მიმდინარე პერიოდში აქტიურად ვმუშაობთ გაფართოებაზე , - ამის შესახებ Business Insider Georgia-ს ჩირის მწარმოებელი ქართული ბრენდი "კერკის" დირექტორმა თამარ გაბეჩავამ განუცხადა.

როგორია კომპანიის მიმდინარე სიახლეები?

,,კერკი’’ მიმდინარე პერიოდში აქტიურად მუშაობს გაფართოებაზე. ჩვენი მიზანია, პროდუქცია ხელმისაწვდომი გავხადოთ მთელი საქართველოს მასშტაბით, როგორც მსხვილ სავაჭრო ქსელებში, ისე ბენზინგასამართი სადგურების მაღაზიებსა და სააფთიაქო ქსელებში.

როგორია მიმდინარე ასორტიმენტი?

„კერკის“ საფირმო მაღაზია სადღესასწაულო განწყობაზე გადადის! მომხმარებელს მალე შევთავაზებთ სპეციალურ საახალწლო შეფუთვებსა და განახლებულ ასორტიმენტს. გარდა ამისა, აქტიურად ვმუშაობთ უნიკალურ სიახლეზე, ,,მეზღვაურთა ნაკრებზე’’, რომელიც გაყიდვაში მალე ჩაეშვება. ამ ეტაპზე კი გელოდებით ჩვენი მრავალფეროვანი პროდუქციით: სხვადასხვა ხილის ჩირები; ჩურჩხელები; ხილის ფირფიტები; ჯანსაღი საბავშვო სნექები და ა.შ.

როგორ აფასებთ მოთხოვნას ზოგადი თვალსაზრისით?

ჩვენი პროდუქცია კარგად არის ცნობილი და აღიარებული, როგორც ქართველი, ისე უცხოელი მომხმარებლის მიერ, რის გამოც მოთხოვნა დღითიდღე მზარდია. მიუხედავად იმისა, რომ ამ ეტაპზე საფირმო მაღაზია მხოლოდ ბათუმში გვაქვს, სხვა ქალაქებიდან მომხმარებელთა ხშირი ინტერესის საპასუხოდ, აქტიურად ვმუშაობთ გაფართოებაზე.

როგორია კომპანიის სამომავლო გეგმები?

ჩვენი კომპანიის სამომავლო გეგმები მოიცავს, როგორც გეოგრაფიულ გაფართოებას, ასევე პროდუქციის პორტფოლიოს განვითარებას. პარალელურად, მუდმივად ვმუშაობთ ინოვაციებზე, რათა მომხმარებელს მუდმივად შევთავაზოთ უმაღლესი ხარისხის, ტრენდული და მათ საჭიროებებზე მორგებული ახალი პროდუქტები. ჩვენი სტრატეგია ეფუძნება ბრენდის ცნობადობის გაზრდასა და გრძელვადიანი, მყარი ურთიერთობების ჩამოყალიბებას, როგორც მომხმარებლებთან, ისე პარტნიორებთან.

ცნობისთვის, მშრალი ხილის ქართული საწარმო ,,კერკი“ აჭარაში, კერძოდ ქედის მუნიციპალიტეტის სოფ. ძენწმანში მდებარეობს და უკვე ოთხი წელია რაც ბაზარზე ოპერირებს.