ადგილობრივი ნედლეულით დამზადებული, 100%-ით ნატურალური, უშაქრო  წვენების მწარმოებელი კომპანია  „მაისი“ ასორტიმენტს აფართოებს. ამის შესახებ, Business Insider Georgia - ს კომპანიის თანადამფუძნებელმა მარიამ ქოიავამ განუცხადა. მისი თქმით, უახლოეს პერიოდში ასორტიმენტს დაემატება ბროწეულის წვენი და ასევე ახალი ბლენდი ვაშლით და ჯინჯეროთ, რომელიც ძალიან უცხო და განსხვავებული გემოა.

რაიმე განსაკუთრებული სიახლე ხომ არ აქვს კომპანიას მიმდინარე ეტაპზე?

უახლოეს პერიოდში გვექნება სიახლეები გემოებთან დაკავშირებით. ადგილობრივ ბაზარზე ძალიან მალე გამოვუშვებთ ბროწეულის წვენს და ასევე ჩვენს ახალ ბლენდს ვაშლით და ჯინჯერით, რომელიც ძალიან უცხო და განსხვავებული გემოა. ასევე ძალიან მალე ელექტორნული კომერციის პლატფორმებზე ვიქნებით უფრო განსხვავებულად წარმოდგენილები. ვაპირებთ, იმუნო ბუსტერ ბოქსების ჩაშვებას. ეს იქნება 4-6 წვენისგან შემდგარი ნაკრები, რომელიც იქნება შედგენილი იმის მიხედვით თუ რა ვიტამინები და დანამატები უნდა მიიღოს ადამიანმა იმისათვის რომ გაიძლიეროს იმუნიტეტი. ამ ეტაპზე ვაწარმოებთ მოლაპარაკებას ველისთან და ვოლტთან. ამ ორივე პლატფორმაზე ისედაც ვართ წარმოდგენილები „მაისის“ სახით, მაგრამ გვინდა ახალი პროდუქტითაც ვიყოთ წარმოდგენილები.  გარდა ამისა, სულ რამდენიმე დღეა რაც ადგილობრივ ბაზარზე ჩავუშვით „ჟირაფი ჟოზესთან“ კოლაბორაციით „მაისის“ წვენი. გვგონია რომ ეს არის ძალიან კარგი პროექტი განსაკუთრებით ბავშვებისთვის. „ჟირაფი ჟოზე“ ქართული, ყველასთვის საყვარელი ბრენდია და ამ ბრენდის ქვეშ ნაწარმოები „მაისის“ პროდუქტი არის აბსოლუტურად ჯანსაღი და სასარგებლო ბავშვებისთვის. ეს სიახლე ყველას გვიხარია იმიტომ რომ კარგი, ხარისხიანი და სასარგებლო პროდუქტი შევქმენით. 

როგორია კომპანიის სამომავლო გეგმები? 

რასაკვრიველია, ძალიან აქტიურად ვაგრძელებთ საექსპორტო ბაზრებზე მუშაობას. ჩვენი აქცენტის ქვეშ ისევ არის შეერთებული შტატები და გაერთიანებული საამიროები, დუბაი. მიუხედავად იმისა, რომ ამერიკაში ტარიფების რეჟიმის შემოღება არავისთვის სახარბიელო არ არის იმიტომ რომ ტარიფი ლოგიკურად პროდუქტს რა პროცენტიც არ უნდა იყოს აძვირებს. აქ ჩვენ ჩავატარეთ ანალიტიკა და გავაანალიზეთ ყველა ის ქვეყანა, რომელსაც შეაქვს აშშ-ში კონკრეტულად წვენი და ვხედავთ რომ ძალიან ბევრი ქვეყანა, რომელიც საკმაოდ დიდი რაოდენობის ექსპორტს ეწევა შეერთებულ შტატებში მათთვის სატარიფო პირობები არის მნიშვნელოვნად უარესი, ვიდრე საქართველოსთვის და ქართულ პროდუქტებზე. ამიტომ, ნებისმიერ რთულ გარემოებაში კარგიც უნდა ვეძიოთ. ზოგადად, ტარიფები ცუდია, თუმცა სხვებთან შედარებით უკეთეს პოზიციაში ვართ თუ ამას ყველაფერს შესაბამისად გამოვიყენებთ. აქცენტი გვინდა გავაკეთოთ კიდევ უფრო მეტად შეერთებულ შტატებზე.

ცნობისთვის, კომპანია დაარსდა 2020 წელს. საწარმო მდებარეობს ნატახტარში. პროდუქცია სერტიფიცირებულია BRCGS Grade A+ და FDA-ს მიერ, რაც ადასტურებს პროდუქციის მაღალ ხარისხსა და უსაფრთხოებას.