პირველად გვყავს პრემიერი, რომელიც კითხვებს წინასწარ არ არჩევს, ყველა თემატიკაზე მზად არის ისაუბროს, მათ შორის იმ საკითხებზე, რომლებიც ბიზნესს აწუხებს, - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ კითხვის პასუხად განაცხადა, რომელიც საქართველოს ბიზნეს ასოციაციის ეგიდით მოწყობილ შეხვედრას ეხებოდა, რომელსაც პრემიერ-მინისტრი და მინისტრთა კაბინეტის წევრები ესწრებოდნენ. 

„უნდა აღვნიშნოთ, რომ პიროვნული ფაქტორი ძალიან მნიშვნელოვანია იმიტომ, რომ ალბათ პირველად გვყავს პრემიერი, რომელიც კითხვებს წინასწარ არ არჩევს, არ ერიდება და თამამად ყველა თემატიკაზე მზად არის ისაუბროს მათ შორის, იმ საკითხებზე რომელიც ბიზნესს აწუხებს და ცხადია ეს საკითხები არის უშუალოდ მთავრობის და მისი კომპეტენციის ქვეშ. მე შემიძლია ღიად ვთქვა, ყოველგვარი მიკიბ-მოკიბვის გარეშე რომ ხომ შეიძლება ვიღაცაზე თქვა, რომ  მოდი ამან კითხვა დასვას, ამან არ დასვას, მოდი ეს სექტორი დავსვათ - არანაირი წინასწარი შეთანხმება. რაც არის ძალიან პოზიტიური თავისთავად. მე ვფიქრობ, დრო რომ ყოფილიყო ალბათ შეიძლება რამდენიმე საათი კიდე გაგრძელებულიყო საუბარი იმიტომ, რომ ყოველი ახალი კითხვა და ყოველი პასუხი ამ ახალ კითხვაზე აჩენდა დამატებით სხვა სექტორიდან რაღაც მსგავს კითხვას. საკმაოდ დეტალებში იყო ჩასვლა ბიზნესის მხრივ, დაწყებული კორპუსის სიმაღლეებიდან და საავიაციო სტანდარტებიდან, დამთავრებული ავტობანით და  იმ პრობლემებით, რომელიც ავტობანის მიმდებარედ შეიძლება ვამჩნევდით. ძალიან ბევრი თემა იყო, რომელიც მათ შორის პოლიტიკურ  თემებზეც იყო  საუბარი - არ ჩავუღრმავდები, დასმული იყო რამდენიმე ბიზნეს კომპანიის წარმომადგენლის და მფლობელის მიერ, ამიტომ ძალიან ისეთი ფართო დიაპაზონი იყო საკითხების და პასუხებიც იყო ძალიან პირდაპირი, ღია და კომპეტენტური“, - აღნიშნა ლევან ვეფხვაძემ.

საქართველოს ბიზნეს ასოციაციის აღმასრულებელი დირექტორი ამბობს, რომ როდესაც პირველი პირი მოტივირებულია, ეს მის გუნდსაც გადაედება. 

„ზოგადად, ფორმულაა ეგეთი, რომ როდესაც პირველი პირი მოტივირებულია და მონდომებულია, ეს როგორც წესი ვერტიკალზე მნიშვნელოვნად გადაედება ხოლმე იმ ადამიანებს ვინც ამ ადამიანის გუნდის წევრი ბრძანდება და შესაბამისად ჩვენ ვხედავთ ახალ ადამიანებს, ახალი ახალი მენეჯმენტია სამინისტროებში. ზოგან ახალია, ზოგან ძველი - თუმცა განწყობა ყველგან არის ძალიან აქტიური ინტერაქციის კუთხით, გამოხმაურების კუთხით, გარკვეულ შეკითხვაზე პასუხის გაცემის კუთხით, გარკვეული საკითხის ბოლომდე მიყვანის კუთხით.

ძალიან მნიშვნელოვანია, რომ  ეს პოზიტიური მაგალითი და მითითება პირველი პირისგან მოდის და ეს ჩვენ ვიხილეთ იმ ფორუმზე, სადაც იყო ბიზნესიც და სადაც იყო თითქმის ყველა ის მინისტრი, რომელთანაც ჩვენ უშუალო შეხება გვაქვს, პირდაპირ კომუნიკაციაში ვართ მათ შორის: ეკონომიკის, ფინანსთა,  სოფლის მეურნეობის მინისტრი და  ა.შ. სადაც პირდაპირ გვაქვს ყოველდღიური ინტერაქცია და შეხება.  ძალიან მნიშვნელოვანი იყო სწორედ ეს, რომ  ამ ფორმატში ეთქვა პრემიერს და მე ვფიქრობ, რომ აქ პროცესები უკვე აჩვენებს.

თუ ვინმე ამ ტემპს ფეხს ვერ აუბამს ეს მისი პრობლემა გახდება გარკვეული პერიოდის მერე. მე დარწმუნებული ვარ, რომ ტემპი იქნება მაღალი, პირველი პირისგან სწორედ ეს არის მოთხოვნილი და იმედი გვაქვს, რომ ყველა შესაბამისად, ადმინისტრაციული  ორგანოს წარმომადგენელი ადეკვატურად აუბამს ამ ტემპს ფეხს“, - განმარტა ლევან ვეფხვაძემ.