა.

განსაკუთრებით მოწონებას იმსახურებს ის ფაქტი, რომ ნედლეული მოყვანილია სვანეთში, არის ეკოლოგიურად სუფთა და არ შეიცავს მინარევებს.

ამ ეტაპზე ჩვენი ძირითადი არხებია Instagram-ი და Facebook-ი, ასევე გამოფენებსა და სხვადასხვა ღონისძიებაში მონაწილეობა. ჩვენთვის სოციალური მედია მხოლოდ პროდუქტის გაყიდვის ადგილი არ გახლავთ, ეს არის სივრცე, სადაც TIO-ს ისტორიას ვყვებით და ადამიანებთან ურთიერთობას ვქმნით.

სამომავლოდ, ვგეგმავთ, Tio ხელმისაწვდომი იყოს სხვადასხვა ლოკაციებზე.

რა გეგმები აქვს კომპანიას განვითარებისა და პროდუქციის ასორტიმენტის გაფართოების მიმართულებით?

TIO-ს მომავალს მხოლოდ სვანური მარილის ბრენდად ვერ წარმოვიდგენ. მაქვს გარკვეული იდეები, როგორც პროდუქციის მრავალფეროვნების კუთხით, ასევე ექსპორტის მიმართულებითაც. საბოლოო მიზანიც სწორედ ეს არის - ქართული გემო, ტრადიცია და ქართული ესთეტიკა ისე გავიტანოთ მსოფლიოში, რომ ჩვენი იდენტობა არ დაიკარგოს.

შესაბამისად, TIO-ს იდეა მხოლოდ ბიზნესის განვითარება არ არის. ეს არის შესაძლებლობა, ოჯახის ტრადიციებიდან დაწყებული პატარა ისტორია, უფრო დიდ ისტორიად ვაქციოთ.