ძალიან მნიშვნელოვანი პროექტია, - ასე აფასებს დეველოპერული კომპანია „მეტროპოლის“ გენერალური დირექტორი მამუკა იმედაშვილი მთავრობის ინიციატივას, რომელიც შენობა-ნაგებობების ესთეტიკური მახასიათებლების დადგენას და პირობების განსაზღვრას გულისხმობს. ამ მიზნით, ეკონომიკისა და მდგრადი განვითარების მინისტრი მარიამ ქვრივიშვილი უკვე შეხვდა კერძო სექტორის წარმომადგენლებს და დადგენილების პროექტი წარუდგინა. აღნიშნულ შეხვედრას ესწრებოდა „მეტროპოლისის“ გენერალური დირექტორიც.

„მივესალმებით მსგავსი ტიპის შეხვედრებს, რადგანაც ბიზნესის აზრის გაზიარება ხდება - ეს საინტერესოა ჩვენთვისაც და მნიშვნელოვანია. რაც შეეხება თვითონ კონკრეტულ პროექტს ძალიან მნიშვნელოვანი პროექტია. ის არ იქნება მარტივად განსახორციელებელი იმ თვალსაზრისით, რომ კულტურულის ნაწილშია გასაჯენი, თუმცა დარწმუნებული ვარ, რომ ხალხს მიმღებლობა ამაზე მაღალი ექნება, მაგრამ ბიზნესების ერთიან სისტემაში მოქცევა მარტივი არ იქნება. თუმცა მსგავსი ტიპის შეხვედრებით, აზრის გაზიარებით და რეალური მიზნისა და საჭიროების განმარტებით, ეს შესაძლებელი ხდება“, — აღნიშნა მამუკა იმედაშვილმა.

„მეტროპოლისის“ გენერალური დირექტორი პროექტის იმპლემენტაციის პირობებში გარკვეულ გამოწვევებზეც საუბრობს, რაც მისი აზრით დიალოგით და ბიზნესის მხრიდან გარკვეული პასუხისმგებლობების გათვალისწინებით განხორციელებადია.

„ბიზნესმა უნდა დასვას შეკითხვები ღიად და კარგად უნდა ესმოდეს, რისთვის კეთდება ეს ყველაფერი. ის, რომ ნებისმიერი კომპანიის პასუხისმგებლობა, გარდა ფინანსური მაჩვენებლების დადებისა, არის ქვეყნის სამსახურში ყოფნაც და იმ იერსახის გათვალისწინება, რაც ქვეყნისთვის მნიშვნელოვანია. საბოლოო ჯამში, კომერციალიზაციის კუთხით თუ შევხედავთ, ნებისმიერი პროექტი - იქნება ეს ტურისტული თუ სხვა - გრძელვადიან პერსპექტივაში, რაც უფრო გალამაზებული იქნება იერსახე, მით უფრო საინტერესო იქნება ინდივიდუალური თუ ბიზნეს პროექტი. ასევე, ჩემი აზრით, ძალიან მნიშვნელოვანია პროექტის გაგრძელების დაგეგმვა თბილისის ნაწილზე, მაგრამ, ალბათ, რეგიონების კუთხით საქმე ბევრად მარტივად მიდის. თბილისის ნაწილში არსებულ მშენებლობებზე ყველაზე დიდი გამოწვევა სწორედ ეს იქნება, რადგან პროექტები უკვე არსებობს და ჩანაცვლების ნაწილში დიდი გამოწვევები იქნება. ვგულისხმობ როგორც პროექტებს, რომლებიც დამტკიცებულია, მაგრამ მშენებლობა ჯერ არ დაწყებულა, ასევე უკვე დასრულებულებს“, - განმარტავს „მეტროპოლისის“ გენერალური დირექტორი.

მამუკა იმედაშვილი ფიქრობს, რომ პროექტის განხორციელება თვითონ კომპანია „მეტროპოლს“ ხარჯებს არ გაზრდის.

„გეტყვით „მეტროპოლისის“ მაგალითზე - არა, იმიტომ, რომ ნებისმიერ ჩვენს პროექტზე ვცდილობთ, რომ იერსახე და არქიტექტურა მაღალი ხარისხის იყოს. ამაში დიდი ენერგიასა და რესურსებს ვხარჯავთ, მათ შორის ფინანსურ რესურსსაც. არ მგონია, რომ ისეთი განსაკუთრებული ფაქტორი იქნეს სემოღებული, რამაც გამოიწვიოს ჩვენი ფინანსური ხარჯების ზრდა, რადგანაც ჩვენ ისედაც ვცდილობთ, რომ ჩვენი ფასადიც, გადახურვაც მაღალი ხარისხისა და პრესტიჟული იყოს“, - აცხადებს დეველოპერული კომპანიის გენერალური დირექტორი.