ორგანული ნედლეულით დამზადებული ქართული სანელებლების კომპანია Paprika,  სამი წელია რაც ბაზარზე ოპერირებს და მომხმარებელს მაღალი ხარისხის პროდუქტს სთავაზობს. მიმდინარე სიახლეებსა და სამომავლო გეგმებზე Business Insider Georgia Paprika-ს დამფუძნებელს ინგა ზურაბიანს ესაუბრა.

როგორია კომპანიის მიმდინარე სიახლეები?

ბოლო პერიოდში ჩვენი მთავარი პრიორიტეტი არის საერთაშორისო პოზიციების გაძლიერება და საექსპორტო ბაზრების გაფართოება. ახლახანს დავბრუნდით მადრიდის საერთაშორისო გამოფენიდან - IFEMA Madrid-დან, სადაც წარვადგინეთ სანელებლების სრული ასორტიმენტი. ჩვენმა პროდუქციამ დიდი ინტერესი გამოიწვია ევროპელ დისტრიბუტორებს შორის. ამ გამოფენამ მოგვცა შესაძლებლობა გაგვეფართოვებინა პარტნიორთა ქსელი. ამჟამად, უკვე მიმდინარეობს მოლაპარაკებები რამდენიმე ევროპულ კომპანიასთან თანამშრომლობის დაწყების თაობაზე.

აღსანიშნავია ისიც, რომ აქტიურად ვმუშაობდით გერმანიის ბაზარზე შესასვლელად, და შედეგად, უკვე განვახორციელეთ პირველი ექსპორტი.

გარდა ამისა, ტექნოლოგიურადაც მნიშვნელოვანი ნაბიჯები გადავდგით: დავამატეთ საწარმოო დანადგარები, რაც გვაძლევს საშუალებას გავზარდოთ წარმოების ეფექტიანობა და შევინარჩუნოთ პროდუქტის მაღალი ხარისხი.

როგორი არის მიმდინარე ასორტიმენტი?

მიმდინარე ასორტიმენტს დავამატეთ ახალი მიქსები - საცივის მიქსი, რომელსაც საუცხოო გემო აქვს. ახალი წელი მოდის და ეს მიქსი მომხმარებლებს სამზადიის ნამდვილად გაუმარტივებს. ასევე დავამატეთ ქათმის და თევზის საკმაზი, რომელიც განსაკუთრებულ გემოს აძლევს შეწვის დროს კერძს. ჩვენი პროდუქციის მთავარი უპირატესობა ბუნებრივი შემადგენლობა და არომატის შენარჩუნებაა. ამისთვის კი ვიყენებთ უმაღლესი ხარისხის ინგრედიენტებს.

ამჟამად, ვმუშაობთ რამოდენიმე კომპანიასთან Private Label (PL) მიმართულების განვითარებაზე, როგორც საქართველოში, ასევე უცხოურ ბაზარზე. რაც ჩვენს პარტნიორებს საშუალებას მისცემს მიიღონ პერსონალიზებული შეფუთვა და დიზაინი, მორგებული მათი ბაზრის მოთხოვნებზე. შეფუთვის არსებული ფორმატი უკვე კარგად არის დამკვიდრებული, თუმცა ახალი PL ხაზი კიდევ უფრო ინოვაციური და ბაზრის სპეციფიკაზე მორგებული იქნება.

როგორია მოთხოვნა „Paprika“-ს პროდუქციაზე?

მოთხოვნა მუდმივად იზრდება, როგორც ადგილობრივ ბაზარზე, ისე საერთაშორისო მიმართულებებით. მომხმარებლები სულ უფრო მეტად აფასებენ ხარისხს, ბუნებრივ შემადგენლობასა და შეფუთვის ორიგინალურობას. სწორედ ეს კომპონენტები ქმნის ჩვენი პროდუქციისადმი სანდოობას.

ევროპის ბაზრებზე ქართული სანელებლები ხშირად აღიქმება როგორც ახალი და განსხვავებული არომატული გამოცდილება - ბუნებრივი და ხელნაკეთი პროდუქტის ალტერნატივა მასობრივად წარმოებული სანელებლების ფონზე. ჩვენ ვხედავთ მზარდ ინტერესს არა მხოლოდ საცალო მომხმარებლებისგან, არამედ რესტორნებისა და კერძო პირების მხრიდანაც, რომლებიც ეძებენ ავთენტურ ქართულ გემოს. სწორედ ეს მოთხოვნა რომ დავაკმაყოფილოთ, სამომავლო გეგმები წარმადობის ზრდაზე იქნება აქცენტირებული.

როგორია კომპანიის სამომავლო გეგმები?

2026 წელს ძირითდი მიმართულება საწარმოო ინფრასტრუქტურის განვითრება იქნება, რაც მნიშვნელოვნად გაზრდის წარმოების მოცულობასა და ეფექტიანობას. ასევე დღის წესრიგში დგას ასორტიმენტის გაფართოება - უფრო ახალი კატეგორიები დაემატება, რომლებიც სპეციალურად იქნება მორგებული საერთაშორისო ბაზრის მოთხოვნებზე.
მთავარ სტრატეგიულ მიზნად რჩება ახალი ბაზრების ათვისება და ქართული სანელებლების ცნობადობის ზრდა საერთაშორისო დონეზე.

ჩვენი მთავარი მიზანია ყველას ვაჩვენოთ, რომ საქართველო არის ქვეყანა, სადაც ტრადიცია და თანამედროვე ხარისხი ერთიანდება, შედეგად კი იქმნება პროდუქტი, რომელიც ღირსეულად წარმოჩენს ჩვენს ქვეყანას მსოფლიო ბაზარზე.

ცნობისთვის, მეტი ინფორმაციისთვის შეგიძლიათ ეწვიოთ Paprika -ს ვებგვერდს.