ბათუმში ორბი ჯგუფი ახალი პროექტის განხორციელებას იწყებს. საუბარია კომპანიის ახალი, მასშტაბური სასტუმრო კომპლექსის - ORBI Continental-ის მშენებლობის დაწყებაზე.

კომპანიის გენერალური დირექტორის ირაკლი კვერღელიძის თქმით, ახალი პროექტი იქნება ბათუმის სავიზიტო ბარათი. 

„დღეს არის ძალიან მნიშვნელოვანი და ამაღელვებელი დღე თითოეული ჩვენთაგანისთვის, ჩვენთვის, თითოეული ბათუმელისთვის, რადგან ჩვენ დღეს საფუძველს ვუყრით პროექტს, ვიწყებთ მშენებლობას, რომელიც დარწმუნებული ვარ და თამამად შემიძლია ვთქვა, რომ იქნება სავიზიტო ბარათი ჩვენი ულამაზესი ქალაქის, ჩვენი ულამაზესი რეგიონის და მთლიანად ჩვენი ქვეყნის. ძალიან ბედნიერი ვარ იმით, რომ ეს ადგილი თოთოეული ბათუმელისთვის და ჩამომსვლელი სტუმრებისთვის იქნება სასურველი და საყვარელი ადგილი“, - აღნიშნა კვერღელიძემ.

პროექტი ორი ცათამბჯენის მშენებლობას ითვალისწინებს და მასში 300 მლნ დოლარის ინვესტიცია განხორციელდება. 

როგორც პროექტის მშენებლობის საფუძვლის ჩაყრაზე ქვეყნის პრემიერ-მინისტრმა განაცხადა, ეს პროექტი ადასტურებს კერძო სექტორის ნდობას სახელმწიფო მიმართ, ეკონომიკის განვითარების, ბათუმის განვითარების მიმართ და ამ კუთხითაც ძალიან მნიშვნელოვანია ეს ინიციატივა.

„ასევე მნიშვნელოვანია ამ პროექტის სოციალური განზომილება, როგორც ჩვენ გვითხრეს, 1 500 ადამიანი იქნება დასაქმებული ამ პროექტში უშუალოდ მშენებლობის ეტაპზე და როდესაც უკვე დაიწყებს ეს პროექტი ფუნქციონირებას, ამის შემდეგ 2 000 ადამიანი იქნება დასაქმებული ამ მულტიფუნქციურ ინფრასტრუქტურაში. ეს არის ნამდვილად თანამედროვე სტანდარტების პროექტი, რაც ძალიან მისასალმებელია. ეს იქნება ერთგვარი სავიზიტო ბარათი, რომელიც გაამდიდრებს ბათუმის იერსახეს და ხელს შეუწყობს ბათუმის განვითარებას.

ტურიზმისა და მშენებლობის სექტორი არის ქართული ეკონომიკის ერთ-ერთი უმთავრესი მამოძრავებელი ძალა და რა თქმა უნდა, ჩვენი მხრიდან მომავალშიც ექნება მაქსიმალური ხელშეწყობა და მხარდაჭერა ამ ორი სექტორის განვითარებას. ჩვენ მივესალმებით ნებისმიერი ასეთ შთამბეჭდავ კერძო ინიციატივას, რომელიც ხელს შეუწყობს ამ სექტორების განვითარებას და ზოგადად ჩვენი ეკონომიკის განვითარებას. მადლობას გადავუხდი კომპანიას „ორბი კონტინენტალს“, რომელიც გამოირჩევა შთამბეჭდავი პროექტებით და ამ კომპანიას უკვე ძალიან დიდი წვლილი აქვს შეტანილი კომპანიის განვითარებაში. დარწმუნებული ვარ, რომ მომავალშიც მათი წვლილი იქნება ძალიან დიდი. კიდევ ერთხელ გილოცავთ ამ შთამბეჭდავი პროექტისთვის საფუძვლის ჩაყრას და გისურვებთ ამ პროექტის წარმატებით განხორციელებას და დასრულებას“, - განაცხადა ირაკლი კობახიძემ.