ქართული ნატურალური Mamati Tea • ჩაი მამათი, რომელიც ეკოლოგიურად სუფთა გარემოში მოყვანილი ჩაის ფოთლის ტრადიციული ტექნოლოგიით გადამუშავდება, ექსპორტისთვის ემზადება. როგორც Business Insider Georgia-სთან საუბარში კომპანიის გაყიდვებისა და მარკეტინგის დეპარტამენტის წარმომადგენელმა, გვანცა ნატმელაძემ განაცხადა, კომპანია ამ დროისთვის ბიო სერტიფიკატის მიღების პროცესშია, ხოლო 2026 წლიდან საექსპორტო ბაზრებზე გასვლას გეგმავს.

„ჩაის წარმოება მამათში 1938 წლიდან არსებობს, თუმცა როგორც ბრენდი „მამათი“ ბაზარზე უკვე ორი წელია წარმოდგენილია. ამ ეტაპზე მომხმარებელს ვთავაზობთ ორ სახეობას - მწვანე და შავ ჩაის, როგორც დასაყენებელ, ისე ერთჯერად შეფუთვებში,“ - აღნიშნავს ნატმელაძე.

მისი თქმით, ჩაის პლანტაციები სოფელ მამათში, 10 ჰა ტერიტორიაზეა გაშენებული.

„გვაქვს ბიო წარმოება და ამჟამად ვმუშაობთ ხარისხის სერტიფიკატის მიღებაზე. ველით, რომ მალე ექსპორტზეც გავალთ“, - ამბობს „მამათის“ წარმომადგენელი.

ამ ეტაპზე არსებული პლანტაციები საკმარისია კომპანიის წარმოებისთვის, თუმცა, მომავალში გაფართოებას და ახალი პლანტაციების დამატებასაც გეგმავენ.

„გვჯერა, რომ ბაზარზე თავის დამკვიდრებას შევძლებთ - ბიო წარმოება ჩვენი ჩაის განსაკუთრებულ არომატს განსაზღვრავს,“- ამბობს ნატმელაძე.

მისი ინფორმაციით, ამჟამად „მამათი“ წარმოდგენილია ჰიპერმარკეტ „გუდვილის“ ქსელში, თუმცა კომპანია აქტიურად მუშაობს სადისტრიბუციო არხების გაფართოებაზე.

ექსპორტის მიმართულებით კომპანია განიხილავს როგორც ევროპის, ისე აზიის ბაზრებს.

„მომავალ წელს ვგეგმავთ პროდუქციის გატანას უცხოეთში. მიუხედავად იმისა, რომ ჩაი ტრადიციულად ჩინეთთან ასოცირდება, იქაც კი ყოველთვის არის მოთხოვნა ხარისხიან პროდუქციაზე,“ - აღნიშნავს ის.

ნატმელაძის თქმით, „მამათი“ პრემიუმ ხარისხის ჩაია და მისი მთავარი უპირატესობა ეკოლოგიურად სუფთა, ბიო წარმოებაა.
„ჩვენი მთავარი კონკურენტული უპირატესობა არის ის, რომ ვიყენებთ მხოლოდ ნატურალურ მეთოდებს - დამატებებისა და ქიმიური სასუქების გარეშე. ეს შესაძლოა მოსავლიანობაზე აისახოს, თუმცა ჩვენთვის ხარისხი რაოდენობაზე მნიშვნელოვანია,“ - აცხადებს კომპანიის წარმომადგენელი.