2026 წელს „გუდვილი“ საკუთარი ქსელის აქტიურ გაფართოებას გეგმავს. როგორც Business Insider Georgia-სთან ინტერვიუში „გუდვილის“ გენერალურმა დირექტორმა, გიორგი ხაბაშვილმა აღნიშნა, გარდა ახალი ფილიალებისა, კომპანია საკუთარ მომხმარებელს გაზრდილ ასორტიმენტსაც შესთავაზებს.

- როგორ შეაფასებთ 2025 წელს „გუდვილის“ საქმიანობას? რა იყო წლის მთავარი მიღწევები თქვენი კომპანიისთვის?

- „გუდვილმა“ 22-წლიანი იუბილე მასშტაბური რებრენდინგით აღნიშნა. განახლებული იდენტობა, მომხმარებელზე ორიენტირებული სერვისები და პრემიუმ გამოცდილება - სწორედ ასე შევაბიჯეთ განვითარების ახალ ეტაპზე. რებრენდინგმა კომპანიის თანამედროვე ვიზუალური სტილი სრულად გააერთიანა.
განსაკუთრებით აღსანიშნავია ვაკის ფილიალის განახლება, რომელიც საერთაშორისო პარტნიორებთან თანამშრომლობით დაიგეგმა და სრულად პასუხობს თანამედროვე სავაჭრო სივრცის უმაღლეს სტანდარტებსა და მომხმარებლის მოლოდინებს. გარდა ამისა, გაფართოების სტრატეგიის ფარგლებში, ბათუმში, შერიფ ხიმშიაშვილის 61 ნომერში, „გუდვილის“ რიგით მესამე ფილიალი გაიხსნა.

- რომელ კატეგორიის პროდუქტების გაყიდვებმა დააგენერირა ყველაზე დიდი ზრდა 2025 წელს?

- 2025 წელს გაყიდვების ყველაზე მაღალი ზრდა „გუდვილის“ საკუთარი წარმოების მიმართულებებმა აჩვენა. მომხმარებელში განსაკუთრებული პოპულარობით სარგებლობს მზა კვებისა და პურ-ფუნთუშეულის კატეგორიები.
ასევე, ლიდერ პოზიციებს ინარჩუნებს ხორცისა და ხორცპროდუქტების სექცია. მნიშვნელოვანი მატება გვაქვს ხილ-ბოსტნის კატეგორიაშიც, რაც კიდევ ერთხელ ადასტურებს, რომ მომხმარებლისთვის პრიორიტეტულია ჯანსაღი და ნატურალური პროდუქტების მრავალფეროვნება.

- რა ძირითადი მიზნები გაქვთ 2026 წლისთვის: გაფართოება, ახალი მაღაზიები, ონლაინ გაყიდვების განვითარება, ასორტიმენტის გაზრდა ან სხვა?

- ჩვენს გეგმებში 2026 წელს აქტიურად არის ქსელის გაფართოება და ახალი ფილიალების გახსნა. ამასთანავე, მომხმარებლებს შევთავაზებთ გაზრდილ ასორტიმენტს - როგორც ადგილობრივი წარმოების, ისე ექსკლუზიური ბრენდების პრემიუმ პროდუქციის მიმართულებით.

- როგორ აპირებთ ონლაინ კომერციის (e-commerce) განვითარებას 2026 წელს?

- 2026 წელს ონლაინ მიმართულებით ჩვენს მომხმარებლებს კიდევ უფრო მეტ შესაძლებლობას შევთავაზებთ.

ჩვენი პრიორიტეტებია:

• ინდივიდუალური აქციების და ლოიალობის სპეციალური პროგრამების დანერგვა;
• ტექნიკური სრულყოფა და ახალი ფუნქციონალების დამატება;
• საინტერესო შეთავაზებების შექმნა, როგორც ფიზიკური, ისე იურიდიული პირებისთვის;
• მომსახურების ხარისხის ამაღლება და პროდუქციის უმოკლეს დროში მიწოდების უზრუნველყოფა.